Në fakt, qysh nga vitet e para të Republikës Popullore të Kinës, studentëve të shkollave të larta pedagogjike u krijoheshin gjithmonë kushte favorizuese, duke iu hequr pagesat shkollore dhe shpenzimet e tjera, mirëpo që nga viti 1997, për arsye të reformës në shkolla, universitetet pedagogjike të Kinës filluan të nxjerrin pjesërisht ose plotësisht shpenzimet. Në fillim të këtij viti, në raportin e tij mbi veprimtarinë e qeverisë të mbajtur në sesionin e 5-të të legjislaturës së 10-të të Asamblesë Kombëtare Popullore, kryeministri i Kinës Ven Gja Bao u shpreh se, për të shpejtuar zhvillimin e arsimit, për të forcuar më tej punën e përgatitjes së arsimtarëve dhe për të tërhequr sa më shumë të rinj e të reja të shquara për studime në disiplinat pedagogjike, Kina do të rimëkëmbë sistemin e arsimimit falas të studentëve të disiplinave pedagogjike në disa universitete pedagogjike të varura drejtpërdrejt nga Ministria e Arsimit dhe do të hartojë parimet përkatëse.

Vënia në zbatim e këtij vendimi të qeverisë sonë e gëzoi shumë të riun Zhu Minzan, që ka ëndërruar gjithmonë të bëhet një pedagog i shquar. Në qershor të këtij viti, pas mbarimit të një shkolle të mesme në qytetin Guilin të rajonit autonom Guangsi-Xhuang të Kinës Jugperëndimore, me notat e tij të larta në provimet unike, Zhu Minzani u pranua në fakultetin e historisë të Universitetit Pedagogjik të Pekinit.

"Kam synuar gjithmonë që të pranohem në universitetin më të mirë pedagogjik dhe të bëhem pedagogu më i mirë në Kinë. Unë që kam lindur në fshat, e di mirë se fëmijët e fshatit kanë etje të madhe për dije. Shpresoj që, pas diplomimit në Universitetin Pedagogjik të Pekinit, do të shpie te fëmijët e fshatit njohuritë që po përvetësoj dhe do t'i bëj ata të kuptojnë se dijet mund të ndryshojnë fatet e tyre, madje do të ndryshojnë edhe pamjen ekonomike të zonave të tyre."

Shefi i zyrës së pranimit të studentëve të rinj pranë Universitetit Pedagogjik të Pekinit, zoti Tu Qingyun, thotë se studentët e degëve pedagogjike, të pranuar sivjet, janë të rinj e të reja të mrekullueshme. Ata jo vetëm kanë dalë me nota të shkëlqyera, por edhe e duan shumë çështjen e arsimit.

"Puna jonë me cilësi të mirë për të vënë në jetë vendimin mbi rimëkëmbjen e arsimimit falas të studentëve të disiplinave pedagogjike mishëron qëllimin e qeverisë kineze për pranimin e të rinjve e të rejave të dalluara në degët pedagogjike." Ai është i mendimit se politika për arsimimin falas të studentëve të disiplinave pedagogjike jo vetëm do të ndihmojë studentët nga familjet me vështirësi në kryerjen e mbarë të studimeve të tyre, por edhe mund të zbutë gjendjen e dobët të arsimtarëve në fshatrat e disa zonave.

Zv.rektori i Universitetit Pedagogjik të Pekinit, zoti Han Zhen, thotë se ata janë të gatshëm të zbatojnë si duhet politikën e arsimimit falas të studentëve të disiplinave pedagogjike, duke forcuar praktikën në arsim dhe duke siguruar që, pas 4 vjet studimesh, këta studentë të bëhen arsimtarë të shquar.

"Do t'i kushtojmë rëndësi lidhjes së teorisë me praktikën. Përveç lëndëve mësimore kryesore, disa lëndë të posaçme për studentët e degëve pedagogjike, si pedagogjia, psikologjia dhe metodika e mësimdhënies etj., do të kryhen kryesisht në praktikë. Për këtë, do të krijojmë disa baza praktike në Mongolinë e Brendshme dhe në provincën Shansi."

Para disa kohësh, kryeministri i Kinës Ven Gjia Bao bëri një vizitë të posaçme në Universitetin Pedagogjik të Pekinit, ku bisedoi me studentët e degëve pedagogjike. Ai tha se zbatimi i sistemit të arsimimit falas të studentëve të degëve pedagogjike ka për qëllim që në gjithë shoqërinë tonë të ngrihet një atmosferë e theksuar e respektit ndaj arsimtarëve dhe e kushtimit të vëmendjes arsimit, në mënyrë që arsimi të bëhet me të vërtetë kauza më e respektuar dhe të inkurajohen sa më shumë të rinj e të reja të shquara të bëhen punonjës të përjetshëm të arsimit. Ai u dha zemër këtyre studentëve të rinj të mësojnë me zell dhe të bëhen mësues të popullit me moral dhe me talent. (Zheng)