dëgjoni

Në qarqet sportive ndërkombëtare, ekipi kinez i volejbollit të femrave gëzon prestigj të madh. Që nga vitet `80 të shekullit të kaluar, ky ekip është shpallur 5 herë kampion botëror dhe 2 herë kampion olimpik. Hera e fundit që ky ekip u shpall kampion ishte në Lojërat Olimpike 2004 në Athinë. Mund të them se në Kinë volejbolli është shumë i përhapur, këtu nuk përjashtohet as qyteti Tiancin, një nga 6 qytetet bashkërenduese të Lojërave Olimpike 2008. Në fakt në këtë qytet volejbolli jo vetëm preferohet nga banorët, por ekipi i volejbollit të femrave i Tiancinit është ekipi më i fortë në Kinë dhe nga ky ekip kanë dalë shumë kampione botërore e olimpike. Madje, banorët e Tiancinit e quajnë këtë ekip kartëvizitën e Tiancinit. 

Ndër 12 anëtaret e ekipit kombëtar kinez të volejbollit të femrave, që u shpall kampion në Lojërat Olimpike të Athinës, 3 ishin nga Tiancini. Edhe në ligën e volejbollit të femrave të Kinës, ekipi i Tiancinit ka qenë më i forti. Në sezonin 2006-2007, ai u shpall kampion, për të katërtën herë brenda 5 vjetëve. Po ku ndodhet sekreti i suksesit të volejbollit të femrave të Tiancinit?

Ndoshta do të gjejmë përgjigje pasi të shohim stërvitjet e këtij ekipi. Vështirësia e stërvitjeve të këtyre vajzave është e paimagjinueshme për ne njerëzit e zakonshëm. Trajneri i ekipit të volejbollit të Tiancinit Wang Baoquan u shpreh:

"Për nga kohëzgjatja, 7 a 8 orë në ditë, dhe intensiteti i përgjithshëm i stërvitjes, ekipi ynë është i pari në mbarë vendin. Stërvitemi me rigorozitet të madh, që mishërohet në çdo shërbim dhe kthim të topit. Tjetër arsye është, theksimi tek mbrojtja, që është një teknikë relativisht e vështirë në sportin e volejbollit, por mund të kalisë vullnetin."

Krahas këtyre elementeve, anëtarja e ekipit të Tiancinit dhe gjithashtu kampionia e Lojërave Olimpike të Athinës, Li Shan është e mendimit se solidariteti është tjetër garanci e suksesit të këtij ekipi.

"Fryma e bashkimit dhe e këmbënguljes së kolektivit mishërohet plotësisht në ekipin tonë. Ndjehem me fat që jam në këtë kolektiv."

Si forcë kryesore e volejbollit të femrave të Kinës, ekipi i Tiancinit preokupohet shumë për Lojërat Olimpike 2008. trajneri Wang Baoquan tha me emocion:

"Është një nder dhe krenari e madhe për ne që Tiancini u bë qytet bashkërendues i Lojërave Olimpike. Ne, ekipi i volejbollit të femrave, si një flamur i Tiancinit, do të luajmë rolin tonë në këtë edicion olimpik. Tani në ekipin kombëtar kinez të volejbollit, 3 janë nga Tiancini. Besoj se ato do të paraqitin nivelin e vet në Lojërat Olimpike dhe do të përpiqen për një rezultat të mirë, si shpërblim i përkrahjes së banorëve të Tiancinit ndaj tyre."

Në Lojërat Olimpike të Athinës 2004, 3 anëtaret e ekipit të Tiancinit, Li Shan, Zhang Na dhe Zhang Ping dhanë kontribut për fitimit të medaljes së artë nga ekipi kinez i volejbollit të femrave. Këto vite, nga ekipi i Tiancinit kanë dalë edhe dy lojëtare të forta, Li Juan dhe Wei Qiuyue. Në Turneun e Mjeshtrave të Volejbollit të Zvicrës 2007 (Montreux Volley Masters ? Svitzerland), që quhet "i vogli i Kupës së Botës", ato të dyja morën pjesë si anëtare të ekipit kombëtar të Kinës dhe u shpallën kampion. Krahas këtyre dy të rejave, edhe veteranja Zhang Na vazhdon të mbetet në ekipin kombëtar. Besojmë se me këmbënguljen dhe talentin e tyre, vajzat e ekipit të volejbollit të femrave të Tiancinit do të kenë më shumë raste të hyjnë në ekipin kombëtar dhe të demonstrojnë mrekullinë e tyre në Lojërat Olimpike të Pekinit. (Wang Lei)