Diabeti, si një lloj sëmundjeje e përjetshme, hë për hë nuk mund të shërohet plotësisht. Megjithatë, me anë të mjekimit shkencor dhe racional, mund të frenohet zhvillimi i gjendjes së saj. Prandaj përcaktimi në kohë i diagnozës dhe mjekimi shkencor kanë shumë rëndësi për të sëmurët që vuajnë nga kjo sëmundje, siç thotë zoti Vu Ming-gjang, zv-kryetari i Shoqatës Kineze të Mjekësisë.

"Diabeti është një sëmundje e përcaktueshme dhe e mjekueshme, megjjithëse nuk mund të shërohet plotësisht. Ne duhet të marrim masa për të ngritur më tej nivelin teknik të personelit mjekësor, me qëllim që mjekët të përcaktojnë sa më parë diagnozën dhe të mjekojnë në mënyrë racionale, duke parandaluar ndërlikimin e diabetit akut dhe të atij kronik, gjë që ka rëndësi jashtëzakonisht të madhe për uljen e përqindjes së gjymtimit dhe vdekjes së të sëmurëve nga diabeti ose nga ndërlikimi i diabetit."

Me ngritjen e pandërprerë të nivelit të jetës së popullit dhe me ndryshimin e mënyrës së jetesës, në Kinë vihet re një prirje e rritjes së shpejtë të përqindjes së shfaqjes së diabetit. Në vitin 1979 vetëm 0.67 përqind i kinezëve vuanin nga diabeti, kurse në vitin 1996 kjo përqindje arriti në 3.6 përqind dhe sot në disa krahina të Kinës kjo përqindje ka arritur në 5 përqind. Prandaj qeveria kineze shton vazhdimisht investimet për të përkrahur spitalet dhe institucionet e farmaceutikës në rritjen e aftësisë së parandalimit dhe mjekimit të diabetit. Mirëpo në Kinë mjekët e diabetit janë përqendruar kryesisht në qytetet e mëdha, kurse në qytetet e mesme dhe të vogla, sidomos në fshat, mjekët e klinikës rrallë kanë raste të dëgjojnë leksionetet tematike të specialistëve. Aq më tepër, ata nuk përvetësojnë njohuri të reja dhe teknikën e re të mjekimit të diabetit. Prandaj në qytetet e mesme e të vogla dhe në fshat përqindja e përcaktimit të diagnozës së diabetit është shumë e ulët.

Duke filluar nga viti 2004, Ministria e Shëndetësisë e Kinës dhe Shoqata Kineze e Mjekësisë organizojnë bashkarisht në bazë aktivitetet e propagandës dhe të edukatës për diabetin me temë "Marshimi i ri për shëndetin". Profesor Çen Hong i spitalit Zhugjang të provincës Guangdong të Kinës Jugore, që është një nga specialistët për sëmundjen e diabetit dhe që është dërguar si pedagogë drejtues, thotë se ai është prekur thellë gjatë punës për specializimin e mjekëve të bazës.

"Kam parë me sytë e mi gjendjen e rëndë të parandalimit dhe mjekimit të diabetit në bazë. Mjekëve të diabetit në bazë u mungonin njohuritë elementale të kësaj dege të mjekësisë. Vjetërimi i njohurive pengoi drejtpërdrejt zhvillimin e punës së parandalimit dhe mjekimit të diabetit në bazë."

Mjekët në bazë, që morën pjesë në kurset e specializimit, reaguan me gjallëri ndaj kësaj forme të përgatitjes së kuadrove. Ata shprehën mendimin se këto aktivitete specializimi janë në kohë dhe të domosdoshme për qytetet e mesme e të vogla dhe për zonat e fshatit, sepse në saje të specializimit, u ngrit niveli i mjekëve në bazë dhe u normëzua teknika e mjekimit. Zoti Hu Zheng-qiang, mjek i spitalit popullor të distriktit Linsia të provincës Gansu të Kinës Veriperëndimore, tha se vitet e fundit në distriktin Linsia është shtuar shumë numri i të sëmurëve nga diabeti. Për shkak të mungesës së mjekimit shkencor dhe të normëzuar, u keqësua gjendja e shumë të sëmurëve dhe ata u detyruan të shkonin për mjekim në Lanzhou, kryeqendër e provincës. Por për shkak të shpenzimeve të mëdha, u varfëruan përsëri disa fshatarë që sapo ishin shkëputur nga varfëria. Aktivitetet me temë "Marshimi i ri për shëndetin" janë si një shi në kohë për mjekët dhe të sëmurët në bazë.

"Në saje të specializimit, ngritëm njohuritë për diabetin dhe përvetësuam metodën e re të mjekimit të kësaj sëmundjeje. Kursi i specializimit ka qenë frutdhënës për ne."

Sipas të dhënave, deri tani në këto aktivitete kanë marrë pjesë 32 mijë mjekë të 1200 njësive mjekësore. (Zheng)