Dëgjoni

Në krahasim me pianistët e rinj të famshëm Li Yundi, Lang Lang etj, 66-vjeçari Yin Chengzong është një pianist i vjetër kinez. Në moshën mbi 10-vjeçare, ai fitoi çmimin e parë në një konkurs ndërkombëtar të pianos. Në vitet '50 e '60 të shekullit të kaluar, ai i njohu banorët e thjeshtë kinezë me muzikën klasike perëndimore dhe interpretoi muzikën tradicionale popullore kineze me piano duke fituar përshëndetjen e dëgjuesve.

Yin Chengzong lindi në vitin 1941 në Gulangyu të qytetit Xiamen të Kinës juglindore. Në atë kohë Gulangyu ishte një krahinë e dhënë me koncesion vendeve të huaja, Yin Chengzong i vogël dëgjonte shpesh muzikën që vinte nga kisha. Melodia e bukur e prekte thellë Yin Chengzongun, atij i pëlqeu muzika. Megjithëse mungonin kushtet e duhura, Yin Chengzong i zgjuar mësoi t'i bjerë pianos. Me inkurajimin e një mësuesi muzike, në moshën 12-vjeçare, Yin Chengzong vendosi të shkojë në Shangai për të mësuar piano. Megjithëse kishte shumë vështirësi, ky vendim ndryshoi jetën e tij:

"Gulangyu është një djep i pianos, por në atë kohë atje nuk kishte mësues profesionist. Për t'u bërë pianist profesionist, unë zgjodha largimin nga vendlindja për studime. Nëse në atë kohë nuk do të largohesha nga vendlindja, sot ndoshta do të isha vetëm një admirues i pianos."

Në shkollën e mesme pranë Institutit Muzikor të Shangait, Yin Chengzong mori arsimin profesional të pianos. Pas mësimeve disa vjeçare, ai filloi të shfaqë talentin në skenën e pianos. Në vitin 1959, Yin Chengzong fitoi çmimin e parë në konkursin e pianos të Festivalit Botëror të të Rinjve të zhvilluar në Vjenë. Ky çmim e inkurajoi shumë Yin Chengzongun për studime. Pas dy vjetëve, atij iu dha rasti për të studiuar në Bashkimin Sovjetik. Ai shkoi në Institutin Muzikor "Leningrad" për të mësuar me pianisten e famshme Tatiana Kravchenko. Në vitin 1962, ai fitoi çmimin e dytë në konkursin ndërkombëtar të pianos "Çajkovski":

"Në vitet '60 të shekullit të kaluar, Bashkimi Sovjetik ishte vendi me nivelin më të lartë artistik në botë. Në këtë vend mësova shumë gjëra."

Pas mbarimit të studimeve, Yin Chengzong u kthye në atdhe. Kryetari i atëkohshëm i shtetit i Kinës Mao Cedun u takua me të dhe e inkurajoi të krijojë më shumë muzikë me karakteristika popullore kineze. Pas kësaj, Yin Chengzong provoi të ripunojë në piano disa pjesë të operave dhe këngë popullore kineze. Në vitin 1969, ai krijoi koncertin për piano "Lumi i Verdhë" të ripunuar në bazë të "Korit të Lumit të Verdhë".

Për të krijuar këtë koncert, Yin Chengzong shkoi posaçërisht në Lumin e Verdhë dhe punoi së bashku me peshkatarët për të ndier madhështinë e këtij lumi. Shfaqja pati sukses të madh, qysh nga ajo kohë, koncerti "Lumi i Verdhë" u bë vepra tipike e Yin Chengzongut. Në vitin 2005, me rastin e 60-vjetorit të fitores së luftës botërore antifashiste, në më se 50 vende të botës u interpretua ose u transmetua ky koncert.

Në vitin 1983, Yin Chengzong u vendos për të jetuar në Nju-Jork të SHBA-së. Ai u shpreh se jeta në SHBA e ndihmoi të zgjerojë rrugën e tij artistike:

"Nju-Jorku është qendra kulturore botërore. Këtu mund të kem kontakte me artistë të ardhur nga vende të ndryshme. Kjo është nisje e re për mua."

Yin Chengzong ka zhvilluar dy herë koncerte solo në sallën muzikore "Karnegie". Media vendore e quan "pianisti më i shquar kinez". Yin Chengzong është edhe profesor në Institutin Muzikor të Klevelandit të SHBA-së, shumë studentë të tij kanë fituar çmime në konkurse ndërkombëtare të pianos.

Yin Chengzong u shpreh se kur ulet para pianos, ai harron gjithçka. Ai shpreson se studentët e tij do të jenë të vëmendshëm për çdo gjë për të arritur suksesin. (Fani)