Lagjja artistike 798 është një bazë e industrisë kulturore të Pekinit. Ashtu si në këtë lagje, edhe në lagjet Sunzhuang dhe Huajiadi të Pekinit janë grumbulluar qindra piktorë, ndërsa në distriktin Shëjinshan të Pekinit po ndërtohet një qendër pushimi e dëfrimesh dhe një bazë e filmave multiplikativë.

Duke parë perspektivën e madhe të industrisë kulturore, Bashkia e qytetit të Pekinit ka krijuar posaçërisht "Grupin drejtues të industrisë së krijimeve kulturore" për studimin dhe shqyrtimin e politikave, investimeve dhe objekteve të rëndësishme të industrisë së krijimeve kulturore, duke shpallur një sërë masash inkurajuese, si krijimin e fondit të posaçëm me 500 milionë juanë në vit në ndihmë dhe përkrahje të zhvillimit të industrisë së krijimeve kulturore dhe për ndërtimin e lagjeve kryesore të përqendrimit të artistëve.

Zv.kryebashkiaku i Pekinit Ji Lin tha se sektorët e shërbimeve prodhuese me industrinë e krijimeve kulturore si përmbajtje kryesore janë bërë një shtyllë kryesore e zhvillimit ekonomik dhe industria me potencial më të madh në Pekin."Gjendja e përgjithshme e zhvillimit ekonomiko-shoqëror të Pekinit është e mirë dhe në zhvillim të shpejtë, është vënë theksi në përsosmërinë e strukturave dhe është formuar në përgjithësi një strukturë industriale me tipin shërbimor si përmbajtje kryesore. Cilësia dhe efikasiteti i zhvillimit janë në rritje graduale, pra administrata, ndërmarrjet dhe banorët po gëzojnë së bashku rezultatet e reformës dhe të zhvillimit ".

Siç mësohet, në vitin 2006, përqindja e vlerës së sektorëve të shërbimeve me karakter prodhues të Pekinit e ka kaluar 7 % të prodhimit të përgjithshëm bruto të gjithë qytetit të Pekinit, ndër to, industria e krijimeve kulturore përbën më se 50%. Sipas planifikimit të Bashkisë së Pekinit, deri në vitin 2010, në gjithë qytetin numri i lagjeve të përqendrimit të sektorëve të industrisë së krijimeve kulturore do të arrijë në 30, gjë që do të rritë më tej përqindjen e industrisë kulturore në GDP dhe do ta bëjë këtë industri një nga sektorët kryesorë të ekonomisë së Pekinit. ( Zhai) (Artan)