dëgjoni

Hendbolli filloi vonë në Kinë dhe tani nuk është i përhapur gjerësisht. Prandaj para hapjes së këtij turneu, komisioni organizativ ishte i shqetësuar që përqindja e shikuesve në terren do të ishte shumë e ulët dhe nuk mund të arrinte qëllimin e eksperimentimit. Mirëpo me zhvillimin e ndeshjeve, përqindja relativisht e lartë e shikuesve dhe entuziazmi i tyre i hoqën shqetësimet e organizatorëve. Gjatë ndeshjeve, shikuesit ngrinin moralin e sportistëve në terren dhe brohorisnin për çdo sulm e mbrojtje të mrekullueshme. Dashamirësi i hendbollit Liu Xiaoli shkoi çdo ditë në pallat për të parë ndeshjet. Ai i tha korrespondentit se nuk i interesonte rezultati i ndeshjeve, por forca tërheqëse e vetë hendbollit është faktori kyç që e shtyu të shkonte në pallat. Liu Xiaoli:

"Mendoj se hendbolli është shumë interesant, me ritëm të shpejtë të sulmit. Ndiej se ky sport është ndërthurje e karakteristikave të futbollit dhe të basketbollit, me shpejtësi të madhe dhe me shumë gjuajtje të topit. Në përgjithësi është shumë interesant. Mendoj se futbolli dhe basketbolli janë shumë të përhapur, prandaj hendbolli nuk duhet të ketë problem të madh. Shpresoj se ky sport do të përhapet në vend dhe besoj se ai do të gjejë përgjigje në shumë njerëz."

Krahas shtimit të vëmendjes së shikuesve ndaj sportit së hendbollit, nëpërmjet këtij turneu edhe vullnetarët mund të njihnin më shumë rregullat e këtij sporti, për të bërë shërbime më të mira në të ardhmen. Studenti nga Universiteti Normal i Pekinit Yan Da punoi si vullnetar gjatë këtij turneu. Ato ditë, ai u përgjigj kryesisht për punët shërbyese brenda pallatit. Si një tifoz basketbolli, Yani, me shtatgjatësi të madhe, mësoi shumë shpejt rregullat e hendbollit. Ai u shpreh se nga përvoja e vet ai beson se shumë njerëz do ta parapëlqejnë këtë lëvizje.

"Mendoj se hendbolli ka natyrë tërheqëse dhe nga ana teknike ai nuk mbetet më prapa se basketbolli dhe futbolli. Mendoj se zhvillimi afatgjatë i një lëvizjeje duhet të mbështetet te baza e mirë në masat popullore, si futbolli në Brazil dhe pingpongu në Kinë. Prandaj duhet të njihen masat popullore me hendbollin dhe më tej t'u pëlqejë hendbolli."

Dihet nga të gjithë se mbështetja e masave popullore është jeta e një lëvizjeje. Në shumë vende evropiane tradicionalisht të forta në hendboll, ky sport radhitet në vendin e dytë të sporteve kolektive pas futbollit. P. sh. në Spanjë ka mbi 6500 klube hendbolli me 90 mijë anëtarë të regjistruar; ndërsa në Francë ka mbi 2400 klube të tilla me mbi 300 mijë anëtarë të regjistruar. Edhe në vende të tjera evropiane, si Gjermani, Norvegji, Danimarkë, Suedi etj. hendbolli është shumë i mirëpritur. Me bazën e fortë në masat popullore dhe me ndeshjet e shpeshta midis klubeve e rajoneve, hendbolli ka ruajtur nivelin e lartë në këto vende. Mirëpo në Kinë gjendja nuk ka qenë optimiste. Sipas funksionarit të Drejtorisë Kombëtare të Fizkulturës dhe të Sporteve të Kinës, Peng Ning, që përgjigjet për hendbollin, për shkak se ka munguar mbështetja e masave popullore, ekipi kombëtar i Kinës ka vështirësi edhe në kërkimin e lojtarëve të hendbollit.

"Në vendin tonë baza e hendbollit në masat popullore është shumë e dobët. Pjesa dërrmuese e lojtarëve të tanishëm nuk merren me hendbollin që nga fillimi. P. sh. të gjithë anëtarët e ekipit kombëtar të hendbollit kanë qenë basketbollistë. Nga ana tjetër, si pasojë e mungesës së fondeve dhe e stërvitjeve jo të rregullta, është vështirë të ngrihet rezultati."

Por entuziazmi i shikuesve i treguar gjatë këtij turneu e frymëzoi shumë Peng Ning-un, këtë funksionar të hendbollit. Ai shpreson se në të ardhmen nëpërmjet sa më shumë ndeshjeve të hendbollit, kinezëve do t'u pëlqejë ky sport dhe hendbolli do të zhvillohet më mirë në Kinë.

"Në fakt ndeshjet e hendbollit janë shumë tërheqëse. Mirëpo për shkak të pozitës së ulët të ekipit kinez të hendbollit në botë, ky sport nuk është aq i përhapur në Kinë. Gjatë këtij turneu, interesimi i madh e shikuesve më gëzoi pa masë. Nëse kjo prirje do të vazhdojë dhe do të zgjerohet, mendoj se hendbolli do të ketë patjetër një zhvillim të madh në Kinë." (Wang Lei) (Artan)