dëgjoni

Më22 gusht 2007, e mërkurë. Sot paradite, mësuesit Wang, Li dhe Ma na drejtuan ne, sportistët, të stërviteshim në Shkollën e 2-të të Mesme. Nuk kam frikë nga lodhja dhe vështirësitë."

Të dashur dëgjues, fjalë të tilla të thjeshta shkruan çdo ditë vajza Ma Yunli në ditarin e saj. Kjo nuk është ndonjë gjë e madhe për njerëzit e zakonshëm, por ndoshta do ta respektoni nga zemra këtë vajzë kur të mësoni se ajo është një person me aftësi të kufizuar mendore dhe koeficienti i inteligjencës së saj nuk arrin as 70, ndërkohë, si përfaqësuese e Kinës, ajo do të marrë pjesë edhe në Lojërat Speciale Olimpike, që do të zhvillohen në tetor të këtij viti në Shangai. Në rubrikën "Sporti kinez", ju ftoj të dëgjnon reportazhin e korrespondentit të radios sonë Rao Binbin nga baza e stërvitjes së delegacionit të Kinës që do të marrë pjesë në Lojërat Speciale Olimpike.

Mbi 20 vjeçarja Ma Yunli vjen nga qyteti Baoji i Kinës perëndimore. Gjatësia e saj është sa ajo e një fëmije 10 vjeçar, ndërsa koeficienti i inteligjencës së saj është vetëm në nivelin e fëmijëve 5- a 6- vjeçarë. Trajneri i përgjithshëm i bazës së stërvitjes së delegacionit kinez për Lojërat Speciale Olimpike, z. Zhang Yucai, i tha korrespondentit të radios sonë:

"Kur e pashë Ma Yunli-në për herë të parë, mu duk se asaj i nevojitej ndihmë edhe për të ecur ose për të ngjitur shkallë të ulëta. Pas stërvitjes për njëfarë kohe, kur has ndonjë trajner të moshuar ose që nuk është mirë me shëndet, ajo mund ta ndihmojë me iniciativë."

Krahas aftësisë së kufizuar mendore, Ma Yunli vuan edhe nga një sëmundje e lindur e zemrës dhe sëmundje të tjera. Në qoftë se nuk do të kishte lëvizje speciale olimpike, ndoshta jetës së vajzës Ma Yunli do t'i mungonin ngjyrat.

Në vitin 2002, i ati Ma Sixiang mori vesh rastësisht se edicioni i 3-të i Lojërave Speciale Kombëtare do të zhvillohej në qytetin Si'an, jo larg nga qyteti Baoji ku banon Ma Yunli, kështu që ai e inkurajoi të regjistrohej. Për të kaluar normalisht garën fillestare të atletikës, me ndihmën e prindërve, Ma Yunli filloi stërvitjen shumë të vështirë, vrapimin, ngritjen e dorakëve, ulje-ngritjet me forcën e muskujve të krahëve dhe të barkut, duke u stërvitur çdo ditë. Me përpjekjet e paepura, ajo kaloi normalisht garën fillestare, ndërsa ky sukses u bë edhe një pikënisje e re në jetën e Ma Yunli-së.

Pas lojërave speciale, u forcua dukshëm cilësia trupore e Ma Yunli-së dhe u ngrit edhe niveli i inteligjencës së saj. Ajo filloi të bënte brenda mundësive punë shtëpiake, si gatim, pastrim, masazh etj. Pikërisht që nga ajo kohë, ajo filloi të mbante ditar, duke shënuar hap pas hapi gjurmët e veta të rritjes.

Ma Yunli është bërë edhe më e hapur. Ajo bisedon shpesh me trajnerë, bashkanëtarë të ekipit të stërvitjes dhe me shokët e vet, ose drejtpërdrejt ose me telefon. Kështu Ma Yunli doli nga bota e vet e kufizuar dhe u shkri në shoqëri.

Në saje të ditarit, Ma Yunli është e njohur në delegacionin kinez për Lojërat Speciale Olimpike, madje ajo nxit edhe bashkanëtarët e saj të mbajnë së bashku ditar.

"Edhe ata duan të shkruajnë ditar. Kur hasin hieroglife të panjohura, më pyesin dhe unë u tregoj."

Për këtë, trajneri Zhang Yucai e vlerësoi shumë Ma Yunli-në.

"Nën nxitjen e Ma Yunli-së, tani pothuajse të gjithë anëtarët e delegacionit mbajnë ditar. Çdo javë mbledhim ditarët e tyre e i vlerësojmë dhe, do të japim edhe çmim të vogël. Kjo pasuron kohën e tyre të lirë dhe shumë prej tyre thonë se janë të gëzuar në këtë bazë stërvitjeje."

Në Lojërat Speciale Olimpike, që do të zhvillohen së shpejti në Shangai, Ma Yunli do të marrë pjesë në garën e vrapimit 25 metra dhe në ndeshjet e bejzbollit. Në bazën e stërvitjes, ajo stërvitet me fuqi të madhe. Kur korrespondenti e pyeti a është e lodhur, ajo u përgjigj:

"E lodhur, por nuk kam frikë nga lodhja dhe vështirësitë, do të arrij rezultat të mirë dhe do të fitoj medalje të artë. Ne sportistët jemi shumë të gëzuar për këtë. "

Në fakt Ma Yunli është një përfaqësuese e personave të shumtë me aftësi të kufizuar mendore. Vitet e fundit Kina u ka kushtuar gjithnjë e më shumë vëmendje të personave me aftësi të kufizuar fizike dhe mendore dhe ka marrë një sërë masash. Njëra prej tyre është zhvillimi aktiv i lëvizjeve sportive speciale. Kryetarja e Këshillit të Federatës së Personave me Aftësi të Kufizuar të Kinës, znj. Tang Xiaoquan, i tha korrespondentit:

"Gjatë procesit të pjesëmarrjes në sporte dhe në Lojërat Speciale Olimpike, personat me aftësi të kufizuar mendore ndiejnë gëzimin e jetës. Shijimi i ndjenjave të lumturisë, gëzimit, rregullimi i gjendjes psikologjike dhe rikthimi i shpresës për jetën, këto janë të mirat e sjella nga lëvizjet sportive speciale."

Duke lexuar herë pas here ditarin e së bijës, i ati i Ma Yunli-së tha me zë të mbytur nga ngushërimi:

"Ma Yunli na ngushëllon shumë ne të gjithë familjen. Ime shoqe vuan nga disa sëmundje dhe çdo ditë pi 5 a 6 lloje ilaçesh. Tani unë dhe ime bijë gjendemi larg familjes. Kur i telefonon së ëmës, e para pyetje e saj është nëse po i pi ilaçet dhe fjalia e fundit është 'Mos harro të pish ilaçet'. Ne prindërit i dhamë jetën Ma Yunli-së, ndërsa Lojërat Speciale Olimpike i dhanë asaj fat. Në saje të lëvizjes sportive speciale, Ma Yunli fiton aftësinë e rritjes."

Përpara korrespondetit të radios sonë, Ma Yunli herë fërkonte supet e të atit duke i bërë masazh, herë vallëzonte duke kënduar, herë kërkonte me zë të lartë që të shikonin ditarin e saj? I ati e lavdëroi të bijën duke qeshur gjithmonë, nganjëherë ai i kujtonte të kishte kujdes në sjellje. Në këto raste, Ma Yunli i binte kokë, dhe hynë në mendime duke vënë gishtin në gojë?

Në ngrohtësinë e fundit të verës, dashuria, optimizmi dhe vetëbesimi që kishte kjo vajzë i prekën të gjithë, korrespondentin, mua dhe ju, përpara kompjuterit. (Wang Lei)