dëgjoni

Ju flet Radio e Jashtme e Kinës. Të dashur dëgjues, në rubrikën e sotme "Shkenca, arsimi dhe shëndetësia" do të japim reportazhin me titull "Kanë dalë feniksë të artë nga malet", në të cilin do të flasim për fëmijët e fshatarëve të disa krahinave të Kinës Jugperëndimore që kanë dalë nga zonat e tyre malore për të mësuar në shkolla të mesme të qytetit.

Vajza 14-vjeçare Fu Çin është nga mali Longquan, që gjendet në periferi të qytetit Çengdu të Kinës Jugperëndimore. Qysh në kohën kur ajo filloi të mësonte në një shkollë fillore në zonën e tyre malore, prindërit e saj u larguan nga shtëpia për të punuar përkohësisht në qytet dhe ajo me motrën e saj të vogël mbetën në shtëpi për të jetuar me gjyshin dhe gjyshen. Në ditët para mbarimit të shkollës fillore, ajo shqetësohej shumë, sepse në fshatin e tyre malor nuk ka shkollë të mesme, ndërsa rruga për të shkuar në shkollën e mesme më të afërt mban 1 orë e 30 minuta më këmbë. Pikërisht në kohën kur ajo ishte e shqetësuar, mësuesi i saj kujdestar solli një lajm të mirë.

"Mësuesi ynë kujdestar tha se tani qeveria e vendit tonë ka filluar të ndjekë një politikë favorizuese për ne, fëmijët e malësive. Ai tha se mjafton që të mësojmë me zell, ne mund të mësojmë falas në shkolla të mesme të qytetit, sepse në zonat tona ka filluar zbatimi i planit të 'Feniksëve të artë'."

Feniksi është një lloj zogu përrallor në gojëdhënat kineze që kinezët e lashtësisë e shikonin si simbol të mbarësisë. Kurse në kohën moderne, njerëzit e shquar të dalë nga mjedisi i vështirë quhen nga populli "Feniksë të artë të dalë nga mali". Plani i "Feniksëve të artë", që përmendi vajza Fu Çin, është një plan që zbaton administrata e kësaj krahine, me qëllim që, me anë të shtimit të investimeve në arsim, t'u ofrohet fëmijëve të malësive mundësi të marrin arsimim të cilësisë së lartë në qytet, që të bëhen "feniksë të artë të dalë nga mali", duke ndryshuar gjendjen kur gjyshërit dhe baballarët e tyre jetonin gjithmonë në malësi, pa dalë asnjëherë në zona të tjera".

Vajza Fu Çin pati fat se priti këtë rast të mirë. Sot, mbi 3100 fëmijë të malësive, duke përfshirë edhe atë, kanë filluar të mësojnë në shkolla të mesme të qytetit. Ata jo vetëm që nuk kanë nevojë të paguajnë kuotizacionet shkollore, shpenzimet për blerjen e librave shkollorë e fletoreve dhe shpenzimet për fjetjen në konvikt, por çdo muaj marrin secili nga shkolla 100 juanë si subvencion për ushqim, 20 juanë për blerjen e biletave të autobusit dhe 10 juanë për të pirë ujë të zier. Secili prej tyre ka marrë nga shkolla edhe 2 palë uniforma shkollore.

Shkolla ku mëson vajza Fu Çin është një shkollë e mesme me konvikt për të gjithë nxënësit dhe gjendet në zonën e zhvillimit ekonomik të qytetit Çengdu. Kjo shkollë e re filloi të ndërtohet në janar dhe u vu në përdorim në shtator të vitit 2007. Megjithëse ende nuk kanë përfunduar plotësisht punimet e ndërtimit, janë ndërtuar tashmë godina e mësimdhënies, godina e konviktit dhe një fushë sportive standarde. Në fund të këtij viti, do të përurohen laboratorët e fizikës, kimisë dhe biologjisë si dhe një sallë kompjuterash, që i shikojnë me zili mësuesit dhe nxënësit e shkollave të tjera të këtij qyteti.

Mësuesit e kësaj shkolle janë të kualifikuar. Drejtori Zhang Yulin thotë se këta mësues kanë ardhur nga tre drejtime.

"Pjesa më e madhe e mësuesve tanë janë mësues të dalluar të zgjedhur në rajonin Longquan-yi të qytetit Çengdu. Pjesa tjetër janë mësues të dalluar të transferuar nga rajonet e tjera të qytetit Çengdu ose nga krahina të tjera. Kurse pjesa e tretë e tyre janë të diplomuar të shquar të këtij viti."

Shumë prej nxënësve të kësaj shkolle janë quajtur më parë "fëmijë rojtarë të shtëpisë", sepse ata kishin mbetur për të ruajtur me kujdes shtëpinë, pasi prindërit e tyre kishin shtuar për punë ose për tregti në krahina të tjera. Prandaj në sjelljer e tyre janë shfaqur disa probleme psikologjike. Nganjëherë ata e ndiejnë veten të vetmuar dhe nuk duan të lidhen me të tjerët, madje i mënjanojnë të tjerët. Nëpërmjet fjetjes në konvikt, duke jetuar në kolektiv, plus kujdesin e mësuesve, ata po zbutin pak nga pak këto probleme psikologjike, tregohen më optimistë dhe mendojnë më pozitivisht për të ardhmen e vet.

Mësuesit e kësaj shkolle thonë se në saje të zbatimit të planit të "Feniksëve të artë", është ngritur dukshëm cilësia komplekse e nxënësve të ardhur nga zonat malore. Ata arrijnë rezultate gjithnjë e më të mira në mësime, nuk hedhin më kudo mbeturinat, nuk shajnë më me fjalë të këqija, respektojnë më mirë disiplinën e jetës kolektive, tregohen më të sjellshëm ndaj të tjerëve dhe veprojnë më mirë në përputhje me rregullat e jetës në qytet.

Rajoni Longquan-yi i qytetit Çengdu kanë plan që, në të ardhmen, të sjellë në qytet edhe nxënësit e klasave të larta të shkollave fillore të zonave malore, që edhe ata të mësojnë në kushtet e mira të mësimit ashstu si nxënësit në qytet.

Administrata e qytetit Çengdu ka vendosur që ta përhapë këtë përvojë në më shumë zona, që arsimi në qytet dhe në fshat të zhvillohet në mënyrë të përpjesëtuar. (Zheng)