dëgjoni 

Guo Wenjing-u është kompozitor i famshëm kinez, veprat e tij janë të shumëllojshme. Në gazetën "Nju-Jork Tajms" thuhet: "Guo Wenjing-u është i vetmi kompozitor kinez me famë ndërkombëtare që nuk jeton jashtë vendit". Në shumë festivale të rëndësishme artistike ndërkombëtare shfaqen koncerte të veprave të tij individuale ose opera të tij.

Pak kohë më parë, opera e kompozuar nga Guo Wenjing-u "Poeti Li Bai" përfundoi së shfaquri në SHBA dhe u luajt më pas në Pekin, duke ngjallur jehonë të madhe. Kjo operë përshkruan jetën e poetit të famshëm kinez të dinastisë Tang të para mbi 1000 vjetëve Li Bai. Li Bai ishte një poet romantik, poemat e tij njihen nga të gjitha familjet kineze. Libreti i operës ka karakteristika të veçanta, ndër 4 personazhet e operës, vetëm Li Bai është personazh real, 3 të tjerat janë përkatësisht "rakia", "hëna" dhe "poema". Guo Wenjing-ui shprehet se "rakia", "hëna" dhe "poema" janë pjesë e pandarë e jetës së Li Bait:

"Hëna përfaqëson femrën, rakia përfaqëson miqtë. Jeta e Li Bait është e pandarë nga femra e rakia. Hëna është tema kryesore në shumë prej poemave të tij."

Guo Wenjing-u lindi në vitin 1956 në provincën Siçuan të Kinës perëndimore. Kur ishte në moshën 18-vjeçare, ai dëgjoi për herë të parë "Simfoninë e 11-të" të Shostakoviçit, e cila i la mjaft mbresa. Qysh nga ajo kohë ai vendosi të bëhet kompozitor. Në vitin 1978, Guo Wenjing u pranua në fakultetin e kompozimit të Institutit Qendror të Muzikës të Kinës. Nëpërmjet studimeve të zellshme 4-vjeçare, Guo Wenjing shfaqi plotësisht talentin e tij në fushën e kompozimit. Në atë kohë ai vlerësohej si një nga 4 studentët më të dalluar të Institutit Qendror të Muzikës. Gjatë 30 vjetëve të mëvonshëm, Guo Wenjing ka pasur rezultate të shkëlqyera në fushën e kompozimit. Veprat kryesore të tij janë operat "Ditari i një të çmenduri", "Banketi në mbrëmje", "Qoshku Fengyi", simfonitë "Udhëtimi i vështirë në Shu", "Udhëtimi i gjatë", poema simfonike "Varreza", koncerti "Mali pa njerëz" etj. Ndër to, "Udhëtimi i vështirë në Shu" u zgjodh si "Vepra klasike e muzikantit kinez në shekullin e 20-të". Njëkohësisht Guo Wenjiang-u ka shkruar muzikë për mbi 40 filma dhe drama televizive. Me gjithë vështirësitë e shumta, Guo Wenjing është shumë krenar për zgjedhjen e rrugës muzikore. Ai tha:

"Kur sapo u diplomova nga universiteti, kompozitori e kishte të vështirë të gjente një punë të kënaqshme. Megjithatë, nuk hoqa dorë aspak nga ideali, sepse muzika është pasioni im më i madh. Jam fatmirë, sepse mund të merrem me një punë që më pëlqen shumë."

Vendlindja e Guo Wenjingut - provinca Siçuan - është vatra e kulturës "Shu" të Kinës. Kjo kulturë ka ushtruar ndikim të thellë në krijimtarinë e tij. Por, në krahasim me kulturën "Shu", që i kushton kryesisht vëmendje natyrës, veprat e Guo Wenjingut përshkruajnë më së tepërmi shoqërinë. Guo Wenjing-u shprehet se muzikantët duhet t'u kushtojnë më shumë vëmendje problemeve shoqërore dhe fateve të vendit, prandaj ai ka krijuar shumë simfoni të mëdha në këtë fushë.

Në vitet '80 të shekullit të kaluar, shumë muzikantë kinezë zgjodhën të studionin jashtë vendit, kurse Guo Wenjing-u zgjodhi mësimdhënien në Institutin Qendror të Muzikës të Kinës, duke krijuar vepra muzikore. Vitet e fundit, qarqet muzikore të huaja e kanë ftuar pandërprerë Guo Wenjing-un të krijojë vepra muzikore. Por ai ngul këmbë gjithmonë në karakteristikat e veta muzikore. Guo Wenjing-u thotë:

"Nuk marr parasysh nëse veprat time përputhen me dëshirat e dëgjuesve vendës ose të huaj. Krijoj vetëm vepra që më pëlqejnë." (Fani)