Ju flet Radio e Jashtme e Kinës! Të dashur dëgjues, unë jam Pina, po takohemi përsëri në programin e sotëm të këngëve popullore kineze. Në këtë program ju ftoj të shijoni një grup këngësh popullore të provincës Yunnan të interpretuara nga këngëtari i njohur kinez Yan Weiwen.

Kënga që ndoqët është një këngë popullore e provincës Yunnan me titull "Gurgullon përroi", kënduar nga Yan Weiweni. Provinca Yunnan ndodhet në jugperëndim të Kinës dhe në të jetojnë kombësia hane dhe mbi 20 pakica kombëtare, si kombësitë yi, buyi, hani etj. Banorët e këtyre kombësive janë shumë të aftë të këndojnë e të vallëzojnë, shumë këngë të bukura popullore janë të përhapura gjerësisht në krahinë, madje në mbarë vendin. "Gurgullon përroi" është një këngë malësore e përhapur gjerësisht në Yunnan. Kënga me melodi të bukur e të freskët përshkruan një peizazh poetik. Në këngë thuhet: "Ka dalë hëna e ndritur, më merr malli për djalin e zemrës që ka shkuar në thellësinë e maleve. Ai ecën në qiell si hënë, uji i përroit rrëzë malit është shumë i pastër."

Këngëtari Yan Weiwen ka lindur në provincën Shanxi të Kinës qendrore. Në moshën 13 vjeç ai u pranua në Ansamblin e këngëve dhe valleve të provincës Shanxi dhe më vonë si një këngëtar i talentuar ai hyri në Ansamblin e këngëve dhe valleve të Drejtorisë së Përgjithshme Politike të Ushtrisë Popullore Çlirimtare Kineze. Ai ka mësuar nga arsimtari i njohur kinez i muzikës, profesor Jin Tielin, dhe tenori i njohur Cheng Zhi etj. Duke marë me këmbëngulje anët e mira të të tjerëve dhe duke kombinuar me sukses mënyrën e këndimit popullor me atë të këndimit evropian, Yan Weiwen ka krijuar stilin e vet të veçantë. Ai ka diapazon të gjerë, timbër të pastër e të ëmbël, këndon me ndjenja të përzemërta, duke treguar forcën e pasur shprehëse artistike.

Kënga që ndoqët është një këngë popullore e provincës Yunnan me titull "Kënga e gjëegjëzave". Kjo është një këngë fëmijësh që këndohet në lojë, e cila ka përmbajtje dhe formë të gjallë. Në këngë bëhen shumë pyetje dhe jepen përgjigje të bukura.

Në këngë thuhet: "Vogëlushë, a e dini apo jo se ç'është ajo gjë e gjatë deri në qiell, ç'është ajo gjë e gjatë që rritet në det, ç'është ajo gjë e gjatë që shitet në treg e ç'është ajo gjë e gjatë që gjendet para vajzës. Le t'ju tregoj se lumi i argjendtë (emri i Kashtës së Kumtrit në legjendën kineze) është i gjatë deri në qiell, rrënja e gjatë e lotusit rritet në det, makaronat prej orizi shiten në treg dhe fijet e mëndafshta gjenden para vajzës."

Që kur ishte i vogël Yan Weiwenit i pëlqenin këngët popullore. Pasi hyri në rrugën artistike ai është aktivizuar gjithmonë në skenën e këngëve popullore. Këngët popullore të interpretuara prej tij me karakteristika të theksuara krahinore si "Kënga e bariut", "Kullot bagëtinë" etj. mirëpriten ngrohtësisht nga masat e gjera të dëgjuesve. Duke filluar nga viti 2005, Yan Weiwen ka nxjerrë një sërë albumesh me këngë popullore. Ai ka provuar të futë elementet e muzikës moderne në mënyrën e këndimit popullor kinez, në mënyrë që këngët popullore të karakterizohen nga fryma e dukshme e kohës, në bazë të ruajtjes së shijes së tyre origjinale. Në fund të programit të sotëm, le të shijojmë së bashku këngën popullore të provincës Yunnan me titull "Kënga malësore e kullotjes së kuajve". Kjo këngë malësore që pasqyron jetën e barinjve të rinj ka tekst të gjallë, të shkathët dhe të shkurtër. Këtë këngë Yan Weiwen e këndon në mënyrë krenare, të shtruar, të çiltër dhe të gëzueshme, duke treguar stilin e saj krahinor dhe atmosferën jetësore.

Ju flet Radio e Jashtme e Kinës! Të dashur dëgjues, ndoqët një grup këngësh popullore kineze të kënduara nga këngëtari i njohur kinez Yan Weiwen. Mirudëgjofshim të shtunën tjetër. Në mikrofon për ju, Pina.