Fei Long, doktor i mjekësisë kineze, ka ardhur nga vendi i largët i afrikës, Kameruni, për t'u specializuar në Kinë. Në Spitalin e Paralizës Trunore të qytetit Taijuan të provincës Shansi të Kinës Veriore, korrespondenti ynë takoi këtë doktor që po mjekonte një fëmijë të sëmurë duke përdorur teknikën tradicionale të mjekësisë kineze. Ndërsa prindërit e disa famijëve po shikonin nga pranë, një foshnjë nisi të qante me të parë doktorin Fei Long.

"Ai ka shumë frikë se mos unë do t'i bëj një gjilpërë. Ah, të gjithë ata kanë frikë nga unë, sepse jam mjek."

Fëmijët e këtushëm e thërrasin Fei Long "xhaxhi Zezak". Ky mjek afrikan erdhi nga Kameruni në Kinë para 4 vjetëve, i dërguar nga qeveria e vendit të tij për studime në Institutin e Mjekësisë Kineze të provincës Shansi, për të fituar titullin e magjistrit të shërimit të nervave të fëmijëve. Gjatë kohës së studimeve në këtë institut, ai vjen shpesh herë në Spitalin e Paralizës Trunore, ku bën punë vullnetare për mjekimin e fëmijëve që vuajnë nga paraliza trunore. Duke shpjeguar emrin e tij kinez, Fei Long 32-vjeçar tha se "Fei" do të thotë "afrikan", sepse kinezët e quajnë Afrikën "Fei Zhou", kurse "Long" është një lloj kafshë përrallore që kinezët e lashtësisë e shikonin si totemi i kombit kinez. Fei Long tha se ai filloi studimin e mjekësisë kineze që në atdheun e tij.

"Qysh në kohën kur isha në Kamerun për studime në një universitet mjekësie, më lindi interesi për disa metoda mjekimi natyror dhe kam qenë i mendimit se, në këtë drejtim, mjekësia kineze është zhvilluar më mirë. Më duket se akupunktura e mjekësisë kineze bën efekt shumë të mirë dhe më ndihmon shumë. Teoria dhe parimi i mjekësisë kineze janë një çikë të vështira. Sidomos për ne të huajt, studimi i tyre kërkon shumë kohë. Për shembull, kur lexoj librin e mjekësisë kineze "Huang Di Nei Jing", më duket shumë e vështirë, edhe pse kam botimin e këtij libri në gjuhën anglishte."

Fei Longut i kujtohet si tani mbërritja e tij për herë të parë në Kinë. Pasi zbriti nga aeroplani dhe u nis me makinë për në qytet, ai u mahnit nga gjithçka që shihte.

"Pas arritjes në aeroportin e Pekinit, na u desh 1 orë me makinë nga aeroporti në hotel. U habita. Sa i madh dhe sa i zhvilluar ishte Pekini. Ja, kjo është përshtypja e parë që më la Pekini. Besoj se 95 përqind e njerëzve që vijnë për herë të parë në Kinë marrin një përshtypje të tillë. Ah, një surprizë."

Pas qëndrimit për një kohë të shkurtër në Pekin, Fei Long shkoi për studime në Institutin e Mjekësisë Kineze të provincës Shansi, që gjendet në kryeqedrën e saj, qytetin Taijuan. Që nga ajo kohë, ai vjen në kohë të caktuar në Spitalin e Paralizës Trunore, ku bën punë vullnetare për mjekimin e fëmijëve që vuajnë nga paraliza trunore. Drejtoresha e këtij spitali, zonja Guo Sin-zhi foli për punën e këtij mjeku afrikan.

"Në fillim, fëmijët e sëmurë nuk e kuptonin atë dhe nuk donin të mjekoheshin nga ai, sepse kishin frikë nga ai. Unë u thashë fëmijëjve: 'Pranoni xhaxhin Zezak që t'ju bëjë masazh, se ai është një njeri shumë i mirë dhe mos shikoni se ai e ka fytyrën të zezë'. Pas pak kohe, kjo gjendje ndryshoi."

Shumica e fëmijëve që vuajnë nga paraliza trunore kanë të meta jo vetëm në fuqinë mendore, por edhe në aftësitë fizike. Prandaj shërimi i tyre është një punë që do shumë kohë dhe durim. Doktor Shi Siao-jie, që punon së bashkë me Fei Long, e vlerëson lart punën e këtij kolegu.

"Fei Long punon më me seriozitet se ne. Ai sillet shumë mirë me të sëmurët dhe mendon për hollësirat më të vogla. Ai: do fëmijët e sëmurë dhe e do punën e vet."

Krahas plotësimit të detyrave të punës, Fei Long ka mësuar në kohën e lirë edhe tregtinë. Miqtë e tij dërgojnë nga Kameruni ose nga vende të tjera letra të porositjes së mallrave dhe ai përgjigjet për blerjen e mallrave në Kinë. Ndër mallrat, që blen Fei Long, përfshihen edhe dhurata të ndryshme, ilaçe, produkte elektronike e të tjera. Ai thotë se tani në Kinë prodhohet pothuajse çdo gjë dhe këto mallra kineze kanë cilësi të mirë, prandaj shiten shpejt në vendin e tij.

Sot Fei Long ndien se ai tashmë është shkrirë me vendasit në jetën e përditshme. Madje, ai duket fund e krye si një qytetar shansian. Ai ka parë me sytë e tij ndryshimet kolosale që kanë ndodhur këtu dhe gëzohet për këto ndryshime.

"Qyteti Taijuan ka bërë ndryshime të mëdha. Këtu janë ngritur shumë godina dhe janë shtruar shumë rrugë. Edhe qielli është bërë më i kaltër."(Zheng)