Zonat qendrore të rajonit autonom Ningsia të kombësisë hui të Kinës Veriperëndimore, që gjenden afër shkretëtirës, janë zona me klimë të thatë dhe me reshje të pakta. Megjithatë, vitet e fundit, fshatarët e këtyre zonave kanë shtuar prodhimin bujqësor, duke i kushtuar vëmendje rritjes së rendimentit dhe kursimit të ujit, dhe kanë ndryshuar gjendjen e mbështetjes plotësisht te reshjet, ose siç thoshin ata më parë, "I sigurojmë drithërat e bukës duke u mbështetur te qielli."

Një nga këto zona është edhe distrikti Tongsin, ku mjedisi ekologjik është shumë i dobët për shkak të mungesës së ujit, ose ku, përsëri sipas fjalës së vendasve, "ndodh thatësirë në nëntë ndër dhjetë vjet". Veçanërisht, thatësira e fundit zgjati 4 vjet dhe sasia mesatare vjetore e reshjeve ishte vetëm 120 milimetra. Përballë kësaj gjendjeje, administrata vendore parashtroi parullën "Rritja e rendimentit dhe kursimi i ujit". Kështu, me disa mjete të thjeshta, ata pakësuan në minimum ndikimin e thatësirës.

Zhvillimi i bujqësisë me rendiment të lartë dhe me kursim uji kërkon në radhë të parë pakësimin e konsumit të ujit. Për të pakësuar humbjen e ujit gjatë rrugës, sektorët përkatës të distriktit Tongsin shtruan tuba të degëzuar dhe çezma në rrjetin e tubave të ujit, në mënyrë që uji të rrjedhë drejtpërdrejt në arat e secilës familje fshatare. Fshatarja Li Çin e lokalitetit Maguan të këtij distrikti, e cila ka mbjellë 1 hektar tokë me patate, tha se meqë uji mund të sillet drejtpërdrejt në skaj të arës së saj, ajo i ujit në kohë dhe me lehtësi patatet dhe bimët e tjera bujqësore të saj.

"Sa mirë që uji mund të vijë deri në skaj të arës. Tani nuk shqetësohem më për ujitjen e tokës."

Pas zgjidhjes së problemit të ujitjes së bimëve bujqësore, një problem veçanërisht i rëndësishëm është se si të shfrytëzohet në mënyrë racionale uji i çmuar. Duke e gërshetuar bujqësinë tradicionale me atë moderne, distrikti Tongsin kultivon kryesisht bimët që duan më pak ujë, si patatet, shalqinjtë dhe thanat, dhe zbaton agroteknikën e re të mbjelljes së përzier të thanës me patate dhe thanës me shalqi, në mënyrë që të shfrytëzohet në maksimum toka e punueshme, të rritet rendimenti dhe të shtohen të ardhurat e fshatarëve. Për këtë foli zoti Ma Shan, zv-shefi i zyrës së mbrojtjes nga përmbytjet dhe nga thatësirat të distriktit Tongsin.

"Vitin e kaluar, në aksionin me goditje të përqendruar kundër thatësirës, u përpoqëm vetëm për zgjidhjen e problemit të ujit të pijshëm për njerëzit dhe për kafshët, kurse në aksionin e këtij viti, krahas garantimit të ujit të pijshëm, krijuam kushtet për kultivimin e bimëve bujqësore që duan më pak ujë, si shalqiri, patatja dhe thana."

Distrikti Tongsin ka në plan që, deri në vitin 2010, sipërfaqja e mbjellë me patate të arrijë në 30 mijë hektarë, sipërfaqja e mbjellë me thana të arrijë në 10 mijë hektarë dhe ajo e mbjellë me shalqinj të arrijë në 10 mijë hektarë. Me kultivimin e këtyre bimëve bujqësore karakteristike, të ardhurat për frymë do të shtohen me 1000 juanë.

Duke iu përgjigjur kërkesave të zhvillimit të prodhimit bujqësor në kushtet konkrete vendore, punonjësit e shkencës dhe teknikës të rajonit Ningsia kanë shpikur dhe prodhuar disa pajisje bujqësore që janë praktike dhe që përdoren shumë lehtë. Njëra prej tyre është edhe pompa ujitëse e lëvizshme dhe me presion, e projektuar nga Akademia e Shkencës Bujqësore e rajonit Ningsia. Me këtë pajisje uji mund të injektohet drejtpërdrejt në një thellësi 10 centimetra, ku mund të arrijë rrënjët e bimëve. Ujitja me këtë pajisje mund ta kursejë ujin në një masë të konsiderueshme, sepse nevojitet vetëm një sasi uji sa 25 për qind e sasisë që duhet në ujitjen me metodën tradicionale.

Vitin e kaluar, në kushtet e thatësirës, fshatarët e fshatrave pranë lokalitetit Yuvang të distriktit Tongsin ujitën 3 herë me pompën e lëvizshme me presion. Si rezultat, rendimenti i shalqinjve i kaloi 300 kuintalët për hektar, shifër kjo 30 % më e madhe në krahasim me vitin 2005. Me përdorimin e kësaj pajisjeje u arrit efekti i dukshëm i rritjes së prodhimtarisë dhe i kursimit të ujit.

Fshatari Luo Zhonglong, që po ujiste shalqinjtë e tij, foli për rëndësinë e ujit për bujqësinë.

"Kur kemi kushtet e ujitjes, kjo do të thotë se kemi zgjidhur problemin e bukës dhe veshmbathjes. Sa mirë është që tani kemi këto kushte."

Masat për zhvillimin e bujqësisë me objektivin e rritjes së rendimentit dhe kursimit të ujit përputhen me ligjin e natyrës vendase, favorizojnë shfrytëzimin e burimeve të pasura të energjisë diellore dhe të tokave të gjera dhe e kthejnë "ujitjen e arave" në "ujitjen e bimëve". (Zheng)