dëgjoni

Diabeti, që populli e quan "sëmundja e sheqerit", është një lloj sëmundjeje e zakonshme kronike që shfaqet me shtimin e sheqerit në gjak, të shkaktuar nga mungesa e insulinës në organizmin e njeriut. Sot në botë, numri i të sëmurëve që vuajnë nga diabeti i fazës së hershme arrin në 500 milionë veta. Në vitin 2006, duke marrë parasysh dëmet e rënda që sjell diabeti, Asambleja e Përgjithshme e OKB-së vendosi që "Dita Botërore e Diabetit", që më parë ishte më 14 nëntor të çdo viti, të zëvendësohet me emrin "Dita e Diabetit e OKB-së". Kjo gjë pasqyron plotësisht vëmendjen e madhe të OKB-së për parandalimin dhe mjekimin e diabetit dhe shpreh vendosmërinë dhe besimin e qeverive të vendeve të ndryshme të botës për parandalimin dhe frenimin e kësaj sëmundjeje.

Qeveria kineze iu përgjigj aktivisht thirrjes së OKB-së dhe organizoi aktivitete propaganduese dhe edukative në përmasa të mëdha në kuadrin e Ditës së parë të Diabetit të OKB-së. Në fjalimin e tij, të mbajtur në një miting të organizuar në Pekin, kryetari i Fondit Botëror të Diabetit, zoti Anil Kapur, tha ndër të tjera se fakti që gjithnjë e më shumë njerëz vuajnë nga diabeti nuk është më një problem thjesht i shëndetësisë, por ka të bëjë edhe me probleme të shumta ekonomike dhe shoqërore që tërheqin vëmendje të madhe.

"Diabeti na sjell jo vetëm dëme të mëdha në shëndet, por edhe humbje ekonomike. Për shembull, Kina shpenzon në vit 20 miliardë dollarë amerikanë për mjekimin e diabetit. Krahas kësaj, paaftësia për punë e të sëmurëve nga diabeti i sjell Kinës 20 miliardë dollarë amerikanë të tjerë humbje në vit."

Tema e sivjetshme e Ditës së Diabetit të OKB-së është "Diabeti me fëmijërinë dhe rininë". Zv-drejtoresha e Drejtorisë së Parandalimit të Sëmundjeve të Ministrisë së Shëndetësisë të Kinës, zonja Kong Lingzhi, thotë se rrallë gjendet ndokush që e lidh diabetin me fëmijërinë dhe rininë, edhe pse rritet nga viti në vit numri i fëmijëve që sëmuren nga diabeti. Kërkimet e shumta shkencore vërtetojnë se mungesa e mënyrës racionale të jetesës shpie në shëndoshje, gjë që ka lidhje të ngushtë me shfaqjen e diabetit. Kina ka 300 milionë fëmijë dhe përqindja e shëndoshjes së tyre jashtë mase rritet nga viti në vit. Po ta shohim nën këtë prizëm, tema e sivjetshme e Ditës së Diabetit të OKB-së ka rëndësi të veçantë për Kinën.

"Na shqetëson fakti se shtohet nga viti në vit numri i fëmijëve që vuajnë nga diabeti. Sot, kudo shohim fëmijë të shëndoshë në qytetet e mëdha të Kinës dhe përqindja e tyre ka arritur në 8 %. Meqë diabeti ka shumë lidhje me shëndoshjen e trupit, kjo sëmundje, nga e cila vuanin dikur vetëm të rriturit, shfaqet tani gjithnjë e më shumë te fëmijët."

Duke përfituar nga rasti i Ditës së parë të Diabetit të OKB-së, sektorët e instancave të ndryshme të shëndetësisë të Kinës organizuan aktivitete të larmishme për popullarizimin e njohurive për diabetin, me qëllim që fëmijët, të rinjtë e të rejat, mësuesit dhe prindërit e tyre të njohin më mirë dëmet që shkakton diabeti. Sektorët e shëndetësisë në disa krahina të Kinës organizuan edhe konferenca tematike, ku u ftuan specialistët përkatës për të mbajtur leksione. Disa krahina shpërndanë materiale propagande ose organizuan në shkolla konkurse të njohurive për parandalimin dhe mjekimin e diabetit.

Nxënësit, që morën njohuri përkatëse nga këto aktivitete, shprehën gatishmërinë për ndreqjen e zakonit jo të mirë në të ngrënë dhe në të pirë. Kështu u shpreh edhe nxënësi Siao Vang i një shkolle fillore të Pekinit.

"Mua më pëlqen shumë mishi. Më parë nuk kisha frikë se mund të sëmuresha nga diabeti, që ka qenë një sëmundje larg fëmijëve. Prandaj haja shumë mish. Leksioni i specialistit më bëri të kuptoj rrezikun. Nuk guxoj më të ha aq shumë mish."

Mësuesit dhe prindërit e nxënësve u shprehën shumë të kënaqur për këto aktivitete propaganduese dhe edukative. Zoti Guan Gje, zv-drejtor i një shkolle të Pekinit, thotë se edhe ai mësoi shumë gjëra nga këto aktivitete.

"Si punonjës të arsimit, ne duhet të tregojmë më shumë kujdes për rritjen e shëndetshme të nxënësve, duke u kërkuar atyre të kenë një mënyrë racionale të jetesës, me qëllim që të mbrohen nga sëmundja e diabetit."

Zv-drejtoresha e Drejtorisë së Parandalimit të Sëmundjeve pranë Ministrisë së Shëndetësisë të Kinës, zonja Kong Lingzhi, tha se faktet e shumta kanë vërtetuar se përdorimi racional i ushqimeve dhe sportet e përshtatshme kanë shumë rëndësi për parandalimin dhe mjekimin e diabetit, prandaj puna në shkollë për parandalimin e kësaj sëmundjeje mund të lidhet me jetën e përditshme e me mësimin dhe nuk ka nevojë për punë të tjera në këtë drejtim, me qëllim që të mos shtohet barra e mësuesve dhe nxënësve. (Zheng)