Dëgjoni

Në qarqet sportive të Kinës ka një grup njerëzish, që kanë ardhur nga vende të tjera të largëta, duke i sjellë sportit kinez koncepte të përparuara dhe përpiqen me mish e me shpirt për çështjen sportive të Kinës. Ata janë trajnerët e huaj, që luftojnë në frontin e parë të qarqeve sportive të Kinës. Njëra prej tyre është japonezja Masajo Imura, trajnerja kryesore e ekipit kinez të notit të sinkronizuar.

Masajo Imura filloi të mësonte notin e sinkronizuar që në shkollën e mesme dhe pas lënies së sportit në moshën 24-vjeçare, ajo filloi karrierën e saj si trajnere e këtij sporti. Në bazë të studimeve të paepura, ajo ka thithur, në mënyrë krijuese, elemente të karates dhe të pantomimës në notin e sinkronizuar dhe ka krijuar metodën e veçantë të stërvitjes. Të përgatitur me zell prej saj, në Japoni dolën shumë notare të shquara të notit të sinkronizuar dhe ekipi japonez është bërë një forcë e jo për t'u përfillur në qarqet botërore të notit të sinkronizuar. Që kur ky sport u përfshi në Lojërat Olimpike, ekipi japonez me Masajo Imurën si trajnere fitoi gjithsej 8 medalje olimpike në 6 edicione me radhë. Në saje të këtyre rezultateve, ajo vetë quhet si "Nëna e notit të sinkronizuar të Japonisë".

Pas Lojërave Olimpike të Athinës në vitin 2004, Masajo Imura u largua nga ekipi kombëtar japonez dhe krijoi klubin e saj të notit të sinkronizuar, duke përgatitur notare të reja. Me këtë rast, qarqet kineze të notit të sinkronizuar i bënë asaj një ftesë të sinqertë dhe kështu kjo trajnere e merituar kthehet përsëri në frontin e parë, duke punuar si trajnere kryesore e ekipit kombëtar kinez të notit të sinkronizuar që nga fundi i vitit 2006. Duke folur për arsyen e pranimit të ftesës së palës kineze, trajnerja Imura tha se aspirata e vajzave kineze të notit të sinkronizuar për medalje olimpike e ka prekur shumë.

"Kur ekipi kinez më ftoi, ato thanë se ëndërrojnë një medalje të Lojërave Olimpike të Pekinit, pavarësisht ç'ngjyrë është ajo. Ato më thanë 'Për këtë objektiv do të përpiqemi me të gjitha forcat, por ne nuk dimë çfarë të bëjmë, sepse nuk kemi përvojën e fitimit të medaljeve në Lojërat Olimpike. Kemi nevojë për përvojën dhe drejtimin tuaj'."

Vitin e ardhshëm, Kina do të jetë vend organizator i Lojërave Olimpike 2008, te cilat qarqet sportive dhe populli kinez kanë shpresë të madhe. Nën këtë presion, ekipi kinez i notit të sinkronizuar zgjodhi trajneren Masajo Imura. Imura tha se ky është besim për aftësinë e saj, prandaj s'kishte arsye ta refuzonte. Kështu, ajo kryeson dishepujt kineze në ekspeditën e saj të 7-të olimpike.

3 muaj pas fillimit të punës në Kinë, Imura përballoi sfidën e parë, Kampionatin e 12-të Botëror të Notit, që u zhvillua në maj të këtij viti në Australi. Imura kryesoi për herë të parë ekipin kinez në pjesëmarrjen në një veprimtari të madhe ndërkombëtare. Rezultati tregon se ekipi kinez pati përparim gjatë vetëm 3 muajve dhe shënoi një rekord historik: u radhit në vendin e 4-t në të katër disiplinat. Ndërsa në edisionin e kaluar, ekipi kinez u radhit vetëm në vendin e 6-të në 2 disiplina.

Imura është e mendimit se nëpërmjet kësaj veprimtarie, ekipi kinez i demonstroi botës potencialin e vet dhe ndryshoi edhe përshtypjet e gjyqtarëve për të. Dihet nga të gjithë se, ashtu si disiplinat e tjera të interpretimit, si gjimnastika dhe hedhja në ujë, për vlerësimin e notareve të notit sinkronizuar, përshtypjet e gjyqtarëve kanë rëndësi të madhe. Me përparimin në këtë kampionat, ekipi kinez me siguri do të fitojë më shumë "pikë nga përshtypjet" në Lojërat Olimpike. Mund të thuhet se nën udhëheqjen e Imurës, ekipi kinez i notit të sinkronizuar ka hedhur një hap i madh drejt Lojërave Olimpike.

Gjatë stërvitjeve 8 mujore nën drejtimin e kësaj trajnereje japoneze, notaret kineze të notit të sinkonizuar kanë mësuar gradualisht "stilin e Imurës", ndërkohë që edhe Imurës kanë filluar t'i pëlqejnë gradualisht këto dishepuj kineze. Ajo tha se duke parë stërvitjet e tyre, i kujtohet koha vetë ajo kur ishte sportiste.

"Sportistet kineze nuk i shprehin kurrë në fytyrë vuajtjet nga vështirësitë. Në fjalorin e tyre, nuk gjendet fjala 'pa mundësi'. Nga ana e forcës këmbëngulëse, sportistet e tanishme japoneze janë relativisht të dobëta."

Duke folur për objektivin e saj në Lojërat Olimpike 2008, trajnerja Imura tha se ajo ka objektivin e vet, d.m.th. të ndihmojë notaret kineze të sinkonizuara, që fituan medaljen e artë në garat aziatike, të zënë vendin e parë edhe në garat botërore.

"Nga përkrahja e sektorëve përkatës të Kinës dhe nga qëndrimi i sportistëve kinezë, ndiej aspiratën e tyre për Lojërat Olimpike. Ajo çfarë që mund të bëj unë është t'i stërvit sportistet kineze me të gjitha forcat dhe me gjithë zemër. Nuk më ka shkuar ndër mend në asnjë mënyrë që ekipi kinez duhet të mundë atë japonez, ose ekipi japonez duhet të fitojë mbi atë kinez. Unë vetëm shpresoj se e para në Azi do të bëhet edhe e para në botë."

Megjithëse tani ekziston një farë disniveli midis sportisteve kineze dhe atyre ruse e japoneze në ana teknike, e forcës dhe e aftësisë së interpretimit, prapësëprapë notaret kineze të notit të sinkronizuar kanë epërsi në cilësitë trupore. Kjo bazë e mirë plus aspiratën e tyre për medalje, shpirtin këmbëngulës si dhe trajneren magjepsës Masajo Imura, ndoshta nga pishina e Lojërave Olimpike do të çelin "lulen e artë" të notit të sinkronizuar të Kinës. (Wang Lei)