Ceremonia e hapjes së këtij edicioni u zhvillua në stadiumin "Hongkou" të Shangait. Federata Ndërkombëtare e Futbollit dhe komisioni organizativ i Kinës u dhanë shikuesve një shfaqje artistike me temën "Forca e bukurisë", ku u paraqit plotësisht forca e madhe tërheqëse e femrave që merren me futbollin. Këngëtarja e njohur kineze Wei Wei këndoi këngën temë të këtij edicioni "Vajza- futboll".

Në kulmin e mbrëmjes artistike, kryetari i Federatës Ndërkombëtare të Futbollit Josef Blater i dorëzoi ish-futbollistes së njohur kineze Sun Wen "Topin e shenjtë", që simbolizon zhvillimin e vrullshëm të futbollit të femrave gjatë 16 vjetëve pas krijimit të Kupës së Botës në Futbollin e Femrave dhe shpalli hapjen e Kupës së Botës të Futbollit të Femrave 2007.

Kupa e Botës e Futbollit të Femrave filloi në vitin 1991; ajo zhvillohet një herë në 4 vjet dhe sivjet është edicioni i 5-të. Kina organizoi edicionin e parë në vitin 1991 në qytetin Guangzhou dhe kjo është hera e dytë që Kina organizon këtë veprimtari. Për këtë arsye, në fjalimin e tij të mbajtur në ceremoninë e hapjes, Blateri e përshkroi këtë edicion si kthim në vendlindje.

"Kina është djepi i futbollit. Para mbi 2 mijë vjetëve, ky sport u shfaq në Kinë. Organizimi në Kinë i këtij edicioni të Kupës së Botës të Futbollit të Femrave është kthimi i futbollit në vendlindje."

Në krahasim me edicionin e parë të zhvilluar para 16 vjetëve, sot niveli dhe ndikimi i futbollit të femrave kanë pasur përparim të madh. Ky edicion shënon disa rekorde historike. Pala zyrtare e Federatës Ndërkombëtare të Futbollit shpalli se transmetimi në televizion i këtij edicioni përfshin për herë të parë mbi 200 vende e rajone të botës. Mbi 1900 gazetarë dhe punonjës marrin pjesë në njoftimin e këtij edicioni. Kësaj here është vendosur për herë të parë një çmim prej 6.4 milionë dollarësh amerikanë dhe çdo ekip mund të fitojë të paktën 250 mijë dollarë, ndërsa kampioni do të fitojë 1 milion dollarë.

Edhe përqindja e shikuesve të pranishëm në stadium parashikohet të jetë më e larta në histori. sportdashësit kinezë tregojnë entuziazëm të madh për futbollin e femrave. Deri tani afro 70% e biletave janë porositur. Nënkryetarja e Shoqatës së Futbollit të Kinës, zj. Xue Li, u shpreh:

"Shpresojmë se ky edicion do të bëhet festa e sportdashësve dhe do të jetë më i suksesshmi."

Në këtë edicion do të ketë konkurrencë më të ashpër dhe më të mrekullueshme. Ky është mendimi e përbashkët i trajnerëve dhe futbollisteve pjesëmarrëse. Arsyeja është shumë e thjeshtë: futbolli i femrave ka pasur zhvillim të vrullshëm gjatë disa vjetëve të kaluar. Trajnerja kryesore e ekipit të Anglisë zj. Hope Pauell tha:

"Mendoj se ky do të jetë edicioni me më shumë të panjohura. Është e vështirë të parashikoj kush do të jetë fituesi përfundimtar. Nga aspekti i shikuesve, s'ka gjë më të mirë se kjo."

Edhe trajnerja kryesore e ekipit gjemran Silvia Neid ka të njëjtin mendim me Pauellin. Ajo është e mendimit 6 a 7 ekipe, duke përfshirë ekipin amerikan, atë kinez, suedez, norvegjez dhe brazilian, kanë shpresë të shpallen kampion. Kjo është e paparë në histori dhe shikuesit do të jetë të favorizuarit e parë.

Në 20 ditët e ardhshme, nëpërmjet televizionit, sportdashësit e mbarë botës do të ndajnë së bashku me futbollistet mrekullinë e jashtëzakonshme. (Wang Lei)