Li Shuangjiang ka lindur në qytetin Harbin të Kinës verilindore. Që në vogëli atij i pëlqente shumë të këndonte. Pas mbarimit të shkollës së mesme, ai u pranua me rezultate të shkëlqyera në Konservatorin Qendror dhe mori bursën më të lartë. Në vitin 1963, pas mbarimit të konservatorit ai u caktua të punonte në Ansamblin Artistik të Zonës Ushtarake të Singjiangut në veriperëndim të Kinës, duke filluar karrierën e tij artistike në ushtri.

Në Singjiang, që ndodhet në veriperëndim të Kinës, jetojnë mbi 10 pakica kombëtare, si kombësia ujgure, kazake etj. dhe ka kulturë të ndritur muzikore. Gjatë 10 vjetëve që ka punuar këtu, Li Shuangjiang ka mësuar shumë këngë popullore të Singjangut, duke krijuar stilin e vet të interpretimit. Li Shuangjiang tha:

"Për një muzikant që studion muzikën, mosqenia në Sinjiang është një keqardhje e përjetshme, sepse në atë tokë pjellore ka kulturë të pasur muzikore, e cila shërben për ne si një auditor i madh dhe një thesar i çmuar. Tani shumë këngë popullore të Sinjiangut janë të përhapura gjerësisht në Sinjiang, madje në mbarë botën. Atje ka edhe muzikantë të shquar që kanë krijuar shumë vepra të bukura muzikore."

Kënga që ndoqët titullohet "Vajza e qytetit Daban". Kjo është një këngë shumë e njohur ujgure, të cilën di ta këndojë pothuajse çdo kinez. Tekstin e këngës e përktheu muzikanti i njohur kinez Wang Luobin, i cili grumbulloi, sistemoi dhe përpunoi shumë këngë popullore të bukura dhe të këndshme të Sinjiangut. Këto këngë karakterizohen nga stili i theksuar krahinor e i kombësisë dhe janë të përhapura në mbarë Kinën.

Gjatë më se 40 vjetëve, Li Suangjiang i është përmbajtur rrugës së kombinimit të mënyrës së këndimit popullor kinez me atë evropian, duke krijuar stilin e vet të veçantë të interpretimit. Tani le të shijomë së bashku këngën popullore të Sinjiangut "Lulja ime". Kjo është një këngë dashurie e kombësisë kazake që shpreh dashurinë e një djali kazak për vajzën e tij të zemrës.

Sinjiangu është një vend i njohur i këngëve dhe valleve në Kinë. Gjatë zhvillimit historik, banorët e kombësive të ndryshme kanë krijuar së bashku kulturën e larmishme muzikore. Banorët e kombësive ujgure, kazake, kirgize, taxhike, tartare etj. janë të aftë për të kënduar dhe vallëzuar. Gjatë 10 vjetëve Li Shuangjiang ka jetuar në gjirin e banorëve të këtyre kombësive dhe është rritur me kulturën dhe artin e tyre. Ai tha:

"Këto këngë popullore të bukura kanë një histori qindravjeçare dhe shprehin ndjenjat e vëllezërve të pakicave kombëtare. Pikërisht prej këtyre kam mësuar se si të shpreh ndjenjat dhe miqësinë e thellë."

Kënga që ndoqët është një këngë dashurie e kombësisë kazake me titull "Dutaer e Mariya", kënduar nga Li Shuangjiang. Kënga shpreh dashurinë romantike midis Dutaerit dhe Mariyas. Në këngë thuhet: "Djali trim kazak Yiwan Dutaer, eja sonte në shtëpinë time. Ushqe mirë kalin dhe merr dumbulën tënde (një lloj vegle muzikore popullore). Kur të dalë hëna, këndojmë së bashku të shoqëruar me dumbula."

"Alamuhan" është një këngë popullore që i pëlqen shumë Li Shuangjiangut. Kjo këngë me melodi të shpejtë e të gëzueshme dhe me tekst humoristik i këndon vajzës së bukur si lule Alamuhan. Li Shuangjiang e këndon këtë këngë në mënyrë të gjallë, të shkathët dhe në stil të kombësisë. Duke folur për këtë këngë, ai tha:

"Fjala alamuhan është emri i vajzës, është shumë e dashur dhe e lehtë për ta mbajtur mend. Alamuhani është një vajzë çapkëne. Teksti i këngës është shumë i thjeshtë e i gjallë dhe të krijon menjëherë para syve figurën e vajzës. Edhe muzika është e freskët dhe e këndshme."

Kënga "Alamuhan" është përpunuar në forma të ndryshme muzikore dhe pëlqehet shumë nga masat popullore. Tani le të shijojmë së bashku këtë këngë të kënduar nga Li Shuangjiang.

Duke filluar nga vitet '80 të shekullit të kaluar, Li Shuangjiang jo vetëm këndon, por edhe merret aktivisht me studimet teorike të artit vokal dhe me mësimdhënien. Ai ka punuar si profesor i ftuar i Konservatorit Qendror të Kinës. Në vitin 1994 filloi të punojë si dekan i fakultetit të muzikës të Institutit Artistik të Ushtrisë Popullore Çlirimtare për përgatitjen e talenteve artistike për ushtrinë. Sot shumë nxënës të Li Shuangjiangut 68 vjeçar janë bërë këngëtarë të njohur në Kinë.

Në fund të programit, le të dëgjojmë këngën "Vajza e bukur", kënduar nga Li Shuangjiang. Në këngë thuhet: "Kam parë shumë vajza të bukura, por vetëm ti je më e dashura. Ti je e freskët si diell mengjesor, oh moj vajzë."(Pina)