Dëgjoni

Dopingu është gangrena që dëmton arenën sportive të botës. Me afrimin e Lojërave Olimpike të Pekinit, si vend organizator, puna kundër dopingut në Kinë është bërë një temë që ka tërhequr shumë vëmendje. Qarqet sportive e Kinës iu përgjigjën preokupimeve dhe dyshimeve me punë efikase.

Që nga fundi i viteve `80 të shekullit të kaluar, kinezët ishin të ndërgjegjshëm për dëmet e shpërdorimit të dopingut dhe në mbi 20 vjetët e mëvonshëm kanë ngulur këmbë në kundërshtimin e çdo rasti të përdorimit të dopingut. Ditët e fundit funksionari i Drejtorisë së Përgjithshme Kombëtare të Fizkulturës dhe të Sporteve të Kinës, z. Jiang Zhixue, bëri të njohur rrugën e Kinës në kundërshtimin e dopingut.

"Në vitin 1989 përcaktuam kursin e parandalimit, kontrollit dhe trajtimit rigoroz, kundrejt problemit të dopingut. Në vitin 1990 në Kinë u krijua Qendra e Kontrollit të Dopingut në përputhje me standardet ndërkombëtare. Në vitin 1992 krijuam edhe Komisionin kundër dopingut pranë Komitetit Olimpik të Kinës, duke zhvilluar edukimin kundër dopingut dhe duke filluar studimet për krijimin e sistemit kundër dopingut. Në vitin 1995, me miratimin nga Asambleja Kombëtare e Kinës, filloi të zbatohet 'Ligji i Republikës Popullore të Kinës mbi Fizkulturën dhe Sportet', ku përfshihet për herë të parë kundërshtimi i përdorimit të dopingut në sistemin ligjor të vendit. Në vitin 2004, Këshilli i Shtetit i Kinës publikoi dhe filloi të zbatojë edhe 'Rregulloren kundër dopingut', kështu Kina u bë një nga vendet e pakta në botë që kanë rregullore të posaçme ligjore kundrejt përdorimit të dopingut."

Krahas këtyre, Kina është edhe një nga vendet e para që nënshkruan "Rregulloren kundër Dopingut të Mbarë Globit", si dhe i pari vend në Azi që nënshkroi "Konventën Ndërkombëtare kundër Përdorimit të Dopingut në Lëvizjen Sportive", të publikuar nga UNESKO-ja. Para Lojërave Olimpike të Sidneit 2000, delegacioni sportiv i Kinës hoqi menjëherë 27 sportistë që nuk kaluan kontrollin e dopingut. Forca e madhe dhe qëndrimi i vendosur i Kinës në këtë drejtim u vlerësuan lart nga Samarançi, kryetari i atëhershëm i Komitetit Olimpik Ndërkombëtar. Vitin e kaluar, në qarqet sportive të Kinës përqindja e daljes pozitiv në kontrollin e dopingut ishte vetëm 0.4%, ndërkohë që përqindja e mbarë botës ishte 1.98%.

Në fund të shtatorit të këtij viti, do të krijohet zyrtarisht edhe Qendra Kombëtare e Anti-dopingut e Kinës. Me cilësinë e lartë dhe potencialin e madh, kjo qendër do të bëhet një nga laboratorët që njihen nga Komiteti Olimpik Ndërkombëtar dhe nga Agjencia Botërore e Anti-dopingut. Kryetari i Agjencisë Botërore të Anti-dopingut, Richard Pound pohoi veçanërisht aftësinë e Kinës në kontrollin e dopingut dhe shprehu mendimin se Kina mund të përmbushë plotësisht kërkesat e Lojërave Olimpike në punët kundër dopingut.

"Në Pekin ka laborator shumë të mirë, ku gjenden aparate të ndryshme, që ndoshta janë më të mirat. Administratorët janë shkencëtarë shumë të shquar, të cilët mund të kryejnë plotësisht punët kontrolluese dhe kërkimore."

Si vend organizator i Lojërave Olimpike 2008, Kina ka besim që të presë kontrollin nga e gjithë bota. Për këtë, qarqet sportive të Kinës kanë forcuar më tej kontrollin e sportistëve në derjtim të dopingut. Përgjegjësi i Komisionit të Anti-dopingut pranë Komitetit Olimpik të Kinës, z. Zhao Jian, i tha korrespondentes së radios sonë se Kina e vë theksin në disa disiplina kryesore:

"I Përqendrojmë kontrollet në disiplinat me rrezik të madh të përdorimit të dopingut, si atletikë, not, peshëngritje, çiklizëm, sportin e jahtit, kanotazh etj. Ndër këto disiplina, e vëmë theksin në kontrollin e sportistëve të shquar dhe tani kemi një listë të kontrollit me 2000 veta."

Zhao Jina u shpreh se vitin e kaluar Komiteti Olimpik i Kinës bëri 9400 kontrollime. Ndërsa sportistët e shquar, si Liu Xiang, kampioni olimpik i vrapimit 110 metra me pengesa, duhet të pranojë mbi 10 kontrolle të dopingut në 12 muajt e ardhshëm.

Qarqet sportive të Kinës janë të ndërgjegjshme gjithashtu se edukimi është rregullimi rrënjësor i shpërdorimit të dopingut dhe ky është drejtimi i përpjekjeve të tyre. Z. Zhao Jian tha:

"Në saje të punës së paepur në kundërshtimin e dopingut, Kina nuk ka pasur asnjë problem në veprimtaritë e mëdha ndërkombëtare vitet e fundit, sepse zbatuam shumë metoda të tjera krahas kontrollit, si p.sh. forcimi i administrimit të ekipeve sportive, edukimi i sportistëve me njohuritë e rregullat e zakonshme si dhe përgatitja e tyre nga ana morale. Mendojmë se kontrolli është metodë e rëndësishme, por ai nuk është e gjitha."

Kinezët presin një edicion të pastër të Lojërave Olimpike dhe po përpiqen në këtë drejtim, sepse ky është ideali i lëvizjes olimpike dhe gjithashtu iderali i përbashkët i të gjithë sportdashësve në botë. (Wang Lei)