Gjatë qëndrimit të tyre në Pekin, ata më dhanë një intervistë, duke shprehur mendimet dhe përshtypjet e tyre për këtë simpozium dhe për Kinën.

Në radhë të parë foli presidenti i Bashkimit të Sindikatave të Pavarura të Shqipërisë, zoti Gëzim Kalaja, për pjesëmarrjen e tyre në simpoziumin e organizuar nga Konfederata Pankineze e Bashkimeve Profesionale. Z. Gëzim Kalaja tha:

"Ndodhemi në Kinën gjigante. Populli shqiptar është lidhur me një miqësi të vjetër me popullin kinez. Jemi ftuar nga Konfederata Pankineze e Punonjësve e Kinës për të zhvilluar një seminar dhe për t'u njohur me njëri-tjetrin, për të forcuar solidaritetin midis punonjësve shqiptarë dhe punonjësve kinezë dhe për t'u njohur me problemet e ardhshme të globalizimit. Ne e konsiderojmë Kinën si një shtet, një vend, i cili mund të japë kontributin e vet të madh kryesor në vendosjen e paqes në botë. Por do të gjykoja se Kina ka bërë një hap shumë të madh pozitiv, një avancim gjigant përpara në çështjen e industrializimit të vendit, prandaj llogaritet se ajo është e treta sot në botë. Tregu kinez, eksporti kinez zë një vend shumë të rëndësishëm në gjithë globin tokësor."

Ai vazhdoi duke folur rreth marrëdhënieve miqësore midis sindikatave të Shqipërisë dhe të Kinës.

"Ardhja jonë sot në Kinë është një hap pozitiv përpara për vazhdimin e marrëdhënieve miqësore midis sindikatave shqiptare dhe sindikatave kineze dhe për forcimin e bashkëpunimit midis dy vendeve tona, dhe njëkohësisht është një nyjë lidhëse kryesore midis punonjësve shqiptarë dhe punonjësve kinezë. "

Ai foli edhe për gjendjen dhe detyrat e sindikatave të Shqipërisë.

"Mendoj se Shqipëria do të futet në Bashkimin Evropian dhe pranimi i saj në të gjitha institucionet ndërkombëtare do të jetë një hap i madh shumë cilësor i Shqipërisë, në mënyrë që futja në familjen evropiane të sigurojë mirëqenien e gjithë popullit shqiptar. Por, për t'u futur në Bashkimin Evropian, që është një detyrë shumë e vështirë për t'u realizuar, e para çështje është lufta kundër korrupsionit, për të cilën qeveria ka ndërmarrë një nismë. Për ta luftuar këtë kundër informalitetit që po luftojnë sindikatat, do të thotë puna e zezë. Mendoj se ky mendim i marrëveshjeve midis qeverisë dhe sindikatave do të ishte një tregues shumë pozitiv për respektimin e partneritetit nga qeveria shqiptare me lidhje me sindikatat dhe funksionimin e dialogut social në Shqipëri."

"Këtu jemi të dy sindikatat shqiptare më të mëdha të vendit, të cilat përfaqësojnë interesat e përbashkëta të punonjësve të Shqipërisë. Mendoj se në planin ndërkombëtar kemi strategjinë e përbashkët, dhe ajo që na lidh është çështja e interesave të përbashkëta të punonjësve shqiptarë."

Ai foli në veçanti për gjendjen e punonjësve shqiptarë:

"Unë mendoj dhe besoj se në të ardhmen, me frontet e të reja të punës që po hapen në Shqipëri, do të jetë një përmirësim i mëtejshëm i punonjësve nga ana ekonomike. Njëkohësisht kjo varet edhe nga lufta që bëjnë sindikatat dhe sindikalistët për mbrojtjen e të drejtave të punëtorëve dhe për riaftësimin e tyre për t'u ripunësuar në aktivitete të tjera. Besoj se ditë të mira do të ketë për të gjithë punonjësit dhe qytetarët e Shqipërisë."

Pastaj foli edhe zoti Kol Nikollaj, kryetari i Konfederatës së Sindikatave të Shqipërisë, i cili u shpreh për vendosjen e marrëdhënieve të reja midis sindikatave të Shqipërisë dhe Kinës.

"Ashtu siç tha kolegu im Gëzim Kalaja, ky seminar ka një rëndësi mjaft të veçantë, në të kanë marrë pjesë shumë liderë të sindikatave të vendeve të Evropës Lindore, duke përfshirë edhe dy sindikatat e mëdha të Shqipërisë. Tema e seminarit është për paqe, zhvillim, bashkëpunim, të drejtat legjitime të punëtorëve. Është një temë mjaft e gjerë dhe mjaft komplekse, është gjithashtu një temë aktuale për ditët tona dhe për punonjësit e Kinës, për punonjësit e Shqipërisë dhe për punonjësit e gjithë botës.

Realisht Kina ka marrë një zhvillim të madh dhe janë zhvilluar edhe marrëdhëniet midis Shqipërisë e Kinës. Ne po përpiqemi për vendosjen e marrëdhënieve të reja midis sindikatave të Shqipërisë dhe të Kinës, si dhe për të zhvilluar më tej ato pjesë pozitive që ka pasur tradita jonë."

Ndër të tjera ai tregoi edhe gjendjen e punonjësve kinezë që punojnë e banojnë në Shqipëri.

"Janë shumë punonjës kinezë që punojnë në Shqipëri. Kemi të dhëna që janë rreth 2500 punonjës nga Republika Popullore e Kinës, që punojnë në Shqipëri në sektorin e ndërtimit, të çimentos, në sektorin e ujësjellësave etj. Përveç tyre janë edhe shumë tregtarë kinezë. Në Tiranë ka një lagje që ka emrin 'Lagjja kineze'. Në këtë kuadër ne përpiqemi që të ndërtojmë marrëdhënie të mira midis sindikatave të të dy vendeve, përpiqemi që të mbrohen të drejtat legjitime të punonjësve të të dyja vendeve."

Në fund foli edhe zv/presidenti i Bashkimit të Sindikatave të Pavarura të Shqipërisë, zoti Sami Karriqi. Ai ndër të tjera theksoi:

"Për sa u përket marrëdhënieve dypalëshe, midis Bashkimit të Sindikatave të Pavarura Shqiptare dhe Konfederatës Pankineze të Sindikatave, ky nuk duhet të jetë vetëm hapi i parë për afrimin e të dyja palëve, por të konkretizohen aktivitetet e ndryshme me eksperiencën, dhe sidomos në marrëdhëniet me punonjësit nëpërmjet kontratave kolektive, të lidhura nëpërmjet marrëdhënieve punëdhënës-punëmarrës, dhe partneritetit trepalësh: shtet, punëdhënës dhe punëmarrës, i cili është mjaft i konsiderueshëm për ne, për të treguar edhe ata mbi perspektivën e sindikatave kineze dhe mbi eksperiencën e sindikatave shqiptare, për të gërshetuar dhe për të marrë gjithë pjesët pozitive, që të bëhet më e mira."

( Drita-Daming )