Ju flet Radio e Jashtme e Kinës! Të dashur dëgjues, unë jam Pina, ju përshëndes përsëri nga Pekini. Në programin e sotëm të këngëve popullore kineze do t'ju paraqit disa këngë popullore kineze të kënduara nga këngëtari i kombësisë mongole Tengeer.

Të dashur dëgjues, kënga që ndoqët është një këngë popullore e Singjiangut me titull "Një trëndafil i bukur". Kjo është një këngë dashurie e kombësisë kazake që përshkruan dashurinë romantike midis të dashuruarve Dutar dhe Maria. Në këngë thuhet: "I riu trim kazak Ivan Dutar, eja sonte në shtëpinë time, ushqeje mirë kalin, merre me vete dunbla-në tënde. Kur të dalë hëna, do të këndojmë së bashku nën hije të pemës."

Tengeer-i është këngëtar dhe kompozitor i njohur i kombësisë mongole. Ai ka lindur në vitin 1960 në distriktin Etuoke të Mongolisë së Brendshme të Kinës veriore. Kur ishte 15 vjeç u pranua në shkollën artistike të Mongolisë së Brendshme për të mësuar interpretimin e veglës muzikore sanxian. Pas 5 vjetëve ai hyri në Konservatorin e Tianjinit për të mësuar kompozimin. Pas mbarimit të shkollës së lartë, ai filloi të punojë si kompozitor në Ansamblin Qendror të këngëve dhe valleve të kombësive. Në vitin 1986 ai filloi të këndojë. Duke treguar epërsinë e vet të kompozimit, ai ka shkrirë kulturën e lashtë të kombësisë mongole në muzikë dhe ka krijuar stilin e vet të veçantë të krijimtarisë dhe të interpretimit.

Kënga që ndoqët titullohet "Gurgullon përroi", kënduar nga Tengeer-i. Kjo është një këngë dashurie e përhapur gjerësisht në Kinë. Me tekstin shumë të natyrshëm dhe të thjeshtë kënga përshkruan një peizazh poetik: nën rrezet e argjendta të hënës, mbizotëron qetësi e madhe, dëgjohet vetëm gurgullima e ujit të një përroi rrëzë malit. Një vajzë e bukur duke parë hënën shpreh ndjenjat e veta. Kënga e bukur dhe ndjenjat e thella të vajzës shkojnë së bashku me përroin drejt vendit ku banon i dashuri i zemrës."

Këngët e krijuara nga Tengeer-i kanë tema të gjera dhe melodi të rrjedhshme e të natyrshme, stili i interpretimit të tij është i shtruar dhe i hapur, me plot patos. Shumë pjesë muzikore të krijuara dhe të interpretuara prej tij kanë fituar çmim në konkurse muzikore brenda e jashtë vendit dhe mirëpriten ngrohtësisht nga dëgjuesit. Në fund të programit të sotëm ju ftoj të shijoni këngën popullore të kombësisë tartare "Nën rrezet e argjendta të hënës". Kjo këngë me melodi elegante dhe lirike shpreh kujtimet e njerëzve për dashurinë e së kaluarës.

Në këngë thuhet: "Në ranishten e argjendtë, janë shpërndarë rrezet e argjendta të hënës. Kërkojmë gjurmët e së kaluarës, por ato janë të paqarta. Ku je fshehur moj vajzë e ndarë prej kohësh." Tengeer-i e këndon këtë këngë në mënyrë të shkëlqyeshme dhe poetike. Le ta shijojmë.

Ju flet Radio e Jashtme e Kinës! Të dashur dëgjues, ndoqët disa këngë popullore kineze të kënduara nga këngëtari i njohur i kombësisë mongole Tengeer. Mirudëgjofshim të shtunën tjetër. Në mikrofon për ju, Pina.