Në vitet e fundit të shekullit të 17-të dhe në vitet e para të shekullit të 18-të, përmbledhja e veprave të novelistit kinez Pu Song-ling "Rrëfenjat e Liaozhait" fitoi famë jashtëzakonisht të madhe. Shumë prej këtyre veprave janë tregime mitologjike, ku autori përshkroi me një metodë të veçantë shpirtrat e dhelprave. Ato u pëlqyen veçanërisht lexuesve të asaj kohe dhe u pëlqejnë edhe lexuesve të sotëm.

Pu Song-ling, që u quajt nga brezat e mëvonshëm "Zoti Liaozhai", lindi në vitin 1640 në familjen e një tregtari të distriktit Ziçuan(qytetit Zibo të sotëm) të provincës Shandong. Në gjithë jetën e tij, ai punoi si mësues dhe krijoi vepra të shumta letrare, ndër të cilat përmbledhja e veprave "Rrëfenjat e Laiozhait" është vepra e tij përfaqësuese.

Në "Rrëfenjat e Laiozhait" janë përfshirë 431 novela dhe tregime. Në këtë libër, autori përdori metodën e veçantë të përshkrimit të shpirtrave të dhelprave, duke fshikulluar prangat e etikës feudale dhe duke shprehur përkrahjen e tij për lirinë individuale. Ndër to, rrëfenjat për dashurinë e njerëzve me shpirtrat e dhelprave u kanë pëlqyer më shumë lexuesve. Këto vepra pasqyruan aspiratat e të rinjve dhe të rejave për të thyer prangat e etikës feudale dhe për të synuar lirinë e dashurisë.

Në folklorin kinez, dhelpra konsiderohej gjithmonë si një lloj kafshe dinake dhe djallëzore, por njëkohësisht me bukuri joshëse. Për arsye të etikës feudale kineze, gratë që shkelnin kanunin e vjetër quheshin "dhelpra djallëzore". Edhe në "Rrëfenjat e Laiozhait" Pu Song-ling krijoi figura të shumta dhelprash, por shumica e tyre paraqiteshin si vajza të reja të bukura, simpatike dhe mirëdashëse. Veçanërisht, vajza Siao Cui, personazhja kryesore e rrëfenjës "Siao Cui", që ishte një bukuroshe me prejardhjen e shpirtit të një dhelpre dhe që u bë gruaja e një fshatari, u bë një figurë shumë e ndritur.

Ai krijoi edhe figura të dhelprave të shëmtuara dhe me natyrë mirëdashëse. Në rrëfenjën "Dhelpra e Shëmtuar", ai përshkroi një vajzë me prejardhjen e një dhelpre të shëmtuar që ndihmoi një intelektual të varfër që i mungonin edhe kushtet elementare të jetesës, si ushqimi, veshmbathja dhe shtëpia e banimit. Por, pasi siguroi këto kushte jetese me ndihmën e Dhelprës së Shëmtuar, intelektuali ftoi fshehurazi një magjistar dhe iu lut që ta dëbonte atë nga shtëpia. Dhelpra e Shëmtuar, e zemëruar nga veprimi i intelektualit të pabesë, ia mori përsëri gjithçka që i kishte dhënë dhe e dënoi rëndë. Nëpërmjet kësaj rrëfenje, autori shprehu qëndrim dënimi kundër veprimeve të këqija të disa njerëzve.

Në librin e tij "Rrëfenjat e Laiozhait", duke shfrytëzuar emrin "dhelpër", Pu Song-linng vlerësoi disa virtyte të larta të grave. Ky libër mbetet si kryevepër e pavdekshme në historinë e letërsisë kineze. Ai së bashku me romanin e famshëm klasik kinez të asaj kohe "Ëndrra në Vilën e Kuqe" arritën kulmin e romaneve dhe novelave kineze. Gjatë mbi 200 vjetëve të fundit, libri "Rrëfenjat e Laiozhait" është përkthyer në më shumë se 20 gjuhë dhe është përhapur në mjaft vende të botës. Shumë novela dhe tregime nga ky libër janë ekranizuar në filma kinematografike dhe në drama serike televizive dhe u pëlqejnë shumë spektatorëve. (Zheng)