52-vjeçari Lai Shengchuan ka lindur në Uashington të SHBA-së dhe mbaroi studimet universitare në Tajvan. Në vitin 1978, Lai Shengchuani paraqiti kërkesë për të studiuar artin dramatik në Universitetin Berkeley të Kalifornisë të SHBA-së. Në fillim, shumë miq të Lai Shengchuanit e këshilluan të mos studiojë dramë, sepse atë kohë në Tajvan nuk kishte shikues të dramës, ata ishin të mendimit se ky art nuk do të ketë të ardhme në Tajvan. Por Lai Shengchuani nguli këmbë në vendimin e vet. Ai ishte i mendimit se moslulëzimi i dramës në Tajvan do të thotë rast që ai të zhvillojë dramën tajvaneze.

Në vitin 1984, u shfaq në Tajpei drama e parë e Lai Shengchuanit "Ne rritemi kështu". Kjo dramë nuk ishte shumë e suksesshme, në teatër kishte vetëm 100 shikues. Më vonë, Lai Shengchuani lidhi artin tradicional kinez me dramën dhe krijoi dramën "Ne bëjmë dialogun komik në mbrëmje" duke pasur sukses të madh, vetëm shirite magnetike të dramës u shitën me 1 milion. Pas kësaj, Lai Shengchuani ka krijuar shumë drama tërheqëse dhe u bë një regjisor i famshëm drame. Këtë vit, drama e Lai Shengchuanit "Dashuria në Taohuayuan" erdhi në pjesën e brendshme dhe fitoi përshëndetjen e shikuesve.

Drama "Dashuria në Taohuayuan" u krijua para 21 vjetëve. Kur u shfaq në fillim në Tajvan, për shkak të shikuesve tepër të shumtë, çmimi i biletës u ngrit shumë herë. Lai Shengchuani tha se "Dashuria në Taohuayuan" mund t'u lërë shikuesve përshtypje të thellë:

"'Dashuria në Taohuayuan' është një vepër e veçantë që mund të plotësojë kërkesat e shikuesve të moshave të ndryshme. Njëkohësisht kjo dramë mund t'u sjellë shikuesve imagjinatë të pakufizuar."

Pas krijimit, "Dashuria në Taohuayuan" është shfaqur shumë herë dhe në versione të ndryshme. Lai Shengchuni është shumë i gëzuar që këtë herë, artistët e pjesës së brendshme, të Tajvanit dhe të Hong-Kongut bashkëpunuan për shfaqjen e kësaj drame në Pekin:

"Jam i mendimit se artistët dramatikë të Tajvanit duhet të forcojnë bashkëpunimin me pjesën e brendshme, me kinezët e mbarë botës dhe me të huajt. Drama e ardhshme duhet të jetë më e hapur dhe më e lirë. Shfaqja e kësaj drame në Pekin është një nisje e mirë. Shpresoj se kjo shfaqje do të nxitë shkëmbimet teatrore e kulturore midis të dy brigjeve."

Tani Lai Shengchuani është profesor në Universitetin e Artit të Tajvanit dhe profesor i jashtëm në Universitetin Stanford të SHBA-së. Deri sot, Lai Shengchuani ka krijuar mbi 20 drama dhe shumë filma e drama televizive. Veprat e hershme të Lai Shengchuanit ishin plot satirë politike, më vonë ai filloi t'u kushtojë vëmendje problemeve shoqërore dhe fatit të njerëzve të zakonshëm duke fituar përshëndetjen e shikuesve dhe duke arritur fitime në treg. Zoti Xu Xiaozhong i Shoqatës së Artistëve të Dramës të Kinës tha:

"Lai Shengchuani është një regjisor i shquar i dramës. Veprat e tij ndërthurin karakteristikat e kulturës lindore dhe të kulturës perëndimore. Njëkohësisht ai u kushton shumë rëndësi kërkesave të shikuesve."

Lai Shengchuani është një regjisor i famshëm, por njëkohësisht është edhe një njeri naiv si fëmijë dhe ka kureshtje të madhe për jetën. Ai respekton mendimet e çdo aktori dhe është shprehur shpesh se mendimet e aktorëve mund t'i sjellin ide plot frymëzim. (Fani)