Në Universitetin e Gjuhëve të Huaja të Pekinit, zv.dekania e Fakultetit të Gjuhëve Evropiane, që është njëkohësisht edhe profesoreshë e gjuhës shqipe, znj. He Jing, i njohu ata hollësisht me gjendjen e këtij universiteti, të fakultetit, si dhe të katedrës së gjuhës shqipe. Nga kjo katedër janë përgatitur 8 kontingjente studentësh të gjuhës shqipe, gjithsej 134 të tillë. Pas diplomimit, ata janë punësuar kryesisht në Ministrinë e Punëve të Jashtme të Kinës, në Ministrinë e Tregtisë, në Radion e Jashtme të Kinës, në Akademinë e Shkencave Shoqërore të Kinës dhe në institucione të ndryshme shtetërore ose ndërmarrje që merren me shkëmbimet me Shqipërinë në fusha të ndryshme.

Në Radion e Jashtme të Kinës, Z. Arben dhe znj. Mirela biseduan me kolegët kineze dhe shqiptarë për gjendjen e redaksive përkatëse, buxhetin e redaksisw për orët e transmetimeve dhe përmbajtjet e emisioneve etj. Z.Arben intervistoi edhe shefen Wang Lei, me emrin shqiptar Shpresa, dhe zv.shefin Fani, me emrin shqiptar Bashkim, si dhe me gazetaren e kësaj redaksie Qu Ning me emrin shqiptar Vera. Ata shprehën dëshirën për bashkëpunimin dhe shkëmbimet e mëtejshme midis BBC-së dhe Radios së Jashtme të Kinës.

Para largimit nga Pekini, gazetarët e redaksisë së gjuhës shqipe të BBC-së i dhanë edhe një intervistë veteranes së redaksisë së RJK të gjuhës shqipe Hualu, ku folën për përshtypjet e tyre gjatë kësaj vizite të shkurtër në Kinë. Në emisionin e nesërm, të dashur dëgjues, ju ftojmë të dëgjoni të plotë këtë intervistë. ( Zhai)