dëgjoni

Në fund të viteve 80 të shekullit të 20-të, fshatarët në periferi të qytetit Shouguang të provincës Shandong të Kinës Lindore filluan kultivimin e perimeve në serra, duke i dhënë fund historisë së mosprodhimit të perimeve në dimër në këtë krahinë. Si rezultat, fshatarët e këtushëm korrën fitime të konsiderueshme. Edhe Zhang Yansiang, që nuk kishte mësuar shumë në shkollë, gjithashtu filloi ekonominë e kultivimit të perimeve në serra. Mirëpo, që në vitin e parë, pikërisht në prag të vjeljes, te domatet e tij u shfaq papritur një lloj sëmundjeje dhe ai mbeti i hutuar, sepse nuk kishte aspak përvojë në këtë drejtim. Rrjedhimisht, domatet e tij u dëmtuan plotësisht dhe kjo gjë i solli atij një humbje shumë të madhe. Pas këtij dështimi, ai filloi të mësojë me zell njohuritë dhe teknologjitë e kultivimit të perimeve.

"Të mbash me sukses perimet nuk është një punë e thjeshtë, sepse edhe kjo punë kërkon teknikë dhe njohuri. Për këtë qëllim, nisa të lexoj librin mësimor 'Botanika' të shkollës së mesme, gjë që ma shtoi interesin. Më pas, për të përvetësuar teknologjitë përkatëse, fillova të lexoj edhe disa libra përkatës të shkollave të larta, të Institutit të Agronomisë të Laiyangut dhe të Universitetit të Agronomisë të Shandongut."

Në vitin e dytë, Zhang Yansiang mbolli dy serra me domate dhe trangull. Meqë kishte përvetësuar mirë teknologjitë përkatëse, ai korri prodhim të bollshëm po në atë vit. Që nga ajo kohë, ai vazhdoi mësimin në praktikë dhe korri prodhim të bollshëm për disa vjet me radhë, duke pasuruar kështu edhe jetën e familjes së tij. Duke kërkuar në praktikë, ai krijoi një kompleks teknologjish të diagnostikimit të sëmundjeve te bimët. Për arritjet e tij, administrata krahinore i dha atij titullin e agronomit të lartë.

Në mes të viteve 90 të shekullit të kaluar, praktika e kultivimit të perimeve në serra u përhap në shumë krahina të tjera të Kinës dhe gjithnjë e më shumë fshatarë kinezë filluan të merren me këtë ekonomi. Qeveria kineze dhe administratat e krahinave të ndryshme inkurajuan dhe përkrahën personelin agroteknik të ndihmojë fshatarët që janë të dobët në mbrojtjen e perimeve të serrave nga sëmundjet. Kështu, Zhang Yansiang mori përsipër detyrën për të ndihmuar kultivuesit e perimeve dhe u quajt "Mjeku i perimeve ".

Në vitin 2002, me përkrahjen e administratës krahinore, ai hapi "Ambulancën e perimeve", që është i pari institucion i këtij lloji në Shouguang. Që nga ajo kohë, rrjedha njerëzish vijnë për të kërkuar ndihmë. Ndër ta janë edhe kultivues perimesh nga krahina të largëta. Fshatari Fu Shyeliang thotë se ai i është mirënjohës Zhang Yansiangut, sepse ka disa vjet që vjen këtu për të kërkuar ndihmë.

"Me hapjen e ambulancës së tij të perimeve, zoti Zhang na krijoi lehtësira të mëdha. Më parë, kur shfaqej sëmundje te perimet, ne pësonim humbje në prodhimtari dhe në të ardhura, kurse tani kemi siguruar prodhimtarinë e cilësinë e perimeve dhe i shesim shpejt."

Në vitin 2004, në qytetin Shouguang u formua një shoqatë e parandalimit e mjekimit të sëmundjeve te perimet dhe Zhang Yansiang u zgjodh kryetar i saj. Që nga ajo kohë, të organizuar nga administrata krahinore, specialistët dhe personeli teknik i kësaj shoqate shkojnë fshat më fshat për të ndihmuar fshatarët në parandalimin dhe mjekimin e sëmundjeve të perimeve. Ata propagandojnë njohuritë tekniko-shkencore të bujqësisë me anë të foto-ekspozitave dhe kurseve, për të shpejtuar zbatimin dhe përhapjen e teknologjive të reja bujqësore. Në vitin 2005, duke shfrytëzuar 100 mijë juanët që investoi Drejtoria e Bujqësisë e provincës Shandong, Zhang Yansiang bleu një kompjuter, një mikroskop, një kamerë regjistruese dhe aparate të tjera, me të cilat krijoi "Sistemin e video-frekuencës të tele-terapisë së perimeve". Kështu, ai u bë "Mjeku i perimeve" për kultivuesit e perimeve të krahinave të mbarë vendit.

"Ne kemi grumbulluar një farë përvoje në parandalimin dhe mjekimin e disa sëmundjeve të vështira të perimeve. Kurse në provincat Liaoning, Henan, Hebei, Gansu dhe zona të tjera, mungojnë njohuritë për zhvillimin e ekonomisë së perimeve. Prandaj kultivuesit e perimeve në ato zona nuk marrin masa për të mjekuar në kohë ose nuk përdorin drejt ilaçet. Këto gabime sjellin humbje të madhe. Ne përcaktojmë diagnozën e saktë të sëmundjeve nëpërmjet sistemit të video-frekuencës dhe japim recetën sipas përvojës sonë, prandaj i ndihmojmë fshatarët për pakësimin në maksimum të humbjeve ekonomike."(Zheng)