Deri në fund të tetorit u zhvilluan 19 veprimtari të serisë "Paç fat, Pekin!", duke përfshirë 18 disiplina olimpike dhe 1 paralimpike, në të cilat u pritën 4514 sportistë, 1068 funksionarë të federatave ndërkombëtare të sporteve të ndryshme, mbi 10 mijë gazetarë si dhe mbi 250 mijë shikues në terren. Duke folur për rezultatin e këtyre veprimtarive eksperimentale, nënkryetari ekzekutiv i Komitetit Organizativ të Lojërave Olimpike të Pekinit z. Yang Shuan, u shpreh ditët e fundit në Pekin:

"Sipas kontrollit gjatë këtyre veprimtarive, të gjitha pajisjet e instalimet, si dhe sistemi teknik në pallatet e stadiumet pjesëmarrëse përputhen në përgjithësi me kërkesat e funksionimit të Lojërave Olimpike. Gjatë këtij procesi, stafet e pallateve e stadiumeve u kanë kaluar provave, vullnetarët kanë luajtur rol të rëndësishëm, pajisjet teknike dhe sistemi përkatës kanë funksionuar në përgjithësi normalisht dhe shërbimet përkatëse të qytetit, si garantimi i sigurimit, komunikacioni, shërbimet urbane, të mbrojtjes së mjedisit, mjekimi dhe akomodimi janë të gatshme."

Sipas gjendjes së tanishme, edhe palët e ndryshme kanë reaguar aktivisht për këto veprimtari. Kur ishte i pranishëm në Japoni në Kampionatin Botëror të Atletikës, kryetari i Komitetit Olimpik Ndërkombëtar Zhak Rog u shpreh: "Është shumë e suksesshme puna e organizimit të serisë 'Paç fat, Pekin!', jemi shumë të kënaqur." Ndërsa kryetari i Komisionit Koordinues të Lojërave Olimpike të Pekinit, pranë Komitetit Olimpik Ndërkombëtar z. Hein Verbrugen u shpreh:

"Gjatë një periudhe të kaluar, vëzhguam shumë veprimtari eksperimentale në Pekin, Qingdao dhe Hong-Kong, që u organizuan shumë, shumë, shumë mirë dhe plotësuan të gjitha kërkesat!"

Tani 11 federata ndërkombëtare të sporteve të ndryshme kanë paraqitur raporte vlerësimi për këto veprimtari. Për qëndrimin e tyre, z. Yang Shuan përgjithësoi kështu:

"Në përgjithësi ata vlerësuan lart veprimtaritë e zhvilluara. Atyre nuk u shkonte ndër mend që në veprimtaritë eksperimentale një vit para hapjes së Lojërave Olimpike mund të gjenden pallate e stadiume, pajisje e instalime aq të mira dhe mund të kryheshin punë aq të mira të organizimit dhe të funksionimit. Ishte krejtësisht e paparashikuar për ta."

Krahas mendimeve të Komitetit Olimpik Ndërkombëtar dhe të federatave ndërkombëtare të sporteve, Komiteti Organizativ i Lojërave Olimpike të Pekinit u ka kushtuar rëndësi edhe mendimeve të banorëve të thjeshtë. Nga një sondazh i bërë nga një kompani e pavarur del se njerëzit janë të mendimit në përgjithësi se punët organizative të veprimtarive sportive të Pekinit kanë arritur një nivel të lartë dhe funksionimi i pallateve e stadiumeve ka pasur efektivitet të mirë.

Mirëpo organizatorët e Pekinit nuk krenohen për sukseset e arritura. Ata e kanë shumë të qartë qëllimin e vërtetë të organizimit të veprimtarive eksperimentale. Z. Verbrugen u shpreh:

"Veprimtaritë eksperimentale zhvillohen për të fituar përvojë. Në rast se shfaqen probleme që duhen përmirësuar, realizohet me të vërtetë synimi i organizimit të këtyre veprimtarive."

Edhe z. Yang Shuan shprehu të njëjtin mendim.

"Sa më shumë probleme të zbulohen, aq më e çmuar është përvoja që marrim."

Z. Yang Shuan bëri të ditur gjithashtu se në bazë të këtyre veprimtarive eksperimentale, organizatorët kanë fituar më shumë besim. P.sh. gjatë veprimtarisë eksperimentale të hipizmit në Hong-Kong, papritur ndodhi tajfuni dhe gjatë trajtimit të kësaj ngjarjeje të befasishme, organizatorët fituan përvojën e vyer për përballimin e motit ekstrem; pas tregarëshit dhe garës së çiklizmit në rrugë automobilistike, nga vërejtjet e sportistëve organizatorët mësuan se cilësia e ajrit të Pekinit mund të përputhet plotësisht me kërkesat e këtyre disiplinave sportive në terren të hapur, me distancë të madhe. Të gjitha këto do të garantojnë zhvillimin normal të veprimtarive të Lojërave Olimpike 2008.

Z. Yang Shuan u shpreh se me përvojën e këtyre veprimtarive eksperimentale, Lojërat Olimpike të Pekinit do të zhvillohen ashtu siç tha z. Verbrugen, "Pa asnjë pengesë përpara." (Wang Lei)