Secili nga këto 6 qytete koordinuese ka kulturë të veçantë sportive dhe nuk përjashtohet as Qinhuangdao. Në këtë qytet gjendet e vetmja shkollë e futbollit në rang kombëtar, ku shumë fëmijë të talentuar kërkojnë të realiyojnë ëndrrat e tyre për fushën e blertë. Sot do t'ju sjell në këtë "terren të shenjtë" në zemrën e djemve e vajzave futbolldashëse.

"Më pëlqen futbolli që nga mosha 6 vjeçe, sepse edhe im atë luan futboll. Kur ai luante futboll, vrapoja dhe gjuaja topin."

"Tani në fushë jam kapiten i ekipit. Kapiteni duhet të jetë i zgjuar dhe, kur has probleme, duhet të dijë si t'i trajtojë. P.sh. nëse një anëtar i ekipit nxiton shumë, nuk mund të shënojë gol, atëherë unë duhet ta qetësoj që të vazhdojë ndeshjen në mënyrë të qëndrueshme dhe duhet të përdor traktikat e trajnerit në mënyrë të arsyeshme."

Djali që sapo foli quhet Xiao Yanan. Megjithëse është vetëm 13 vjeç, ai ka ndjekur disa vjet shkollën e futbollit të Kinës. Në saje të talentit të dalluar në futboll dhe të vullnetit këmbëngulës, ai është shquar në mes të shokëve dhe u zgjodh në ekipin kombëtar të futbollit të fëmijëve. Mësuesja e kësaj shkolle, Xue Liyan, që përgjigjet për edukimin kulturor, u shpreh se Xiao Yanan është një djalë me tru.

"Nëse do të ketë ndeshje të nesërmen, po të ketë kohë, ai patjetër do të mendojë vetë taktika. Ai është i aftë që të mendojë në mënyrë të pavarur dhe pikërisht për këtë arsye ai luan mirë futboll."

"Ndiej se nxënësit futbollistë janë shumë simpatikë. Ata janë të zgjuar, reagojnë shpejt dhe kanë shpirtin e fortë të bashkimit. Futbolli thekson nderin kolektiv, prandaj ata s'kanë problem në bashkëpunim, janë shumë bujarë. Nganjëherë, edukimi i tyre është më i lehtë në krahasim me edukimin e nxënësve në shkollat e zakonshme, sepse mund të diskutoj lehtësisht me ta dhe ata pranojnë lehtë konceptet e mendimet e mira."

Shumë nga nxënësit e shkollës së futbollit largohen nga prindërit që të vegjël. Në fillim ata kanë shumë mall për mamanë dhe babanë që ndodhen larg, por mësuesit dhe trajnerët në shkollë kujdesin për ta si prindër, kështu që nxënësit mësohen shpejt me jetën në shkollën e futbollit.

Për të garantuar cilësinë e mësimdhënies, shkolla fton shumë trajnerë të shquar kinezë dhe të huaj, që u zhvillojnë nxënësve stërvitje sistematike dhe profesionale në futboll. Ftohen shpesh në shkollë edhe specialistë të futbollit të famshëm në botë, që nxënësit të kenë mundësi të njihen me karakteristikat e taktikave të ekipeve të forta në botë.

Në vitin 2008, në qytetin Qinhuangdao do të organizohen 11 ndeshje futbolli të Lojërave Olimpike, prandaj është e pashmangshme që shkolla e futbollit e Kinës të lidhet ngushtë me Lojërat Olimpike. Pamja e shkollës ka ndryshuar në saje të organizimit të Lojërave Olimpike dhe, nxënësit e shkollës janë shumë të emocionuar për arsye të takimit të drejtpërdrejtë me Olimpiadën.

Gjatë dy vjetëve të fundit, u investuan 150 milionë juanë në riparimin dhe zgjerimin e korpusit të shkollës. Gjatë Lojërave Olimpike të Pekinit, sheshet futbollistike të shkollës do të përdoren si fusha stërvitjeje për ekipet që do të marrin pjesë në ndeshjet olimpike në Qinhuangdao. Sot, shumë nxënës të vogjël në shkollë kanë dëshirë të madhe që të bëhen vullnetarë të Lojërave Olimpike. Një djalë i vogël me mbiemrin Wang u shpreh:

"Dua të shkoj në fushën e ndeshjeve. Po të kem rast, dua të shkëmbej edhe fanellën me yjet e futbollit."

Nëse do të keni rast të shkoni në Qinhuangdao në gusht të vitit të 2008 për të parë ndeshje futbolli, ndoshta do të takoni pranë fushës këta djem e vajza simpatike futbolldashëse. (Wang Lei)