Në materialet historiografike kineze, janë shënuar mjaft tregime për dashurinë e monarkëve të shoqërisë feudale. Kurse tregimi i kësaj teme, i përhapur më gjerësisht në popull, është tregimi i shekullit të 8-të për dashurinë e perandorit Li Long-gji të dinastisë Tang me konkubinën e tij fisnike, Jang Yuhuan. Skenaristi i njohur kinez i kohës së dinastisë Qing, Hong Sheng, korri sukses të madh pikërisht në krijimtarinë letrare me dashurinë e këtij perandori si temë.

Hong Sheng lindi në vitin 1645 në kohën e dinastisë Qing. Qysh në kohën e fëmijërisë, ai u edukua me doktrinat ortodokse konfucianiste dhe tregoi herët talentin e tij në letërsi. Mirëpo, për arsye të kontraditave të familjes, që në moshën 20-vjeçare ai u detyrua të jetonte duke u mbështetut në shitjen e vjershave të tij. Në Kinën e lashtë, poezia zinte një pozitë shumë të lartë dhe, që në nismën e saj, poezia në gjuhën han ishte e lidhur ngushtë me muzikën dhe me koreografinë, gjë që u dha poetëve mundësi të jetonin me shitjen e veprave të tyre poetike, që përdoreshin për të shoqëruar këngët dhe vallet. Në gjithë jetën e tij, Hong Sheng krijoi një numër të madh vjershash, por gjëja që hodhi bazat e pozitës së tij në historinë e letërsisë kineze ishte krijimi i skenarit "Në pallatin e Jetëgjatësisë".

Në skenarin e tij me temë historike "Në pallatin e Jetëgjatësisë", autori përshkroi një tablo të gjerë të jetës shoqërore, me dashurinë e perandorit Li Long-gji të dinastisë Tang të shekullit të 8-të me konkubinën e tij Jang Yu-huan si vijë e kuqe. Duke e lidhur qëllimisht dashurinë e perandorit me turbullirat shoqërore të asaj kohe, autori trajtoi jetën luksoze të një monarku, që ishte dhënë pas dashurisë me konkubinën e tij, pa pyetur fare çështjet shtetërore, gjë që çoi në rënien e moralit në oborrin perandorak dhe në tragjedinë e dashurisë së tij. Në këtë vepër, autori përshkroi në mënyrë të gjallë edhe realitetin e kontradiktave të acaruara dhe të ndërlikuara shoqërore dhe të luftës politike të saj kohe.

Por për fat të keq, krijimi me sukses i këtij skenari jo vetëm që nuk i solli autorit përmirësimin e mjedisit të jetesës, por përkundërzi, i solli atij fatkeqësi më të madhe. Puna ishte se, pjesa teatrale "Në pallatin e Jetëgjatësisë" vazhdonte të shfaqej edhe në ditët e homazhit kombëtar për kujtimin e ndjerës perandoreshë, gjë që nuk përputhej me atmosferën aktuale. I akuzuar vetëm për këtë incident, autori i skenarit "Në pallatin e Jetëgjatësisë", Hoing Sheng, u burgos së bashku me disa të tjerë. Në kohën kur ai u lirua dhe doli nga burgu, vepra e tij "Në pallatin e Jetëgjatësisë" ende mirëpritej gjerësisht në shoqëri. Mirëpo atij i dukej se mirëpritja e veprës së tij në shoqëri nuk kishte asnjë lidhje me të. Ai vazhdoi të donte me pasion të madh krijimtarinë letrare, duke krijuar vjersha dhe duke kompozuar melodi. Por ai bënte një jetë të pafrenueshme dhe të mjeruar. Një ditë, tek po ecte i dehur, ra nga pakujdesia në ujë dhe u mbyt.

Gjatë shekujve të fundit, pjesa teatrale "Në pallatin e Jetëgjatësisë" është shfaqur dhe shfaqet në llojet e ndryshme të pjesës teatrale të krahinave të ndryshme të Kinës, çka ka qenë mënyra më e mirë e kujtimit të këtij skenaristi të shquar kinez nga brezat e mëvonshëm. (Zheng)