Në programin e sotëm të muzikës popullore kineze do t'ju paraqit një grup melodish të bukura të provincës Guangdong. Së pari ju ftoj të shijoni melodinë "Fillon korrja e gëzueshme me drapër".

Melodia e provincës Guangdong "Fillon korrja e gëzueshme me drapër" është krijuar nga kompozitori Liao Guixiong. Pjesa e parë e melodisë me ritme të gëzueshme dhe të shpejta përshkruan gëzimin e fshatarëve që kanë filluar korrjen me drapër, pjesa e mesme që interpretohet në ritme të ngadalshme, përshkruan atmosferën lirike e të gëzueshme, ndërsa pjesa e fundit përsëri me ritme të shpejta shpreh gëzimin e njerëzve që kanë marrë korrje të bollshme.

Muzika e provincës Guangdong është një nga llojet e muzikës kineze me karakteristika të theksuara vendore dhe me stil të veçantë, ajo është krijuar në fillim të shekullit të 20-të në deltën e lumit Zhujiang të provincës Guangdong të Kinës jugore në bazë të disa pjesëve të shkurtra muzikore që përdoreshin në operën lokale yue të Guangdongut, më vonë këto melodi që mund të interpretohen në mënyrë të pavarur, u quajtën në krahina të tjera muzika e Guangdongut. Kjo muzikë është e përhapur gjerësisht jo vetëm në Kinë, por edhe në mes të emigrantëve kinezë përtej detit. Meloditë e muzikës Guangdong janë të rrjedhshme e të bukura, kanë ritme të shpejta e të qarta, janë të afta të shprehin ndjenjat e njerëzve dhe karakterizohen nga stili jugor. Më poshtë do të dëgjojmë një melodi të tillë me titull "Pranvera e hershme në zonën malore".

Kjo melodi përshkruan në mënyrë të gjallë peizazhin e bukur pranveror në zonë malore të Kinës jugore dhe i këndon pranverës së bukur të hershme dhe banorëve të zonës malore. Kjo melodi ndahet në 3 pjesë. Në fillim fyelli i bambusë nxjerr një prolog të lirë e të lartë, duke i tërhequr dëgjuesit në panoramën e bukur pranverore të zonës malore. Pastaj gaohu (vegël muzikore kineze) paraqet temën kryesore të melodisë, duke shprehur gëzimin e njerëzve. E gjithë melodia është e zjarrtë, aktive dhe energjike. Në fund melodia përfundon në mes të ndjenjave të bukura dhe lirike.

Qysh nga vitet '50 të shekullit të 20-të, muzika e Guangdongut ka marrë zhvillim shumë të madh, punonjësit e muzikës e kanë mbledhur dhe sistemuar atë, e njëkohësisht kanë bërë transformime në disa drejtime, kanë botuar shumë partitura dhe kanë krijuar e interpretuar shumë pjesë të shkëlqyera muzikore. Në fund të programit të sotëm do të shijojmë së bashku melodinë "Endim një ylber të bukur dhjetëra mijë kilometra". Kjo vepër muzikore madhështore ka trashëguar muzikën tradicionale të provincës Guangdong dhe ka futur edhe krijime të reja. Këtë melodi kompozitori e ka krijuar pasi ndjeu mendimet dhe ndjenjat e pastra të tekstilisteve punëtore. Kjo melodi e gëzueshme dhe e shpejtë përshkruan frymën e punës vetëmohuese të tekstilisteve për ndërtimin e vendit. Le ta shijojmë. (Pina)