Ngjarja historike e "Tymit të barutit në Humen" është përfshirë në lëndën mësimore të historisë të shkollave fillore të Kinës dhe tabloja e kësaj ngjarjeje është gdhendur në "Lapidarin e heronjve të popullit" në sheshin "Tiananmen" të Pekinit. Rolin drejtues në këtë ngjarje e luajti Lin Zeshy, hero kombëtar kinez në historinë moderne, që është i njohur për çdo kinez, qoftë plak apo fëmijë.

Në shekullin e 19-të, shoqëria feudale kineze kishte hyrë në periudhën e saj të fundit dhe sundimi i dinastisë Qing ndodhej në rënie dita ditës. Megjithatë, sundimtarët e dinastisë Qing ende ndiqnin një politikë të jashtme të dyerve të mbyllura, duke u treguar mendjemëdhenj dhe duke u hequr si sundimtarë të një fuqie në botë. Ndërsa në të njëjtën periudhë, fuqitë e Evropës Perëndimore dhe të Amerikës Veriore kishin bërë një përparim të konsiderueshëm në zhvillimin e tyre dhe e shikonin Kinën me territor të gjerë dhe me popullsi të madhe si objektivin e tyre kryesor për zgjerimin e tregut përtej detit. Për të nxjerrë fitime sa më të mëdha, tregtarët e huaj bënin kontrabandë në bregdetin jugor kinez, duke sjellë në Kinë një sasi të madhe opiumi. Përhapja pa fre e opiumit cenoi rëndë shëndetin e popullit dhe korruptoi zyrtarët qeveritarë të Kinës. Si rrjedhim, argjendi që përdorej si para në Kinë u derdh jashtë dhe të ardhurat financiare të qeverisë kineze u pakësuan. Në ato rrethana, Lin Ze-shy i dërgoi perandorit një mesazh, ku vuri në dukje me mprehtësi se "Përhapja e opiumit rrezikon ekzistencën e vendit tonë, prandaj ju propozoj të ngrini vigjilencën." Kështu, në vitin 1838, Lin Ze-shy, i dërguar nga perandori si "komisionar perandorak", shkoi për ndalimin e opiumit në provincën Guangdong të Kinës Jugore.

Pasi arriti në qytetin Guangzhou, kryeqendër e provincës Guangdong, Lin Ze-shy filloi menjëherë një lëvizje të ndalimit të opiumit. Në saje të qëndrimit të vendosur dhe të masave të fuqishme që mori Lin Ze-shy i përkrahur nga banorët vendas, tregtarët e huaj u detyruan të dorëzonin 20 mijë arka opium me një peshë prej 1188 tonësh. Me urdhrin e tij, opiumi i dorëzuar u dogj publikisht në plazhin Humen për 23 ditë. Mijëra banorë ndoqën ditë për ditë djegien e opiumit, duke duartrokitur. Ja, kështu ka qenë historia e "Tymit të barutit në Humen", që u njoh nga gjithë bota dhe që tronditi Kinën dhe vendet e tjera.

Masat që mori Kina për ndalimin e opiumit ngjallën reagimin energjik të qeverisë angleze. Si pasojë, në vitin 1840, trupat e ekspeditës angleze bllokuan ujërat detare të Guangzhout, duke shkaktuar shpërthimin e Luftës së Opiumit. Të komanduar nga Lin Ze-shy, banorët dhe ushtarët e Guangzhout u bënë gati për luftë, por trupat angleze kuptuan se nuk do të fitonin atje dhe sulmuan drejt qytetit verior Tiancin. Më në fund, qeveria e dobët kineze u detyrua të nënshkruante me Anglinë një traktat të pabarabartë, sipas të cilit Kina i dha Anglisë tokën kineze Hong Kongun. Perandori kinez ia hodhi fajin "komisionarit" të tij Lin Ze-shy dhe e internoi në Yili të Sinkiangut, zonë kufitare veriperëndimore. Por në vitin 1850, pas vdekjes së tij, për meritat e tij për mbrojtjen e dinastisë Qing, perandori i dha atij titullin e nderit "Venzhong", që do të thotë "Besniku intelektual". (Zheng)