dëgjoni

Ju flet Radio e Jashtme e Kinës! Të dashur dëgjues, në rubrikën e sotme "Shkenca, arsimi dhe shëndetësia" do të japim reportazhin: "Në saje të zhvillimit të arsimit profesional, të diplomuarit në rajonin e Sinkiangut punësohen me sukses".

Afro 5 milionë studentë kinezë u diplomuan sivjet në shkollat e larta të llojeve të ndryshme. Ndërsa të diplomuarit në krahinat e tjera po mundoheshin dhe nxitonin për punësim, ata të shkollave të larta profesionale të Rajonit Autonom të Sinkiang-Ujgurit të Kinës Veriperëndimore ishin punësuar shumë lehtë.

Rreth 2400 studentë u diplomuan sivjet në Institutin e Industrisë së Lehtë të Sinkiangut dhe 95 % e tyre kanë nënshkruar tashmë kontrata me njësitë e tyre të punës. Punësimi i të diplomuarve në Institutin Politeknik të Karamajit ka arritur në 92 %, përqindja e punësimit të të diplomuarve në Institutin e Agronomisë të Sinkiangut për të tretin vit me radhë e kaloi shifrën 96 %, kurse numri i të diplomuarve në Institutin e Inxhinierisë Mekanike dhe Elektrike të Sinkiangut për të dytin vit me radhë nuk e plotësoi dot kërkesën. Për këtë, foli rektori i këtij instituti, zoti Vang Gjian Min.

"Gjatë disa vjetëve të fundit, të diplomuarit në degët mekanike dhe elektrike janë punësuar njëqind për qind, madje në këtë drejtim ka qenë një gjendje e tillë që, siç thuhet, 'oferta nuk e plotëson dot kërkesën'. Edhe disa ndërmarrje jashtë rajonit të Sinkiangut vijnë për të kërkuar kuadro nga instituti ynë. Studentët e diplomuar sivjet te ne janë punësuar plotësisht. Tani ndërmarrje të shumta kanë filluar të porositin paraprakisht ata që do të diplomohen te ne në vitet 2008 dhe 2009."

Rajoni autonom i Sinkiangut zhvillon me të gjitha forcat arsimin profesional, duke i kushtuar një vëmendje të veçantë përgatitjes së kuadrove teknikë të profesioneve të ndryshme. Vetëm gjatë dy vjetëve të fundit, administrata e këtij rajoni investoi 300 milionë juanë në zhvillimin e shkollave të larta profesionale. Është formuar në përgjithësi një rrjet arsimi profesional dhe specializimi profesional që mbulon tërë rajonin e Sinkiangut. Shkollat profesionale kanë përgatitur një numër kuadrosh me aftësi profesionale. Punësimi i të diplomuarve të këtyre shkollave ka një të ardhme të ndritur.

Gjatë zhvillimit të arsimit profesional, shkollat e larta profesionale të rajonit të Sinkiangut janë përpjekur aktivisht për të krijuar modele të reja arsimore, si modeli i zhvillimit të arsimit në bashkëpunim me ndërmarrjet, modeli i përgatitjes së kuadrove me porosi dhe modeli i mësimit pa shkëputje nga puna. Në këto shkolla, lëndët mësimore lidhen ngushtë me tregun dhe vendet e punës. Ato zhvillojnë arsimin profesional duke e marrë prirjen e punësimit si udhërrëfyese.

Pasi u nxor në pah modeli i përgatitjes së kuadrove teknikë "të bashkëpunimit të shkollave me ndërmarrjet", në fushën e arsimit profesional në rajonin e Sinkiangut filluan të përhapen edhe modele të tjera, si modeli i "bashkëpunimit të shkollave me ndërmarrjet dhe nëpërmjet kombinimit të mësimit me praktikën e punës". Në vitin 2006, Universiteti Profesional i Urumçit, në bashkëpunim me hotelin me 4 yje "Granda Hotel", hapi Institutin e Turizmit për përgatitjen e udhërrëfyesve për turistët dhe administratorëve të hoteleve; Instituti i Komunikacionit i Sinkiangut, në bashkëpunim me Kompaninë "Tojota" të Korporatës Kineze numër 1 të Automjeteve, hapi "Kursin 'Tojota'" për përgatitjen e kuadrove të industrisë së automjeteve; Instituti Profesional i Çangjiut, në bashkëpunim me Korporatën "Haier" të Qingdaos, hapi "Kursin 'Haier'". Me këto objekte bashkëpunimi, është krijuar një model arsimimi i kombinimit të punësimit të të diplomuarve me nevojat e ndërmarrjeve përkatëse.

Shefi i zyrës së Institutit të Agronomisë të Sinkiagut, Zhu Lihong, shtjelloi këto modele të reja arsimore.

"Duke krijuar një sistem të ri arsimimi, ndërtojmë një platformë përfitimi për shumë palë. Duke bashkëpunuar me ndërmarrjet, e kemi çuar mësimdhënien në repartet e tyre. Studentët tanë fillojnë praktikimin në vitin e dytë të studimeve dhe vendi i praktikimit është vendi ku do të punësohen."

Për të përgatitur kuadro teknikë të nivelit të lartë, ky institut zhvillon edhe bashkëpunimin me shkolla të larta të krahinave të tjera, madje edhe me ato të huaja, duke shfrytëzuar burimet e mësimdhënies me epërsi. Në dhjetor të vitit 2004, ky institut, në bashkëpunim me Institutin 'Stamford' të Malajzisë, hapi një filial. Në qershor të këtij viti, grupi i dytë i studentëve të tij u dërguan për specializim në këtë filial. Për këtë foli rektori Liang Ming.

"Instituti 'Stamford' gëzon famë për sa i përket specialitetit të administrimit të hoteleve. Në vitin e parë, këta studentë do të studiojnë kryesisht me pedagogët e huaj, kurse në vitin e dytë ata do të zgjedhin lëndët mësimore duke u nisur nga kërkesat e gjendjes së tanishme." (Zheng)