Të dashur dëgjues, kënga që ndoqët është një këngë popullore e provincës Sichuan të Kinës me titull: "Këngë e malësisë", kënduar nga Wu Bixia. Kjo këngë me melodi të shpejtë dhe të lartë dhe me tekstin e thjeshtë e të përzemërt na tregon të vërtetën e thjeshtë të jetës. Në këngë thuhet: "Dielli që ka lindur si një pikë e kuqe, ndriçon malet e larta e pyjet e dendur. Lauresha e do qiellin e kaltër e të lartë, vajza e dashuron djalin punëtor."

Wu Bixia është një këngëtare që ka kombinuar mënyrën e këndimit popullor me atë evropian dhe ka fituar çmimet më të larta në botë, interpretimi i saj ka forcë të pasur shprehëse dhe prekëse artistike.

Wu Bixia ka lindur në një familje muzikëdashëse të provincës Hunan të Kinës qendrore. I ati është drejtori i një trupe të operës lokale huagu, kështu që ajo ka marrë edukim të mirë muzikor nga prindërit që në vogëli. Kur ishte ende e vogël ajo doli shkëlqyeshëm në një konkurs të këngëve për zërin e saj kumbues dhe interpretimin e bukur, dhe tërhoqi vëmendjen e shumë njerëzve. Në vitin 1990, Wu Bixia 14 vjeçare me rezultatet më të mira në provim u pranua në shkollën e mesme pranë Konservatorit të Kinës, më vonë ajo mbaroi studimet pasunivesitare në Konservatorin e Kinës. Nëpërmjet ushtrimit sistematik të muzikës vokale në konservator, ajo ka përvetësuar njëkohësisht mënyrën e këndimit popullor kinez dhe atë evropian, duke u quajtur bilbil i këtij kombinimi. Tani le të dëgjojmë këngën popullore të provincës Jiangxi të Kinës jugore me titull "Lëshojmë balona". Kjo këngë e bukur, e gëzueshme dhe e shpejtë përshkruan tablonë e hareshme të vajzave që shkojnë për të lëshuar balona.

Në vitin 1993 Wu Bixia fitoi çmimin e argjendtë në konkursin e muzikës vokale të organizuar nga Shoqata e muzikantëve kinezë dhe Ministria e Kulturës e Kinës, dhe nxori albumin e parë të saj të këngëve me titull "Çupa e vogël kineze". Më vonë ajo ka fituar më se një herë çmimin e parë në konkurset e muzikës vokale brenda dhe jashtë vendit dhe zuri vendin e 2-të në konkursin ndërkombëtar të muzikës vokale "Çajkovski". Wu Bixia që ka zë dhe buzëqeshje engjëllore u vlerësua lart nga anëtarët e jurisë dhe spektatorët.

Të dashur dëgjues, kënga që ndoqët "Meng Jiangnu" është një këngë popullore e provincës Jiansu të Kinës, kënduar nga Wu Bixia. Kjo këngë e përhapur gjerësisht në Kinë përshkruan nëpërmjet të 4 stinëve të vitit dhe emrave të luleve historinë e një çifti të ri që u detyrua të ndahej në dinastinë Qin para erës sonë. Kënga rrëfen rrugën e vështirë që kaloi Meng Jiangnu për t'i çuar rrobat e dimrit te burri, i cili u detyrua të merrte pjesë në ndërtimin e Murit të Madh. Këtë këngë Wu Bixia e interpreton në mënyrë elegante e të bukur dhe me ndjenja të holla, duke shprehur plotësisht mallin e gruas për burrin.

Ju flet Radio e Jashtme e Kinës! Të dashur dëgjues, ndoqët një grup këngësh popullore kineze të kënduara nga sopranoja e njohur kineze Wu Bixia. Mirudëgjofshim të shtunën tjetër. Në mikrofon për ju, Pina.