dëgjoni

Shangai është një nga qytetet e mëdha të ndërkombëtarizuara në Kinë dhe gjithashtu një nga qytetet kineze me ekonominë më të lulëzuar. Ndërkohë, tjetër arsye kryesore që Shangai ka zgjeruar shpejt ndikimin ndërkombëtar është që ai u bë qytet bashkërendues olimpik dhe ka organizuar një sërë veprimtarish sportive të nivelit të lartë, si Lojërat Olimpike Speciale Verore, Çmimin e madh të Formulës 1 në Kinë, Kupën e Mjeshtërve të Tenisit etj. Në minirubrikën "Drejt Olimpiadës 2008", do të dëgjoni një reportazh lidhur me këtë.

Me zhvillimin ekonomik dhe përparimin shoqëror, qytetarët e Shangait filluan të tregojnë vëmendje se si t'u shfaqin arritjet e tyre sa më shumë njerëzve dhe si të ngrihet forca ndikuese e tërë qytetit. Banorët e zgjuar të Shangait zbuluan sportin, këtë mënyrë të shkëmbimit pa pengesë kufiri dhe gjuhe. Pasi Pekini fitoi në vitin 2001 të drejtën e organizimit të Lojërave Olimpike 2008, Shangai mori me konkurrencë të drejtën e zhvillimit të një pjese ndeshjesh futbolli të këtyre lojërave. Në shtator të vitit 2007, u zhvillua në Shangai edhe Kupa e Botës në Futbollin e Femrave. Banorët e Shangait besojnë se nëpërmjet futbollit, këtij sporti të parë në botë, bota do ta ndjekë qytetin e tyre me më shumë vëmendje.

Në fakt, rrugën e formimit të figurës së qytetit nëpërmjet veprimtarive sportive të nivelit të lartë, Shangai e ka kërkuar për një kohë të gjatë. Kupa e Mjeshtërve të Tenisit 2002 me Shangai mund të konsiderohet si fillimi i kësaj rruge të kërkimit. Sipas z. Qiu Weichang, zv/drejtori i Drejtorisë së Fizkulturës dhe të Sporteve të Shangait, atëherë pati mosmarrëveshje nëse do të zhvillohej Kupa e Mjeshtërve në Shangai. Ai tha:

"Koncepti i mëparshëm ishte që zhvillimi i veprimtarive sportive ka për qëllim që të shtojë shkëmbimet midis sportistëve kinezë me ata të huaj dhe që të nxitë ngritjen e rezultateve të tyre. Ndërsa në Kupën e Mjeshtërve të Tenisit s'ka asnjë sportist kinez, kjo do të thotë që të shpenzojmë fonde kolosale për krijimin e një platforme të shfaqjes për sportistë të huaj. Ku ndodhet vlera e këtij veprimi? A mund të tërheqë vëmendjen e njerëzve? Me dyshime të shumëllojshme, u hap Kupa e Mjeshtërve."

Faktet e mëvonshme vërtetojnë se zhvillimi i Kupës së Mjeshtërve të Tenisit ka luajtur rol të papërfytyrueshëm për ngritjen e famës së Shangait. Sipas një sondazhi, media dhe publiku evropian e amerikan treguan më shumë vëmendje për Kupën e Mjeshtërve të Tenisit 2002 në Shangai se për Samitin e APEK-ut të zhvilluar në vitin 2001 në Shangai. Duke folur për këtë, zv/drejtori Qiu tha me emocion:

"Më vonë ndiem se veprimtaritë sportive të rëndësishme ndërkombëtare janë gjithashtu kartëvizitë për qytetin tonë."

Zv/drejtori Qiu na shtjelloi një tjetër tregim interesant. Në vitin 2006, funksionari i Bashkisë së qytetit të Shangait Yang Xiaodu takoi në Gjermani një shofer që nuk kishte ardhur në Kinë asnjëherë, por ky shofer e lavdëroi bukurinë e Shangait. Kjo e habiti shumë zotin Yang dhe ai e pyeti për arsyen. Në fakt shoferi ishte tifoz i F1, dhe të gjithë tifozët gjermanë e shikuan atë dyluftim të ashpër klasik midis Shumaherit dhe Alonsos në turneun e Shangait të Formulës Një në sezonin 2006. Gjatë transmetimit të garës, u paraqitën edhe panorama të bukura urbanistike të Shangait, gjë që u la përshtypje të thella gjermanëve.

Banorët e Shangait, që shijuan ëmbël, forcojnë besimin për krijimin e figurës së qytetit nëpërmjet veprimtarive sportive. Në tetor 2007 në Shangai u zhvilluan Lojërat Speciale Olimpike Verore, ndërsa në vitin 2011 do të zhvillohet këtu edhe Kampionati Botëror i Notit. Gjatë një interviste për korrespondentin e radios sonë, kryetari i Bashkisë së qytetit të Shangait Han Zheng u shpreh se do të vazhdojë idenë dhe mënyrën e veprimeve ekzistuese.

"Mendoj se Shangai, një qytet i tillë i hapur ndërkombëtar, duhet të mishërojë figurën e re të vendit tonë dhe figurën e vet pas reformës e hapjes nëpërmjet organizimit të këtyre veprimtarive sportive."

Figura e një qyteti, në fund të fundit, është figura e banorëve të tij. Kryetari i Bashkisë së Shangait Han Zheng theksoi "të renë" e figurës, por ai e kupton se pamja e re është vetëm në sipërfaqe dhe vetëm shpirti i ri i banorëve është thelbi i figurës së re. Këto vite, Shangai i është përkushtuar përgatitjes së yjeve të veta sportive. Ylli i njohur kinez i NBA-së Yao Ming, vrapuesi Liu Xiang, që mban rekordin botëror të vrapimit 110 metra me pengesa, futbollistja më e shquar e shekullit Sun Wen etj., që të gjithë janë nga Shangai, ndërsa veprimet e thëniet e këtyre yjeve pasqyrojnë shpirtin e ri të banorëve të Shangait në etapën e re.

Zv/drejtori Qiu tha me krenari se tani, duke folur për banorët e Shangait, mendja të shkon natyrisht te "gjatësia e Yao Mingut" dhe "shpejtësia e Liu Xiangut". Në fakt ata disponojnë jo vetëm gjatësi dhe shpejtësi, por edhe forcën tërheqëse si njerëz të shquar.

"Mendojmë se gjatë këtyre vjetëve, dhe veçanërisht pas reformës dhe hapjes, në procesin e zhvillimit të Shangait karakteristika thelbësore e banorëve të Shangait mishërohet në këtë brez të ri. Njëkohësisht paraqitja e tyre, si përfaqësues të figurës së qytetit, ka inkurajuar më shumë sportistë e trajnerë të përpiqen në këtë drejtim."

Sporti jo vetëm ka përmirësuar figurën e qytetit të Shangait, por edhe ka ndryshuar figurën e banorëve të tij. Zgjedhja e një rruge të tillë është zgjuarsia e banorëve të Shangait. (Wang Lei) (Artan)