Provinca Gjilin e Kinës Verilindore është një provincë e madhe e ekonomisë bujqësore, mirëpo asaj i mungojnë kuadrot praktikë të punës në fshat. Për ta zgjidhur këtë problem, që në vitin 2005 në këtë provincë u vu në zbatim plani "Një student për një fshat", që të përgatiten kuadro të kulturuar dhe të kualifikuar teknikisht, që mund të quhen "fshatarë të tipit të ri" dhe që dinë të administrojnë ekonominë fshatare.

Ndryshe nga studentët e shkollave të larta të përgjithshme, studentët e pranuar në bazë të planit "Një student për një fshat" arsimohen falas, pa paguar asgjë, sepse ata do të jenë kuadro të përgatitur posaçërisht për zhvillimin e ekonomisë në fshat plotësisht me shpenzimet e shtetit. Ky plan zbatohet konkretisht në Universitetin e Agronomisë të Gjilinit, Filialin Agronomik Çangçun të Universitetit Radio-Televiziv të Gjilinit, Institutin Agronomik të Universitetit të Yanbianit dhe në dy shkolla të tjera. Që nga vënia në jetë e këtij plani, mbi 6000 fëmijë të fshatarëve janë pranuar në shkolla të larta.

Shkollat e sipërpërmendura kanë mbledhur pedagogë të shquar për arsimimin e këtyre studentëve dhe në programet e tyre mësimore theksohet fjala "praktikë". Zv.rektorja e Institutit të Shkencës dhe Teknikës Bujqësore të Gjilinit, zonja Ma Ligjyan, thotë se, meqë shkolla e tyre ka për detyrë të përgatitë kuadro praktike për fshatin, çdo punë e tyre niset nga nevojat konkrete të fshatit.

"Ne kemi jo vetëm lëndët mësimore të specialiteteve përkatëse, por edhe një numër të madh lëndësh mësimore me zgjedhje. Kjo mishëron parimin e përgatitjes së kuadrove të kualifikuar në një profesion dhe me aftësi të shumanshme. Pas diplomimit, studentët tanë do të kthehen për të punuar në fshat. Dikush mund të merret me kultivimin e bimëve bujqësore, por ai mund të ketë njëkohësisht edhe njëfarë ekonomie të mbajtjes së kafshëve ujore. Anasjelltas, ai që do të merret me mbajtjen e kafshëve ujore, mund të mbjellë edhe një copë tokë me bimë bujqësore. Kjo kërkon aftësi të shumanshme".

Në korrik të këtij viti, 1525 studentët e pranuar për herë të parë në bazë të planit "Një student për një fshat" u diplomuan dhe u kthyen me gëzim në fshat, duke hyrë në rrugën e krijimit të kauzës në vendlindjen e vet.

Siç mësohet, ndër këta të diplomuar, 580 tashmë i kanë përcaktuar vendet e tyre të punës. Administratat e instancave të ndryshme kanë krijuar kushtet për ta. Për këtë foli zoti Vang Venming, sekretari i komitetit të partisë për qytetin Meihekou të provincës Gjilin.

"Ne do t'i ndihmojmë ata në zgjidhjen e problemeve të ndryshme, siç janë problemet e autentifikimit të produkteve të blerta bujqësore, të shqyrtimit dhe miratimit të certifikatave, të konsultave teknike për mbajtjen e kafshëve dhe bimëve etj. Komiteti i partisë për qytetin Meihekou do të nxjerrë çdo vit një shumë prej 100 mijë juanësh nga kuotizacionet e partisë dhe do ta japë si një ndihmë pa shpërblim për zhvillimin e objekteve ku marrin pjesë të rinjtë dhe të rejat që janë diplomuar dhe që janë kthyer në fshat. Komiteti i partisë për qytetin tonë do t'u japë edhe një kredi prej 100 mijë juanësh të diplomuarve që kanë vështirësi financiare".

Përkrahja e administratave të instancave të ndryshme shtoi më tej vendosmërinë e të diplomuarve për të punuar pa asnjë shqetësim në fshat, duke treguar talentin në vendlindjen e tyre. I riu 26-vjeçar Gao Gjynming nga fshati Gaogjiatun pranë lokalitetit Kaian të distriktit Nongan të provincës Gjilin, thotë se më parë ai punoi 5 vjet për kultivimin e pemëve frutore, por e kuptoi mirë nga dështimi se i mungonin njohuritë e domosdoshme. Në vitin 2005, ai dha provimet e pranimit dhe hyri në Universitetin e Agronomisë të Gjilinit, ku mori njohuritë e kultivimit të pemëve frutore. Tani ai ka përvetësuar edhe një teknologji agronomike amerikane dhe ka filluar ta përhapë atë gjerësisht. Ai parashikon se vitin e ardhshëm do të ketë të ardhura prej 30 juanësh vetëm nga shitja e frutave. Për arsimimin e tij, foli edhe i ati, Gao Siumin.

"Qysh në vitin 1996 filluam kultivimin e pemëve frutore në një copë toke të rezervuar. U përpoqëm për disa vjet, por nuk patëm sukses. Në vitin 2005 u ngrit një institut kërkimor i pemëve frutore dhe pikërisht në atë vit filloi zbatimi i planit 'Një student për një fshat'. Kështu, edhe unë e çova tim bir për studime në universitet. Ky ishte i rast i volitshëm, siç thotë një fjalë e urtë: 'Na dhuruan qymyr në mes të dëborës'."

Me zbatimin e planit "Një student për një fshat", provinca Gjilin i dha fshatit gjak të ri. Si rezultat, fshatarët, që kanë jetuar brez pas brezit me tokën si mjet jetese, kanë gjetur një mbështetje të re dhe rrugën e zhvillimit të bujqësisë me anë të njohurive tekniko-shkencore. (Zheng)