Ju flet Radio e Jashtme e Kinës! Të dashur dëgjues, unë jam Pina, ju përshëndes përsëri nga Pekini. Në programin e sotëm do t'ju paraqit një grup melodish të pakicave kombëtare. Materialet e këtyre melodive janë mbledhur nga jeta e banorëve të pakicave kombëtare. Gjatë mbledhjes së këngëve popullore, kompozitorët kanë ndier jetën dhe kanë kuptuar muzikën e tyre, e pastaj kanë krijuar pjesët muzikore që t'i shijojnë dëgjuesit.

Së pari le të dëgjojmë melodinë e kombësisë bulang me titull "Nata e verës në malin Manshan". Kombësia bulang është një nga pakicat kombëtare që jeton në pjesën jugperëndimore të Kinës. Materialet e kësaj melodie janë marrë nga vallja popullore e kësaj kombësie, vallja e rrethit. Kjo melodi përshkruan tablonë e gëzueshme kremtuese të fshatarëve në një natë vere.

Pas këngës kumbuese të gjinkallave, ndizet zjarr dhe vajzat e kombësisë bulang kërcejnë shkathët në formë rrethi, duke kënduar. Edhe djemtë vallëzojnë në mënyrë ritmike, duke i rënë veglës muzikore me tela Sanxian i madh të kësaj kombësie dhe daulles. Vajzat këndojnë: "Së shpejti do të vijë dita e korrjes, në vjeshtë do të bëjmë raki me oriz ..."

Banorët e kombësisë koreane që jetojnë në verilindje të Kinës, janë shumë të aftë për të kënduar e vallëzuar dhe në gjirin e tyre janë të përhapura shumë këngë të bukura popullore. "Alilang" është një nga këngët popullore përfaqësuese të kombësisë koreane, melodia e saj e bukur shkakton gjithmonë mallin e banorëve të kësaj kombësie për vendlindjen. Melodia që do të dëgjojmë më poshtë është krijuar në bazë të një kënge popullore, në të është përfshirë zëri i butë i vajzave dhe kori i djemve, kështu që kjo melodi ka marrë një forcë të madhe prekëse.

Në krahinat e ndryshme të Kinës ka burime të pasura muzikore, meloditë origjinale, të thjeshta dhe të papërpunuara, të kënduara nga këngëtarët popullorë vendorë kanë forcë shumë të madhe tronditëse. Kështu që kompozitorët shpresojnë të krijojnë një lloj pjesësh muzikore që ruajnë shijen origjinale të materialeve muzikore të para dhe kanë njëkohësisht edhe elemente të muzikës moderne, në mënyrë që këto pjesë muzikore të mirëpriten nga dëgjuesit.

Melodia që ndoqët është një melodi e kombësisë nu me titull "Lumi Nu i qershorit". Kombësia nu është një pakicë kombëtare që jeton kryesisht në brigjet e lumit Nu të provincës Yunnan të Kinës jugperëndimore. Materialet e kësaj melodie janë marrë nga kënga malësore e kombësisë nu me titull "Nurila". Në këtë këngë thuhet: "Yjet xixëllojnë në qiell, Arusha e Madhe shndrit si lule." Këngëtarët e kombësisë nu që kanë zë kumbues dhe diapazon të gjerë, e këndojnë shumë bukur këtë këngë. Melodia "Lumi Nu i qershorit" përshkruan vendlindjen e bukur dhe dashurinë e banorëve të kombësisë nu për jetën.

Ju flet Radio e Jashtme e Kinës! Të dashur dëgjues, ndoqët një grup melodish të bukura të pakicave kombëtare. Mirudëgjofshim të shtunën tjetër. Në mikrofon për ju, Pina.