Dëgjoni

Pas përfundimit të Lojërave të 7-ta Olimpike të Antverpit, me propozimin e vendosur të Kubertanit, Parisi organizoi Lojërat e 8-ta Olimpike të vitit 1924. Kështu, ai u bë edhe qyteti i parë që organizoi dy herë lojërat olimpike. Por, për shkak se në Lojërat Olimpike të Parisit në vitin 1900 pati mjaft ngjarje komike, të gjithë dyshonin nëse Parisi ishte i aftë për organizimin e këtij edicioni të vitit 1924.

Por, kësaj here puna ishte plotësisht ndryshe nga hera e kaluar. Këtë herë, pasi Komiteti Olimpik Ndërkombëtar deklaroi se Parisi kishte fituar të drejtën e organizimit të lojërave olimpike, masat popullore të Francës shfaqën entuziazëm shumë të madh. Shumë francezë i postuan Komisionit Olimpik të Parisit sugjerimet e tyre për organizimin. Kapiteni i skuadrës franceze të regbisë propozoi që të ndërtoheshin një stadium që mund të mbante 100 mijë spektatorë dhe një bllok apartamentesh ku mund të vendoseshin 2000 sportistë. Propozimi i tij u pranua, por për shkak të pamjaftueshmërisë së fondeve, nxënësia e stadiumit u zvogëlua në 60 mijë vende dhe grupi i apartamenteve përfundoi në disa shtëpi të thjeshta pranë stadiumit. Por mos i nënvlerësoni këto shtëpi të thjeshta, ato janë forma fillestare e fshatit olimpik.

Me qëllim që lojërat olimpike të zhvilloheshin mbarë, Komisioni Olimpik i Parisit shtypi dhe shpërndau të gjitha rregullat e programet sportive. Ai kërkoi njëkohësisht që çdo federatë e garës individuale ndërkombëtare të ofronte rregullat e garës dhe të përgjigjej për gjykimin dhe kontrollin sportiv. Pas kësaj, kjo mënyrë është trashëguar deri tani.

Meqënëse ishin bërë punët e mjaftueshme përgatitore, mbi 2000 sportistë nga 44 vende dhe rajone morën pjesë në Lojërat Olimpike të Parisit në vitin 1924. Disa sportistë me rezultate të shkëlqyeshme dhe karakter të fortë u bënë persona të njohur olimpikë në histori. Pasioni i qytetarëve të Parisit ishte i paparë. Dhjetëra mijë shikues panë në vend ceremoninë e hapjes, ku atmosfera ishte shumë ndezur.

Përveç kësaj, gjatë lojërave olimpike të Parisit të vitit 1924, u konstatua qartë problemi i pjesëmarrjes së femrave në lojërat olimpike. Qysh nga viti 1900, në Komitetin Olimpik Ndërkombëtar kishin ekzistuar divergjenca serioze për problemin e pjesëmarrjes së femrave. Prandaj, për një periudhë shumë të gjatë, qëndrimi i Komitetit Olimpik Ndërkombëtar ishte i paqartë, nëse duhej të ndalohej apo të pranohej pjesëmarrja e femrave. Por, gjatë këtij edicioni, në Komitetin Olimpik Ndërkombëtar u miratua zyrtarisht rezoluta e lejimit të pjesëmarrjes së femrave në lojërat olimpike, gjë që pati rëndësi shumë të madhe për zhvillimin e sportit të femrave.

Në këtë edicion ishte për të ardhur keq që pas përfundimit të lojërave të ndryshme, komisioni nuk shpalli rezultatin e ndeshjeve e garave dhe nuk organizoi ceremoninë e dhënies së medaljeve. Megjithatë, Lojërat e 8-ta Olimpike të Parisit ishin të suksesshme në përgjithësi, duke ndryshuar përshtypjet e këqija për Lojërat Olimpike të Parisit të vitit 1900. (Shy Guan)