Ju flet Radio e Jashtme e Kinës! Të dashur dëgjues, unë jam Pina, ju përshëndes përsëri nga Pekini. Në programin e sotëm ju ftoj të shijoni një grup këngësh popullore kineze të kënduara nga këngëtarja e re Gong Linna.

Së pari ju ftoj të dëgjoni këngën popullore të provincës Sichuan me titull "Mbledh lule", kënduar nga Gong Linna. Nëpërmjet këputjes nga vajza të luleve të ndryshme në muajt e ndryshëm kënga shpreh ndjenjat e përzemërta ndaj të afërmve. Në këngë thuhet: "Në janar nuk ka lule për të këputur, mbledhja e luleve po pret ardhjen e të afërmve. Në mars çelin lulet e pjeshkës, në prill do të vijnë së shpejti të afërmit. Korriku është koha e korrjes së orizit, përgatis raki orizi për të pritur të afërmit..."

Gong Linna ka lindur në provincën Guizhou të Kinës jugperëndimore. Ajo ka zë të bukur dhe që në vogëli ka treguar talentin në këndim. Në vitin 1992, Gong Linna 12 vjeçare mori pjesë në Festivalin Artistik të Francës së bashku me Ansamblin Artistik të Fëmijëve Kinezë. Më vonë ajo u pranua në shkollën e mesme pranë Konservatorit të Kinës.

Në një mjedis të ri me shumë nxënës të talentuar, Gong Linna mësoi me zell më të madh. Çdo ditë në mëngjes herët ajo ngrihej për të ushtruar shqiptimin. Rezultatet e shkëlqyera të arritura prej saj u vlerësuan lart nga pedagogët dhe nxënësit. Pas disa vjetëve ajo hyri drejtpërdrejt në Konservatorin e Kinës. Në vitin 1999 ajo mbaroi studimet dhe u nderua nga Ministria e Kulturës me titullin "Këngëtarja e parë e këngëve popullore", e tani ajo punon si këngëtare soliste në Orkestrën Qendrore të Kombësive. Më poshtë ju ftoj të shijoni këngën popullore të kombësisë buyi të Kinës jugperëndimore me titull "Lulet e mira janë të kuqe".

Në vitin 1999 Gong Linna organizoi me sukses në Pekin "Koncertin e diplomimit". Kur dëgjoi duartrokitjet e spektatorëve ajo derdhi lot e emocionuar. Në vitin e dytë pas mbarimit të studimeve, ajo zuri vendin e 2-të në Konkursin kombëtar të këngëtarëve të rinj dhe u vlerësua nga dëgjuesit këngëtarja më e preferuar. Në vitin 2002 ajo nxori albumin e këngëve me titull "Kanë ardhur pallonj". Kënga përfaqësuese "Kanë ardhur pallonjtë" fitoi çmimin e artë kombëtar të këngëve të reja të transmetuara në radio dhe zuri vendin e parë në listën e këngëve popullore kineze. Tani le të dëgjojmë së bashku këngën popullore të kombësisë yi " Kënga për të pritur pranverën", të përfshirë në këtë album. Kjo këngë u këndon panoramave të bukura pranverore në zonën e banuar nga kombësia yi në Kinën jugperëndimore.

Në këngë thuhet: "Lulet lamei çelin në mes të dëborës, lulet vjollcë na lajmërojnë ardhjen e pranverës, panoramat e bukura pranverore pëlqehen nga të gjithë. Ka ndryshuar pamja e malit Wumeng, uji i lumit ngjitet në shkëmbinjtë e maleve, tokat e punueshme shtrihen si qilim i gjelbër. Kudo çelin lulet e bukura pranverore."

Gong Linna është një këngëtare që nuk kënaqet kurrë me sukseset e arritura, ajo bën kërkime të pandërprera në mënyrën e këndimit tradicional dhe në muzikën popullore, duke krijuar stilin e vet të ëmbël e të natyrshëm të interpretimit. Guximi i saj për të krijuar të rejat dhe temperamenti i saj i zjarrtë e i hapur kanë bërë që muzika e saj të ketë forcë më të madhe prekëse. Në fund të programit të sotëm ju ftoj të shijoni këngën popullore të kombësisë miao me titull: "Vendlindja e bukur", kënduar nga Gong Linna. Kjo këngë përshkruan panoramat e bukura të fshatit malor të kombësisë miao dhe shpreh dashurinë e banorëve miao për jetën.(Pina)