dëgjoni

Ju flet Radio e Jashtme e Kinës! Të dashur dëgjues, unë jam Pina, ju përshëndes nga Pekini. Në programin e sotëm të këngëve popullore kineze do të vazhdoj t'ju paraqes këngët popullore të kombësisë kazake.

Të dashur dëgjues, kënga që po ndiqni është një këngë popullore kazake me titull "Laureshë, këngëtare e bukur". Kjo këngë është e gëzueshme dhe me ritme të shpejta, ajo i këndon laureshës këngëtare, duke shprehur dashurinë e popullit kazak për jetën dhe vendlindjen.

Këngët dhe kuajt janë dy krahët e kazakëve, jetën e kazakëve e shoqërojnë gjithmonë tingujt e këngëve dhe veglës muzikore tradicionale dunbula. Foshnjat e porsalindura duhet t'i presin 3 herë rrezet e diellit mëngjesor në mes të tingujve të këngës dhe të dëgjojnë urimet e njerëzve me këngë. Kur një kazak mbaron rrugën e jetës dhe po ndahet nga bota njerëzore, të tjerët duhet t'i këndojnë atij, duke kujtuar biografinë dhe virtytet e tij. Prandaj poeti i kombësisë kazake Abai ka thënë kështu: "Poezia dhe kënga ua kanë hapur foshnjave portën e jetës, dhe gjithashtu e shoqërojnë të vdekurin në rrugën për në botën qiellore."

Kombësia kazake ka letërsi dhe muzikë të pasur popullore, artistët popullorë që këndojnë e trashëgojnë posaçërisht këto vepra quhen "Aken" dhe respektohen e pëlqehen shumë nga të gjithë. Për të çuar përpara këtë art popullor të kombësisë kazake dhe për të pasuruar jetën kulturore të banorëve, në verë e vjeshtë të çdo viti organizohen "Shfaqjet e këngëtarëve aken" në përmasa të ndryshme. Në këto shfaqje vijnë blegtorët nga qindra kilometra larg, me qerre ose të hipur në kalë. Këngëtarët aken ngjiten njëri pas tjetrit në skenë për të treguar aftësinë e tyre. Tregimet prekëse, këngët e bukura dhe tingujt e këndshëm të veglës muzikore dunbula e zhytin stepën dikur të qetë në një det të madh të gëzimeve.

Këngët popullore të kazakëve, të cilët merren kryesisht me blegtori, janë të shtruara dhe të larta e karakterizohen nga atmosfera e theksuar e stepës. Një nga këngët popullore të tilla të famshme, që do të ndiqni tani, titullohet "Mayila". "Mayila" është emri i një vajze kazake. Sipas gojëdhënave, ajo ishte shumë e bukur dhe e aftë për të kënduar, blegtorët shkonin shpesh pranë çadrës së saj për të dëgjuar këngët e saj të bukura si të bilbilit. "Të gjithë më quajnë Mayila, këngëtarja Mayila ...", që në fillim të këngës shprehet karakteri i hapur e i gjallë i vajzës. Ashtu si të gjitha këngët e tjera kazake, pjesa e dytë e kësaj kënge me melodi të lehtë e të shpejtë e përshkruan me përpikmëri figurën e vajzës së bukur e naive.

"Të gjithë më quajnë Mayila, poete Mayila, kam dhëmbë të bardhë e zë të mirë. Kur jam e gëzuar, këndoj një këngë duke i rënë dumbula-së, kalimtarët grumbullohen pranë çadrës sime. Kazakët e rinj më admirojnë shumë."

Në fund të programit të sotëm, ju ftoj të shijojni këngën tjetër popullore kazake të përhapur gjerësisht me titull "Lulja ime". Kjo këngë i këndon vajzës së bukur kazake dhe shpreh dashurinë e thellë të djalit kazak për vajzën e zemrës. Në këngë thuhet: "O moj vajzë e xhanit, sa i dashur është emri yt, kur të shoh ty, më kënaqet zemra. Ti je si det, unë jam një pulëbardhë që fluturon gjithmonë mbi sipërfaqen e detit. Megjithëse sapo jemi takuar, kam rënë në dashuri, vajza e bukur, lulja ime."

Ju flet Radio e Jashtme e Kinës! Të dashur dëgjues, ndoqët një grup këngësh popullore të kombësisë kazake. Mirudëgjofshim të shtunën tjetër. Në mikrofon për ju, Pina.