dëgjoni

Ju flet Radio e Jashtme e Kinës! Të dashur dëgjues, unë jam Pina, po takohemi përsëri në programin e sotëm të këngëve popullore. Sivjet është 60 vjetori i krijimit të Rajonit Autonom të Mongolisë së Brendshme. Si rajoni i parë autonom në Kinë, Mongolia e Brendshme ka arritur suksese mahnitëse në 60 vjetët e kaluara të vështira e të shkëlqyera. Në programin e sotëm do t'ju paraqit një grup këngësh popullore të kombësisë mongole të kënduara nga këngëtarja mongole Wurenna. Së pari ju ftoj të dëgjoni këngën "3 kuaj të vegjël të kuqërremë".

Kënga "3 kuaj të vegjël të kuqërremë" u këndon miqve më besnikë të kombësisë mongole, kuajve. Në këngë thuhet: "Kam 3 kuaj të vegjël të kuqërremë, të cilët janë rritur shëndoshë e mirë. Për këtë duhet të falënderoj 3 vëllezërit e mi. Kuajt e mi të kuqërremë ngrenë pluhur të bukur dheu në stepën e gjerë të pafund."

Këngëtarja Wurenna ka lindur në vitin 1969 në stepën Erdos të Mongolisë së Brendshme, që quhet "deti i këngëve". Ajo e kaloi fëmijërinë e vet në mes të këngëve të nënës e të gjyshes, ndërsa gjuha mongole, stepa dhe kopetë e lopëve dhe dhenve ishin e gjithë bota e saj kur ishte e vogël. Kur ishte 18 vjeçe, vizita e profesorëve të Konservatorit të Shangait në Mongolinë e Brendshme e nxiti Wurennan të merrte një vendim të guximshëm, të largohej nga Mongolia e Brendshme dhe të shkonte për studime në Konservatorin e Shangait, dhe ky vendim ndryshoi krejt jetën e saj. Por atëherë Wurenna nuk dinte të fliste asnjë fjalë të gjuhës hane dhe të afërmit e saj nuk dinin asgjë për Shangain. Në Konservatorin e Shangait ajo mësoi t'i binte veglës muzikore kineze yangqin dhe pas mbarimit të konservatorit, ajo erdhi në Pekin dhe jepte shfaqje së bashku me disa orkestra. Kështu që ajo u njoh me muzikantin gjerman Robert Zollitsch që kishte ardhur në Kinë për të mësuar veglën muzikore kineze guqin, dhe u martua me të. Në një shfaqje ajo këndoi në çast një këngë, timbri i saj i natyrshëm u prit ngrohtësisht nga dëgjuesit. Duke filluar nga viti 1994, Wurenna së bashku me të shoqin dhe instrumentistë të tjerë shkojnë në vende të ndryshme të botës për të dhënë shfaqje. Stili i tyre i veçantë i interpretimit pëlqehet shumë nga muzikëdashësit. Tani Wurenna dhe i shoqi jetojnë në Gjermani dhe kanë nxjerrë në qarkullim albumin e 3-të me këngë.

Kënga që ndoqët titullohet "Kodra", kënduar nga Wurenna. Kjo është një këngë popullore mongole shumë e lashtë, melodia e saj është e gjerë dhe e shtruar dhe teksti i këngës është kuptimplotë. Në këngë thuhet: "Nga kodra Bernane, mund të shohim malin Xishan, atje ndodhet vendlindja e ime me kullotë të pasur. Kuajt që kalojnë malet e larta duke vrapuar, janë kuajt më të mirë."

Në fund të programit ju ftoj të shijoni këngën "Lulet Silai". Kjo është një këngë popullore tradicionale, e cila në mënyrë të figurshme shpreh mallin e njerëzve për vendlindjen. Në këngë thuhet: "Vetëm një ditë u largova, por pemët janë rritur shumë. Më merr gjithmonë malli për lulet silai që i dua më shumë."

Ju flet Radio e Jashtme e Kinës! Të dashur dëgjues, ndoqët një grup këngësh popullore të kombësisë mongole, të kënduara nga këngëtarja mongole Wurenna. Mirudëgjofshim të shtunën tjetër. Në mikrofon për ju, Pina.