Romani "Ëndrra në vilën e kuqe", që lindi në shekullin e 18-të, është një vepër monumentale në historinë e letërsisë kineze. Brezat e mëvonshëm e konsiderojnë atë si një vepër që pasqyroi jetën e familjes së autorit, Cao Shye-çin, që lindi në fillim të shekullit të 18-të.

Meqenëse stërgjyshja e Cao Shye-çinit kishte qenë dadoja e perandorit Kangsi në foshnjërinë e tij, Kangsi i dha familjes Cao nder dhe pasuri të jashtëzakonshme. Për këtë arsye, për 60 vjet me radhë, 4 veta të 3 brezave të familjes Cao qenë zyrtarë të lartë në Gjiangning të Kinës Lindore (qyteti Nankin i sotëm). Pas dhjetëra vjet akumulimi, familja Cao u bë një familje shumë e pasur dhe e kulturuar plot me hijeshi. Cao Shye-çin, që kishte lindur i zgjuar nga natyra, u poq herët. Duke jetuar në një familje me epërsi kulturore, ai hodhi një bazë të shëndoshë për të treguar talentin e tij më pas.

Por Cao Shye-çin nuk jetoi për shumë kohë të gjatë në kushtet me plot pasuri dhe me nder. Pas vdekjes së perandorit Kangsi, familja Cao u përla në një luftë të ndërlikuar brenda oborrit perandorak. Krahas kësaj, kjo familje ishte zhytur në borxhe për shkak se shpenzonte shumë për të ruajtur lidhjet me oborrin perandorak. Kur Cao Shye-çin ishte rreth 12-13 vjeç, shtëpia e familjes Cao u bastis dhe u sekuestrua. Kështu, kjo familje shumë e madhe u detyrua të kthehej nga jugu në Pekin dhe ra në një gjendje shumë të vështirë, gjë që e shtyti Cao Shye-çinin në krijimin e kësaj vepre të famshme klasike.

Në romanin "Ëndrra në vilën e kuqe", duke u përshkruar jeta e përditshme e 4 familjeve të pasura me në krye familjen aristokratike Gja që kishte marrëdhënie krushqie me oborrin perandorak, tregohet jeta luksoze dhe e kalbur, rënia e moralit dhe kontradiktat e shtresës aristokrate në shoqërinë feudale dhe, duke trajtuar nga aspektet ekonomike, politike dhe morale, demaskohet në thellësi aristokracia feudale që shkoi në mënyrë të pashmangshme drejt rënies dhe shembjes. Ky roman me figura të gjalla të personazheve dhe me skena të ndërlikuara mund të quhet një epope madhështore.

Në veprën e tij, Cao Shye-çin skaliti figurat e theksuara të mbi 400 personazheve, ndër të cilat figurat e personazheve kryesore përfaqësojnë nivelin botëror të krijimtarisë letrare. Në këtë roman, dashuria tragjetike e Gja Bao-yu me vajzat Lin Dai-yu dhe Shye Bao-çai tërheq më shumë vëmendje, kurse fati i mjeruar i disa femrave, si i disa zonjushave aristokrate dhe shërbëtore të tyre, ngjall keqardhje.

Romani "Ëndrra në vilën e kuqe" është vepra më e madhe në historinë e letërsisë kineze dhe komentohet si "një enciklopedi e shoqërisë feudale, enciklopedi e kulturës kineze dhe enciklopedi e letërsisë kineze". Për mbi rreth 200 vjetësh, shkencëtarë dhe dijetarë të panumërt ia kushtuan energjitë studimit të romanit "Ëndrra në vilën e kuqe". "Hongxue", që do të thotë studimi i romanit "Ëndrra në vilën e kuqe", është bërë një shkencë me vete. Në popull, figurat e personazheve dhe skenat në këtë roman janë rrënjosur prej kohësh në zemrat e njerëzve dhe komentohen gjerësisht prej tyre. (Zheng)