Në programin e sotëm, do t'ju paraqes këngëtarin e ri Wu Shuang dhe këngët e tij.

Po dëgjoni tani këngën "Troja". Melodia e hyrjes së kësaj kënge është e ngadaltë, ka ndjenja magjike që ngjajnë si një epikë me karakter elegant. Në pjesën kryesore të këngës melodia ka stilin e vallëzimit. Teksti i kësaj kënge përshkruan mjedisin e betejës së ashpër, duke paraqitur thirrjen e njerëzve për paqen. Në këtë këngë thuhet "Në qiell ka zjarr beteje, jeta ngjan si flladi i verës. Mbetet vetëm një trup i lavdëruar nga dielli..."

Wu Shuang, 25 vjeçar, është pekinas. Me gjatësinë prej 184 centrimetrash, paraqitjen simpatike, teknikën e mirë të vallëzimit dhe me zërin tërheqës, Wu Shuang është quajtur "Majkëll Xheksoni i vogël". Muzika e tij është e stileve hip-hop, R&B, xhaz, vallëzim etj.

Po dëgjoni tani këngën "Dashuria ngjan si fik". Melodia e kësaj kënge ka karakterin e muzikës së jugut të Kinës. Teksti klasik i këngës përshkruan vetminë e një njeriu. Në këtë këngë thuhet "Duke shikuar paqartësinë në dritën e qiriut dhe hijen e hënës, ëndrra më sjell vetmi."

Wu Shuang filloi karrierën si këngëtar në vitin 2005 dhe megjithëse ishte një këngëtar i ri, kishte shumë adhurues. Kjo lidhet ngushtë me aftësinë interpretuese dhe paraqitjen tërheqëse të tij. Wu Shuang tha se idhulli i tij është Majkëll Xhekson. Gjatë mësimit të vallëzimit, Wu Shuang ka ndjekur shumë lëvizje të tij. Pastaj ai ka përzier shumë elemente të vallëzimit perëndimor për të dhënë shfaqje me karakteristika të veçanta.

Po dëgjoni tani këngën "Shkopi im Jin Gu", e cila është një këngë inkurajuese. Teksti i kësaj kënge ka shumë përmbajtje nga romani klasik kinez "Udhëtim në perëndim". Shkopi Jin Gu është armë e përdorur nga Sun Wukong, figura kryesore e këtij romani.

Wu Shuang, si të rinj të tjerë në moshën 20-vjeçare, pëlqen lojërat elektronike dhe bisedat në internet. Gjithashtu ai luan shumë mirë basketboll. Wu Shuang ka edhe një pasion për të mbledhur robotë. Në shtëpinë e tij ka robotë të ndryshëm.

Po dëgjoni këngën "Plagosja", e cila është një këngë lirike me ritme të ngadalta. Ajo përshkruan dhimbjen e njerëzve për humbjen e dashurisë. Në këtë këngë thuhet "Kam nevojë për dashuri të përhershme, nuk mund të them asgjë."

Tani Wu Shuang po prodhon albumin e dytë, ku përfshihet dhe kënga e re "Njeriu egoist". Wu Shuang tha se ai do të prodhojë më shumë muzikë të mirë e do të këndojë mirë për të falënderuar adhuruesit e tij. Në fund të programit të sotëm le ta shijojmë këtë këngë.

Në këtë këngë thuhet "Kam bërë përpjekje të gjej dashurinë, por ti mendon se dashuria është lodër. Je njeri egoist!" (U Sen)