Në gjysmën e dytë të shekullit të 19-të, ndërsa sistemi feudal kinez, që zgjati më shumë se 2000 vjet, po shkonte drejt fundit të tij, vendet kapitaliste perëndimore zhvilloheshin shpejt dhe bënin pandërprerë ekspansion duke u mbështetur në armatimet e tyre të përparuara. Kina, që kishte mbetur prapa, u bë objektiv i rivalitetit të fuqive perëndimore dhe, më në fund, ra në një shoqëri gjysmë-koloniale dhe gjysmë-feudale. Doktor Sun Jat Seni, që jetoi në atë epokë, dha kontribut të shquar në kauzën për t'i dhënë fund sistemit feudal kinez.

Sun Jat Seni lindi në vitin 1866 në familjen e një fshatari të provincës Guangdong të Kinës Jugore. Në atë kohë, për shkak të vështirësive në jetesë, mjaft fshatarë të bregdetit jugor të Kinës u detyruan të shkonin në kurbet. Ndër ta ishte edhe vëllai i madh i Sun Jat Senit, Sun Mei, i cili braktisi shtëpinë që në moshën e rinisë dhe korri sukses në SHBA. Më vonë, ai e mori atje edhe vëllanë e tij, Sun Jat Senin. Kështu, kur ishte 13 vjeç, Sun Jat Seni filloi arsimimin sistematik perëndimor në SHBA, ku përqafoi ideologjinë borgjeze perëndimore.

Në vitin 1894, Sun Jat Seni dhe disa intelektualë të tjerë erdhën në Pekin dhe i dërguan dinastisë feudale një mesazh, në të cilin shfaqën shpresën se qeveria mund të bënte reformë. Por ata mbetën të dëshpëruar. Sun Jat Seni kuptoi se vetë sistemi feudal ishte pengesa më e madhe e reformës dhe se përmbysja e sundimit feudal kërkonte veprime revolucionare në përmasa të mëdha. Kështu, ai formoi "Ligën e Rilindësve Kinezë" në gjirin e emigrantëve kinezë në SHBA dhe parashtroi synimin për përmbysjen e dinastisë feudale, duke hapur prologun e revolucionit borgjez kinez, të udhëhequr prej tij.

Që nga viti 1907, Sun Jat Seni organizoi dhe udhëhoqi mbi 10 kryengritje të armatosura në krahinat jugperëndimore të Kinës. Por shumica e tyre u shtypën, sepse ende ishin të dobëta forcat revolucionare borgjeze, të porsalindura. Si pasojë, Sun Jat Seni u ndodh për arrest me urdhrin e autoriteteve, prandaj ai iku në mërgim përtej detit. Deri sa në vitin 1911, kryengritja e armatosur, e udhëhequr nga Sun Jat Seni, korri suksesin e fundit, duke përmbysur regjimin e dinastisë Qing, që sundoi në Kinë për afro 300 vjet, dhe duke i dhënë fund shoqërisë feudale kineze, që zgjati mbi 2000 vjet.

Gjatë gjithë jetës së tij, si një revolucionar, Sun Jat Seni luftoi për krijimin e një shoqërie demokratike të bazuar në drejtësinë shoqërore. Ai bënte një jetë të thjeshtë dhe ishte i afrueshëm me popullin. Ai luftoi për lirinë dhe barazinë e Kinës derisa u nda nga ne në vitin 1925 në Pekin.

Sun Jat Seni gëzonte dashurinë e popullit kinez në kohën e tij, gëzon edhe sot respektin e brezave të mëvonshëm. Edhe Partia Komuniste e Kinës i vlerëson lart meritat e tij të mëdha. Në disa krahina të Kinës, në Japoni, SHBA dhe vende të tjera, ku jetoi Sun Jat Seni, edhe sot ruhen muze dhe monumente në kujtim të tij. Çdo vit, në kuadrin e festës kombëtare të Kinës, në sheshin "Tianamen" të Pekinit ngrihet portreti i tij me përmasë të madhe. Në vitin 2006, në kuadrin e 140-vjetorit të ditëlindjes së Sun Jat Senit, në krahina të ndryshme të Kinës u organizuan aktivitete të shumëllojshme për kujtimin e meritave të tij të mëdha. (Zheng)