dëgjoni

Në qoftë se jeni një adhurues i artit, nëse vizitoni Pekinin, lagjja artistike 798 është një lagje ku duhet të shkoni patjetër. Në këtë lagje janë mbledhur qindra artistë, piktorë, skulptorë, projektues dhe fotografë etj., pra artistë të të gjitha arteve. Kjo lagje po bëhet tani një nga bazat e rëndësishme të industrisë së kulturës të Pekinit.

Ju ftojmë të dëgjoni tani reportazhin me titull: "Industria e krijimeve kulturore e Pekinit është në zhvillim të shpejtë".

Lagjja artistike 798 ndodhet në rajonin afër aeroportit ndërkombëtar "Shoudu" të Pekinit. Në këtë lagje ndodhej më parë një fabrikë e materialeve dhe aparateve të radios. Në vitet '90 të shekullit të kaluar, gjatë ndryshimit të formës së prodhimit të kësaj fabrike, një pjesë e madhe e reparteve mbetën bosh.

Shefi i zyrës administrative të lagjes artistike 798, z. Chen Yongli, tha se kjo zonë e industrisë së vjetër u lidh rastësisht me artin dhe filloi të rigjallërohet. "Lidhja e kësaj lagjeje me artin filloi në vitin 1996, pikërisht në kuadrin e 60-vjetorit të shpërthimit të luftës së rezistencës kundër pushtuesve japonezë. Atëherë z. Sui Jianguo i Institutit Qendror të Arteve Figurative mori detyrën për organizimin e ekspozitës së një grupi skulpturash të heronjve të luftës së rezistencës kundër pushtuesve japonezë.

Duke kërkuar një vend të madh për vendosjen e këtij grupi të madh skulpturash, ai zgjodhi fabrikën 798. Ai mori me qira një ndërtesë reparti prej 3 mijë metrash katrorë për ekspozitë dhe pas ekspozitës, disa njerëz vazhduan të mbajnë me qira këtë horizont të hapur për krijimtari artistike. Kështu erdhën njëri pas tjetrit artistët këtu për të punuar."

Vitet e fundit, Bashkia e Pekinit i ka kushtuar një rëndësi të madhe zhvillimit të industrisë së kulturës duke e konsideruar konceptin e "Lojërave Olimpike Humanitare" si një nga konceptet e organizimit të Lojërave Olimpike të Pekinit të vitit 2008. Në këto rrethana, lagjja 798 filloi një zhvillim të shpejtë. Shefi i zyrës administrative të lagjes artistike 798, z. Chen Yongli, tha."Në fund të vitit 2005, Bashkia e Pekinit paraqiti mendimin për zhvillimin në qytet të industrisë së krijimeve kulturore.

Në atë kohë, pas zhvillimit disavjeçar, lagjja 798 u bë me famë ndërkombëtare dhe pas hetimeve dhe inspektimeve, liderët përkatës shprehën mendimin se kjo lagje 798 ka arriturnë zhvillimin e të orientuar nga planifikimi dhe mund të bëhet një kartëvizitë e qytetit të Pekinit. Në vitin 2006, lagjja 798 u përcaktua si lagjja e përqendrimit të industrisë së krijimeve kulturore të qytetit të Pekinit."

Tani në lagjen artistike 798 janë grumbulluar një numër i madh artistësh të njohur bashkëkohorë kinezë. Të dhënat statistikore tregojnë se deri në fund të korrikut të vitit 2007, në këtë lagje ishin vendosur 354 institucione të industrisë së krijimeve kulturore, ndër të cilat galeri pikturash, zyra private, studio fotografie, institucione për incizimin dhe prodhimin e muzikës, për prodhimin e programeve televizive, institucione të projektimeve dhe të këshillave etj.

Lagjja artistike 798 me komunikacion të zhvilluar dhe me mjedis të mirë është bërë tani një lagje artistike e njohur në botë. Zonja Chen Linghui nga Tajvani ka hapur këtu një galeri pikture, ajo është e mendimit se lagjja 798 mund të krahasohet me lagje të njohura artistike të Nju-Jorkut të SHBA-së.

"Në vitin 1994, unë erdha në Pekin për t'u takuar me një profesor të Institutit të Arteve Figurative, atëherë mendoja të hapja një galeri artesh në Shangai. Pasi vizitova lagjen 798, u mahnita dhe mendova se duhej të kisha ardhur më parë. Kjo lagje është shumë e ngjashme me lagjen artistike SOHO të Nju-Jorkut nga ana e përmasave, e cilësisë dhe e shumëllojshmërisë."

( Zhai) (Artan)