dëgjoni

Qendra Sportive Olimpike e qytetit Qinhuangdao u përurua dhe u vu zyrtarisht në shfrytëzim që nga korriku i vitit 2004, e para ndër terrenet koordinuese të ndeshjeve të futbollit të Lojërave Olimpike 2008.

Kjo qendër, që ndodhet në bregdetin e qytetit, zë një sipërfaqe prej 74.6 mijë metrash katrorë dhe mund të mbajë mbi 30 mijë shikues. Investimet e përgjithshme arritën në 150 milionë juanë.

Po ta shohësh nga larg, stadiumi kryesor i qendrës duket si një varkë me vela që është e gatshme të lundrojë në det. Meriton të përmendet çatia e këtij stadiumi, për të cilën është përdorur materiali i bardhë i "cipës". Ditën, kur hyjnë rrezet e diellit, tërë stadiumi mbushet plot me dritë natyrore të shpërhapur, që nuk shkakton hije, as shkëlqim verbues.

Ky stadium është i pajisur me një sistem të përparuar të garantimit të sigurisë. 185 kamera vëzhguese përfshijnë tërë stadiumin. Edhe sistemi i kontrollit të sigurisë në portat e këtij stadiumi ka karakter të veçantë. Ky sistem, së bashku me sistemin e shitjes dhe të kontrollit të biletave, përdorin të njëjtën bankë të të dhënave. Të gjitha biletat e shitura shënohen në këtë bankë të të dhënave. Kur shikuesi hyn në portën e stadiumit, atij i kërkohet të japë biletën për kontroll. Atëherë, sistemi i kontrollit të sigurisë do të lexojë automatikisht të dhënat e kësaj bilete dhe qendra e kontrollit do të zotërojë në çdo kohë gjendjen e shikuesve dhe mund të parandalohen biletat false.

Për të eksperimentuar funksionimin e tërë stadiumit dhe për të garantuar sigurinë e plotë të ndeshjeve olimpike, pas vënies në shfrytëzim të kësaj qendre sportive, qyteti Qinhuangdao ka organizuar me radhë shumë veprimtari të mëdha sportive kombëtare dhe ndërkombëtare. Zv/menaxheri i përgjithshëm i Kompanisë së Zhvillimit të Fizkulturës dhe të Sporteve të qytetit Qinhuangdao, z. Zhao Qinghua, na prezantoi:

"Pas përurimit të qendrës, kemi organizuar me radhë disa veprimtari të mëdha sportive, si Lojërat e Provincës Hebei, ndeshjet e yjeve të futbollit etj. Në vitin 2006, organizuam ndeshjet e futbollit të ekipit kinez me ekipin japonez, ekipin tajlandez dhe atë sirian. Me këtë rast, eksperimentuam jo vetëm funksionimin e brendshëm të stadiumit, por edhe në funksionimin e gjithë qytetit."

Z. Zhao Qinghua tha se, meqë Qendra Sportive Olimpike e qytetit Qinghuangdao është i pari stadium i përuruar për ndeshjet e futbollit për Lojërat Olimpike 2008, ajo ka shumë pika për t'u përmirësuar. Vitin e kaluar, nënkryetari i Federatës Ndërkombëtare të Futbollit Isa Hajatu e vizitoi këtë qendër dhe paraqiti disa kërkesa për përmirësim.

"Sipas kërkesave të komisionit organizativ të Lojërave Olimpike të Pekinit dhe të Federatës Ndërkombëtare të Futbollit bëmë rregullime dhe përmirësime. P. sh., shtuam numrin e sallave të pushimit të sportistëve nga 2 në 4, rregulluam dritën në fushat e hapura të stërvitjes dhe transformuam disa fusha sportive të shkollave të larta përreth si rezervë të fushave të stërvitjes. Këto punë u miratuan plotësisht nga komisioni organizativ i Lojërave Olimpike."

Në Qendrën Sportive Olimpike të qytetit Qinhuangdao ka 3 ndërtesa kryesore. Përveç stadiumit kryesor, ka edhe një pallat sportiv dhe një pallat kompleks të stërvitjeve, të cilat janë rezervë për stërvitjet gjatë Lojërave Olimpike. Për qytetin Qinhuangdao me vetëm 440 mijë banorë, shfrytëzimi i kësaj qendre me shpenzime kolosale pas Lojërave Olimpike ka qenë temë e vëmendjes. Për këtë, menaxheri Zhao kishte shumë për të folur:

"Për sa i përket shfrytëzimit të kësaj qendre sportive pas Lojërave Olimpike, kemi menduar shumë. Së pari, të gjitha ndërtesat përreth qendrës, që do të përdoren gjatë Lojërave Olimpike, do të shfrytëzohen për tregti, duke përfshirë një supermarket shumë të madh. Disa vepra të tjera të qendrës do të përurohet pas Lojërave Olimpike, si qendra e tenisit, fusha e patinazhit me rrota, fushat e vogla të stërvitjeve për futboll, basketboll dhe volejboll, që do të përbëjnë një park sportiv për qytetarët."

Në vitin 2008, në Qendrën Sportive Olimpike të qytetit Qinhuangdao do të zhvillohen 5 ndeshje të futbollit për femra dhe 6 për meshkuj. Kemi arsye të besojmë se në këtë qytet të vogël bregdetar, sportistët nga vende të ndryshme të botës do të zhvillojnë ndeshje të mrekullueshme. (Wang Lei)