Dëgjoni

Në Panairin Ndërkombëtar të Librave të Pekinit të zhvilluar pak kohë më parë, u zhvillua ekspozita e veprave të fotografit kinez Fu Xiaohai me titull "Ndërtuesit olimpikë" duke tërhequr vëmendjen e gjerë.

Panairi Ndërkombëtar i Librave i Pekinit është panairi më i madh i librave në Azi. Për të propaganduar Lojërat Olimpike të Pekinit të vitit 2008, këtë vit organizatorët e panairit krijuan posaçërisht një sallë ekspozite për shfaqjen e kulturës olimpike. Ekspozita e fotografive të Fu Xiaohait "Ndërtuesit olimpikë" ishte shumë tërheqëse, fotografitë shfaqën skenën e ndërtimit të palestrave të Lojërave Olimpike të Pekinit.

Në fakt më se 10 fotografi në këtë ekspozitë janë vetëm një pjesë e vogël e serisë "Ndërtuesit olimpikë" të Fu Xiaohait. Deri tani, seria "Ndërtuesit olimpikë" ka mijëra fotografi. Duke folur për qëllimin e krijimit të kësaj serie, Fu Xiaohai tha:

"Si një kinez, jam shumë krenar që Lojërat Olimpike do të zhvillohen në Pekin. Jam një fotograf dhe shpresoj të paraqes jetën e ndërtuesve olimpikë nëpërmjet fotografive, kështu krijova këtë seri me titull 'Ndërtuesit olimpikë'."

Plani i fotografimit i Fu Xiaohait filloi në tetor të vitit 2006 dhe do të përfundojë në maj të vitit 2008. Deri tani Fu Xiaohai ka harxhuar afro 1 milion juanë për këtë plan. Ai ka qenë në të gjitha palestrat që po ndërtohen në 7 qytetet ku do të zhvillohen ndeshjet e garat e Lojërave Olimpike si Pekin, Tianjin, Shangai, Shenyang, Qingdao, Qinhuangdao dhe Hong-Kong. Fu Xiaohai tha se në fillim, plani i fotografimit i tij nuk ecte mbarë:

"Mbaj mend që bëra përpjekje të palodhshme dhe mora lejen për të hyrë në palestra olimpike për fotografim. Por herën e parë, harrova të marr filma të mjaftueshëm."

Fu Xiaohai lindi në vitin 1959 në qytetin Harbin të Kinës verilindore. Qysh në moshë të re, atij i pëlqente shumë arti. Në vitin 1988, Fu Xiaohai shkoi në Rusi për të studiuar artin e fotografisë. Pastaj ai shkoi në shumë vende të Amerikës Veriore dhe të Evropës për studime e fotografi. Në vitin 2002, Fu Xiaohai u kthye në Pekin dhe filloi të merret me fotografim portretesh.

Fu Xiaohai kërkon përsosjen në fotografi. Për të dalë një fotografi e shkëlqyeshme, ai u kushton shumë rëndësi shkëmbimeve me personazhe në fotografi:

"Puna ime në fakt është një proces i shkëmbimeve të ndjenjave. Veprat e mira duhet të dalin në bazë të ndjenjave."

Tani Fu Xiaohai është i zënë me krijimin e serisë "Ndërtuesit olimpikë". Për të kapur çdo skenë të gjallë, ai punon dhe jeton së bashku me punëtorët në kantierin e ndërtimit të palestrave duke krijuar miqësi të thellë me ta.

Seria "Ndërtuesit olimpikë" e Fu Xiaohait ka ngjallur jehonë të madhe në Kinë dhe ka tërhequr vëmendjen e qarqeve fotografike ndërkombëtare. Në historinë e Lojërave Olimpike nuk ka fotografi të tilla që paraqesin plotësisht ndërtuesit e palestrave olimpike. Fu Xiaohai tha:

"Lojërat Olimpike të Pekinit do të tërheqin njerëzit e qarqeve të ndryshme për pjesëmarrje në to. Ndërtuesit e palestrave olimpike janë një pjesë prej tyre. Çdo pjesëmarrës në çështjen e Lojërave Olimpike është anëtar i familjes olimpike. Kjo është pikërisht magjia e shpirtit olimpik."

Fu Xiaohai shpreh shpresën se në të ardhmen, njerëzit do të njohin gjendjen e ndërtimit të palestrave të Lojërave Olimpike të Pekinit dhe ndërtuesit e këtyre veprave të bukura nëpërmjet fotografive të tij. Tani Fu Xiaohai vazhdon të krijojë këtë seri. Ai tha se pas zhvillimit të Lojërave Olimpike të Pekinit, do t'i dhurojë falas shtetit të gjitha veprat e serisë "Ndërtuesit olimpikë". (Fani)