Vitet e fundit, jeta dhe veprimtaria e Gji Siao-lanit, letrar kinez i shekullit të 18-të, është bërë temë e nxehtë e telenovelave në Kinë. Ai është bërë një figurë e njohur historike me kontributin e tij të shquar për kulturën kineze.

Gji Siao-lan lindi në një familje intelektualësh dhe filloi shkollimin në moshën 4-vjeçare. Ai paraqiti talentin e tij të jashtëzakonshëm qysh në vogëli, duke shkruar vjersha, prandaj u quajt "Djali Çudibërës". I ati ishte një studiues dhe merrej me grumbullimin dhe sistemimin e materialeve kulturore të lashtësisë, duke bërë kërkime dhe analizën e vërtetësisë dhe vlerës së atyre materialeve. Gji Siao-lan trashëgoi punën e të atit që në moshën e rinisë dhe korri arritje të mëdha.

Kur ishte 31 vjeç, ai mori pjesë në provimet perandorake, që ishin provime shtetërore për zgjedhjen e zyrtarëve në emër të perandorit. Për notat e tij të shkëlqyera në provime, ai u pranua në Akademinë Perandorake, që ishte një institucion perandorak i studimit të letërsisë dhe historisë. Gji Siao-lan, që ishte një njeri me përvojë të pasur dhe me karakter plot homor, admirohej shumë nga perandori Qianlong. Në fillim, ai u dërgua si zyrtar në një krahinë larg kryeqytetit, por më vonë u transferua përsëri në Pekin, sepse perandori Qianlong ishte i mendimit se Gji Siao-lan mund të shfrytëzonte më mirë talentin e tij në kryeqytet, pranë perandorit.

Gji Siao-lan ishte një njeri i zgjuar, i shkathët, gojëbrisk, me karakter të drejtë dhe me pastërti morale. Edhe sot janë të përhapura gojëdhënat për luftën që ai bëri me zgjuarësi kundër zyrtarit të lartë të korruptuar, Hë Shen. Për shkak se perandori Qianlong, në pleqërinë e tij, i besonte Hë Shenit veçanërisht dhe jashtë masës, ky zyrtar i korruptuar kishte zënë një pozitë të lartë dhe kompentenca të rëndësishme, madje i shpërdoronte kompentencat e tij, siç thoshte populli, "Ai mund të mbulonte qiellin me një dorë". Pothuajse të gjithë zyrtarët brenda e jashtë oborrit perandorak, qofshin të lartë apo të ulët, i bënin lajka Hë Shenit, kurse Gji Siao-lan ruante gjithmonë virtytet e veta të drejtësisë dhe pastërtisë morale dhe mbante një vijë demarkacioni me të.

Gji Siao-lan punoi si zyrtar në fushën arsimore e kulturore dhe dha një kontribut kolosal për kulturën kineze. Ai punoi si kryeredaktor në redaktimin dhe botimin e enciklopedisë kineze "Si Ku Quan Shu", ku u përfshinë librat klasikë kinezë të 3000 vjetëve. Kjo seri librash ndahet në 4 pjesë: libara kanunesh, libra historiografikë, libra me figura historike dhe përmbledhje; ajo përbëhet me 80000 kapituj, të ndarë në 3500 lloje. Kjo seri librash, ku përmblidhen shkrimet historike dhe kulturore kineze, luan një rol të pallogaritshëm për grumbullimin, sistemimin, studimin dhe ruajtjen e trashëgimive kulturore kineze.

Gji Siao-lan shkroi edhe një libër tregimesh me stil ditari dhe me titull "Shënime në kasollen Yuevei". Ky libër me 400 mijë fjalë gëzoi famë të madhe në atë kohë. Në të përfshihen mbi 1200 tregime, të krijuara në bazë të gojëdhënave popullore dhe lajmeve shoqërore. Ky libër me përmbajtje të thellë ideologjike të luftës kundër etikës feudale pasqyron mendimet e vërteta të Gji Siao-lanit që jetoi në shoqërinë feudale, prandaj njihet mirë nga populli dhe është përhapur në popull. (Zheng)