Ju flet Radio e Jashtme e Kinës! Të dashur dëgjues, unë jam Pina, ju përshëndes përsëri nga Pekini. Në programin e sotëm të këngëve popullore kineze do t'ju paraqit disa këngë popullore "huaer" të Kinës veriperëndimore, të kënduara nga këngëtari i njohur kinez Zhu Zhonglu.

"Huaer" është një formë e këngëve popullore e përhapur në provincat Qinghai, Gansu, Rajonin Autonom të Ningxia-Huit etj. të Kinës veriperëndimore, e cila ka melodi të caktuar dhe teksti mund të hartohet në çast.

Kënga që ndoqët është një këngë popullore "huaer" me titull "Oshtin në qiell bubullima pranverore". Teksti i këngës është i shkurtër e i gjallë, melodia është e lartë dhe e shtruar. Në këngë thuhet: "Oshtin në qiell bubullima pranverore, kudo në botë kanë çelur lulet e kuqe."

Zhu Zhonglu-i, si "mbreti i këngëve huaer", është shumë i njohur në gjithë pjesën veriperëndimore të Kinës. Por ai e quan veten një "kopshtar". Ai tha se tërë jetën ka jetuar dhe jeton në detin e këngëve "huaer" dhe është një kopshtar punëtor.

Zhu Zhonglu-i ka lindur në vitin 1921 në distriktin Tongzhen të provincës Qinghai. Në moshën 7 vjeç ai filloi të mësojë nga i ati këngët popullore "huaer". Ai ka zë të lartë, kumbues, të pastër dhe natyror. Në vitin 1953, ai mori pjesë në festivalin e parë kombëtar të këngëve dhe valleve popullore, ku këndoi këngët "Vështroj fushën nga mali", "Janë shpërndarë retë e zeza" etj., duke tërhequr qarqet muzikore kineze.

"Vështroj nga mali fushën, në të ka një lule mudan. Është e lehtë për ta parë, por është e vështirë për ta mbledhur". Kjo është kënga "huaer" më e famshme dhe më e përhapur në Kinë. Melodia e saj është shumë e lartë dhe është e vështirë për t'u interpretuar. Këtë këngë e ka regjistruar për herë të parë Zhu Zhonglu-i në vitin 1950 në radio, duke tërhequr vëmendjen e të gjithë dëgjuesve.

Në vitin 1953, Shoqëria kineze e pllakave muzikore regjistroi këngët huaer "Vështroj fushën nga mali" e "Plaku kokëfortë",të kënduara nga Zhu Zhonglu. Kjo është pllaka e parë me këngët popullore "huaer" në historinë e muzikës kineze. Po këtë vit, i ftuar nga zv-drejtori i Konservatorit Qendror, z. Ly Ji, Zhu Zhonglu-i dha mësimin mbi këngët huaer në këtë konservator.

Kënga që ndoqët titullohet "Qeshin lulet buzë malit". Kjo është një këngë e gjallë, e gëzueshme dhe ritmike, e cila shpreh në mënyrë figurative gëzimin e një vajze kur u takua me të dashurin e larguar për një kohë të gjatë.

"Specat dhe hudhrat e skuqura në vaj" është një këngë që këndohet gjatë pushimeve në arë. Kjo këngë "huaer" me melodi të lartë dhe të shtruar është shumë e përhapur. Teksti i saj është i thjeshtë dhe i hapur dhe përshkruan modestinë e popullit punëtor. Në këngë thuhet: "Në ditët e korrjes së grurit, hamë bukë me speca dhe hudhra të skuqura në vaj. Pas një ditë lufte për të marrë drithëra nga goja e dragoit, kërcejtë e grurit janë grumbulluar si mal, këndojmë një këngë huaer nga gëzimi."

Në vitin 1956, z. Zhu Zhonglu dhe kompozitori Ly Bing krijuan këngën "Lulet dhe djemtë", shumë e njohur brenda e jashtë vendit. Gjatë 50 vjetëve kjo këngë është interpretuar vazhdimisht, duke u bërë një vepër klasike në thesarin e muzikës popullore kineze.

Në fund të programit të sotëm ju ftoj të shijoni këngën "Lulja mudan i bardhë është në gjumë". Kjo këngë e lehtë dhe elegante i këndohet së dashures, ajo shpreh plotësisht butësinë e dashurinë e një djali për vajzën e tij.

Ju flet Radio e Jashtme e Kinës! Të dashur dëgjues, ndoqët një grup këngësh popullore të Kinës veriperëndimore. Mirudëgjofshim të shtunën tjetër. Në mikrofon për ju, Pina.