Ju po dëgjoni zërin e incizuar nga korrespondenti ynë në auditorin e leksionit të rusishtes të Universitetit të Sinkiangut të Kinës. Ajo që mban leksionin është pedagogia ukrainase Aleksandra Kovaliova, e cila ka 16 vjet që punon në Kinë për mësimdhënien e rusishtes. Me punën e vet të shkëlqyeshme, ajo fitoi çmimin e "Miqësisë së specialistëve të huaj", çmimi më i lartë shtetëror që qeveria kineze u jep specialistëve të huaj të ardhur për punë në Kinë.

Aleksandra Kovaliova erdhi për të punuar si specialiste e rusishtes në një shkollë të lartë të qytetit Si-an të Kinës qysh në fillim të viteve 90 të shekullit të 20-të, e dërguar nga Ministria e Arsimit të Lartë e ish-Bashkimit Sovjetik. Pas 3 vjet pune në Si-an, ajo u ftua për punë në shkolla të larta të qytetit Shangai të Kinës Lindore dhe të qytetit Tiancin të Kinës Veriore. Në vitin 2002, ajo erdhi për të punuar në Universitetin e Sinkiangur të Kinës Veriperëdimore. Mund të themi se ajo ka lënë gjurmë pothuajse në gjysmën e Kinës.

Çdo vit, me rastin e Vitit të Ri, Universiteti i Sinkiangut organizon mbrëmje artistike të shfaqjes së dramave në gjuhë të huaja. Në këto raste, pedagogia Aleksandra Kovaliova u kërkon studentëve të saj që të krijojnë dhe të shfaqin vetë një dramë në gjuhën ruse. Vitin e kaluar, në mbrëmjen artistike me rastin e Vitit të Ri, të drejtuar nga ajo, studentët e grupit të rusishtes adaptuan përrallën e njohur të vëllezërve Grimit të Gjermanisë "Kësul kuqja" dhe shfaqën një dramë në rusishte me të njëjtin titull. Meqë ata fituan çmimin e dytë të shfaqjes së dramave në gjuhë të huaja, u stimulua shumë entuziazmi i studentëve për të përvetësuar sa më mirë gjuhën ruse.

"Ata nuk kanë një kohë të gjatë që mësojnë rusishten, megjithatë kanë filluar të përgatisin vetë dramë në gjuhën ruse. Unë përpiqem t'i ndihmoj ata, sepse ky është një gëzim i madh për mua. Edhe ata me gëzim të madh pranojnë ndihmën time. Meqenëse ata ende nuk kanë njohur mirë gjuhën dhe letërsinë ruse, unë u mësoj atyre edhe përdorimin e gjuhës së gjesteve. Pak nga pak, atyre u rritet interesi për gjuhën ruse. Më duket se ky është një proces i pashmangshëm."

Vitet e fundit, krahas shtimit të lidhjeve tregtare të rajonit Sinkiang me Rusinë dhe me vendet e Azisë Qendrore, është shtuar shpejt numri i kinezëve që mësojnë rusishten. Mirëpo në këtë rajon është i pamjaftueshëm numri i pedagogëve të nivelit të duhur të rusishtes. Mënyra e mësimdhënies së Aleksandra Kovaliovës luajti një rol shpejtues në përgatitjen e pedagogëve të rusishtes dhe në ngritjen e nivelit të tyre.

Në vitin 2003, 1 vit pas ardhjes së saj për punë në Sinkiang, administrata e rajonit autonom Sinkiang-ujgur i dha Aleksandra Kovaliovës "çmimin e malit Tianshan", për të lavdëruar kontributin e saj për mësimdhënien e rusishtes në Kinë. Kurse vitin e kaluar, ajo fitoi "Çmimin e miqësisë së specialistëve të huaj". Ajo erdhi në Pekin dhe mori nga duart e kryeminisrit të Kinës Ven Gja Bao certifikatën e këtij çmimi, duke u bërë e vetmja fituese e çmimit të këtij lloji në gjithë sektorin arsimor të rajonit autonom Sinkiang-ujgur. Ajo kujtoi me gëzim udhëtimin e saj të jashtëzakonshëm në Pekin.

"Kur mora vesh këtë lajm, mbeta e habitur dhe e gëzuar. Kryeministri Ven Gja Bao na falënderoi për kontributin tonë në zhvillimin e Kinës. Me emocion të madh dola në fotografi së bashku me të. E ruaj mirë këtë fotografi të çmuar."

Tani Aleksandra Kovaliova afro 60-vjeçare e quan veten "gjysmë-kineze" dhe thotë se gjatë 16 vjetëve ka parë me sytë e vet ndryshimet e mëdha që kanë ndodhur në shoqërinë kineze. Ajo thotë se e do shumë këtë vend.

"Unë kam qenë në disa qytete të Kinës. E dua shumë Kinën e sotme. Në Kinë, gjëja që më tërheq më shumë është hapja e saj dhe zhvillimi i saj i shpejtë ekonomik. Këtu zhvillohet shpejt gjithçka dhe kudo bëhet ndërtim. Edhe qyeti Urumçi dhe shkolla jonë kanë bërë ndryshim shumë të madh."

Aleksandra Kovaliova, e cila ka afro 6 vjet që jeton në qytetin Urumçi, e quan veten banore të Sinkiangut. Zhvillimi i shpejtë i ekonomisë në Sinkiang i ka sjellë asaj dobi reale. Para disa kohësh, ajo me të shoqin u shpërngulën nga një apartment i vogël 40 metrash katrore në një apartament të ri 90 metrash katrore, që ia ofroi Universiteti i Sinkiangut.

Aleksandra Kovaliova thotë shpesh se ajo asnjëherë nuk ka ndër mend të largohet nga puna e saj e këtushme, edhe pse kthehet në atdhe për t'u takuar me të afërmit vetëm në kohën e pushimeve verore. Ajo është e mendimit se përgatitja e kuadrove të rusishtes në Kinë është e dobishme edhe për Kinën, edhe për atdheun e saj. (Zheng)