dëgjoni

Sportistja japoneze Kinue Hitomi është një nga aziatiket e para që kanë marrë pjesë në lojërat olimpike dhe ka dhënë kontribut të madh për zhvillimin e Azisë në sportin e femrave. Ajo është një atlete pothuajse e gjithanshme dhe në atletikë ajo ishte shumë e aftë jo vetëm në korsi por edhe në fushë. 

Në Lojërat Olimpike të Amsterdamit të vitit 1928, atletika e femrave u bë sport zyrtar olimpik. Por në 6 disiplinat e atëhershme të atletikës nuk kishte kërcim së gjati dhe vrapim 200 metra, në të cilat ishte shumë e fortë Kinue Hitomi, prandaj ajo u regjistrua vetëm për vrapim 800 metra.

Megjithëse nuk kishte bërë stërvitje profesioniste, Kinue Hitomi me talentin e saj të lindur fitoi medaljen e argjendtë, duke u bërë aziatikja e parë që fiton medalje olimpike. Kur u kthye në atdhe, Kinue Hitomi u prit shumë mirë. Ajo jo vetëm botoi autobiografinë e saj 'Gjurma e këpucave me taka', por edhe mbante fjalime në mbarë Japoninë. Por për fat të keq, Kinue Hitomi u infektua me tuberkuloz, i cili ishte në atë kohë sëmundje e pashërueshme. Pasi e mori vesh, ajo nuk u ligështua dhe shënoi rezultatin më të mirë në karrierën e saj. Në vitin 1929, Kinue Hitomi vendosi rekordin botëror në trigarëshin e femrave me 217 pikë dhe u bë njëkohësisht sportistja e parë në botë që fiton më shumë se 200 pikë në trigarëshin për femra. Në muajin gusht të vitit 1931, Kinue Hitomi që ishte vetëm 24 vjeçare ndërroi jetë. Por çfarë u ka lënë njerëzve ajo janë jo vetëm medaljet xixëlluese dhe rekordet e panumërta botërore, por edhe vullneti i saj i palëkundur për sportin. 

Në Lojërat Olimpike të Amsterdamit, krahas Kinue Hitomit, edhe japonezi Mikio Oda fitoi medaljen e artë në trehapësh. Rezultati i tij ishte 15 metra dhe 21 centimetra. Kjo është medalja e parë e aziatikëve në historinë olimpike. Krahas këtyre, japonezi fitoi edhe medaljen e artë në notin e stilit bretkosë. Arritja më e gëzueshme ishte që India fitoi titullin kampion në hokej mbi bar për meshkuj.

Gjithashtu, për herë të parë, një kinez i dërguar nga qeveria u duk në Lojërat Olimpike. Song Ruhai, që u zgjodh nga Shoqata pankineze e Sportit Kombëtar ishte një student jashtë Kinës dhe ishte vetëm një vëzhgues i lojërave, por kjo eksperiencë e vogël ishte një parathënie e pjesëmarrjes së sportistëve kinezë në Lojërat Olimpike.

Megjithëse aziatikët filluan të bënin një figurë të mirë në lojërat olimpike, në përgjithësi delegacioni amerikan ishte akoma më i forti. Në Amsterdam, olimpistët amerikanë fituan gjithsej 22 medalje të arta dhe u radhitën në vendin e parë të listës së medaljeve. (Jiang Lei)