dëgjoni

Xi Zhinong është një nga pak fotografët e kafshëve të egra në Kinë. Në Festivalin Ndërkombëtar të Filmit të Kafshëve të Egra të zhvilluar në gusht të vitit 2003 në Japoni, vepra e Xi Zhinongut "Majmuni i artë" fitoi çmimin më të lartë. Xi Zhinong është edhe fituesi i "Çmimit të Tokës" ? çmimi më i lartë në fushën e mbrojtjes së mjedisit në Kinë.

43-vjeçari Xi Zhinong ishte punonjës i Televizionit Qendror të Kinës. Në vitin 1998, ai dha dorëheqjen nga puna dhe u bë fotograf i lirë dhe vullnetar i mbrojtjes së mjedisit. Duke folur për shkakun e zgjedhjes së punës së fotografit të kafshëve të egra, Xi Zhinong u shpreh se kjo zgjedhje ka lidhje me eksperiencën e fëmijërisë së tij:

"Fëmijëria ime kaloi në një mjedis të bukur. Kur isha i vogël, rritja rosa e zogj dhe shpesh kapja insekte për t'i rritur. Në mbrëmje mund të dëgjoja thirrjen e bufit madje edhe të ujkut. Më pëlqen natyra dhe dua të regjistroj jetën e kafshëve të egra me kamera."

Vendlindja e Xi Zhinongut është konteja Ueisan e provincës Yunnan në Kinën jugore. Atje ka pyje të gjera dhe kafshë të shumta. Kur Xi Zhinongu ishte në moshën mbi 10-vjeçare, familja e tij u shpërngul në kryeqendrën e provincës Yunnan Kunmin, por atij nuk i pëlqente jeta në qytet. Atë kohë Xi Zhinong nuk e priste që pas mbi 20 vjetëve, ai do të kthehej në natyrë për të fotografuar kafshët e egra.

Xi Zhinong u shpreh se në Kinë fotografimi i kafshëve të egra nuk është shumë i lehtë, sepse kafshët e egra janë pakësuar pandërprerë. Megjithatë, ai ka regjistruar shumë skena të çmuara.

Ndër veprat e Xi Zhinongut, majmunët e artë "Dian" janë vepra tipike e tij. Majmunët e artë "Dian" jetojnë në rajonin malor me një lartësi prej 3200 deri 4700 metrash mbi nivelin e detit mes provincës Yunnan e Tibetit dhe janë kafshë që rriten vetëm në Kinë. Tani numri i majmunëve të egër të artë "Dian" është afro 1500. Në vitin 1992, nisi një projekt studimor për mbrojtjen e majmunëve të artë "Dian" i organizuar bashkërisht nga Fondacioni Shtetëror i Shkencës së Natyrës i Kinës dhe Fondacioni Botëror i Natyrës, Xi Zhinong mori pjesë në këtë projekt dhe ishte përgjegjës për fotografimin e majmunëve të artë. Gjatë 3 vjetëve të mëpasshëm, Xi Zhinong qëndronte pothuajse tërë ditën në mal për të ndjekur e fotografuar majmunë të artë. Përpjekjet e tij patën rezultate të pasura, ai nxori shumë fotografi të çmuara duke fituar shumë çmime.

Gjatë fotografimit të kafshëve të egra, Xi Zhinong ka hasur rreziqe të panumërta dhe është plagosur herë pas here. Megjithatë, ai nuk heq dorë nga pasioni për fotografinë. Xi Zhinong u shpreh se fotografimi i kafshëve të egra mund ta ndihmojë t'i kushtojë më shumë vëmendje natyrës. Njëkohësisht ai u bën thirrje njerëzve t'i kushtojnë vëmendje mbrojtjes së mjedisit:

"Tani mjedisi i njerëzimit është keqësuar pandërprerë. Qeveria i ka kushtuar rëndësi këtij problemi, edhe shumë njerëz kanë bërë përpjekje për ta mbrojtur mjedisin. Shpresoj se ky problem do të tërheqë më shumë vëmendje."

Për të nxitur më shumë njerëz të mbrojnë kafshët e egra dhe mjedisin, në vitin 2001, Xi Zhinong krijoi "Studion e kafshëve të egra të Kinës". Kjo është një organizatë e mbrojtjes së mjedisit nëpërmjet fotografimit. Xi Zhinong është i mendimit se në krahasim me disa vitet e kaluara, është ngritur shumë vetëdija e shoqërisë për mbrojtjen e mjedisit:

"Jam shumë i gëzuar që shumë të rinj kanë marrë pjesë në çështjen e mbrojtjes së mjedisit. Mendoj se nëse çdo njeri merr pjesë në këtë çështje, do të përmirësohet patjetër mjedisi."

Në jetën e përditshme, Xi Zhinong nuk përdor kondicioner ajri dhe udhëton shpesh me biçikletë. Me përpjekjet e tij dhe të personave të tjerë të mbrojtjes së mjedisit, më shumë njerëz kanë filluar t'u kushtojnë vëmendje kafshëve të egra dhe çështjes së mbrojtjes së mjedisit. (Fani)