Dëgjoni

Nuk mbetet as një vit nga hapja e Lojërave Olimpike të Pekinit. Kohët e fundit, disa ish-kampionë amerikanë shprehën mendimin se punët përgatitore të Pekinit për Lojërat Olimpike janë të përsosura dhe ata besojnë se sportistët kinezë do të arrijnë rezultate të shkëlqyeshme në këto lojëra. Do të dëgjoni tani reportazhin e shkruar nga Liu Wei, korrespondenti i Radios së Jashtme të Kinës në Uashington.

8 gushti është dita e një-vjetorit para hapjes së Lojërave Olimpike të Pekinit. Duke folur për këto lojëra, amerikani Brus Xhener, kampioni i dhjetëgarëshit në Lojërat Olimpike të Montrealit të vitit 1976 dukej shumë i emocionuar.

"Gjatë disa vjetëve të kaluar, kam ndjekur me vëmendje të madhe gjendjen e punëve përgatitore për Lojërat Olimpike të Pekinit, nëpërmjet mediave. Mendoj se komisioni organizativ do të kryejë punët e tij në mënyrë të suksesshme. Jam shumë i emocionuar, që Pekini ndoshta do të organizojë edicionin më të dalluar të Lojërave Olimpike, sepse e di që i gjithë populli kinez e ka përkrahur këtë gjë dhe pallatet e stadiumet sportive, si dhe pajisjet janë projektuar me mendime krijuese."

Për perspektivën e delegacionit sportiv të Kinës në këto lojëra, Xhener është i mendimit se ky delegacion do të paraqitet mirë.

"Jam i mendimit se sportistët kinezë do të kenë paraqitje të dalluar. Gjatë 10 vjetëve të kaluar, ata kanë pasur potencial të fuqishëm. Ata kanë shpresë të madhe që të radhiten në vendin e parë për medalje. Edhe sikur kjo të mos arrihet në vitin 2008, ndoshta do të realizohet herën tjetër. Ata kanë shumë burime, sepse kanë gjetur përkrahje në të gjithë vendin."

Njëkohësisht Xheneri shprehu gjithashtu besim të plotë për delegacionin amerikan në vitin 2008.

"Tradicionisht, delegacioni amerikan është paraqitur mirë në Lojërat Olimpike. Delegacioni ynë ka qenë i fortë. Në disiplinat e atletikës, do të ruajmë formën shumë të mrië. Veçanërisht në disiplinat e vrapimit në distancë të shkurtër, nga 100 metra deri në 800 metra, amerikanët kanë qenë të fortë. Edhe në disiplinat e kërcimieve e të hedhjeve, do të kemi paraqitje të mirë, sepse kemi shumë sportistë të shquar. P.sh. në dhjetëgarësh, kemi Brajan Klein, që ka mundësi të madhe të shpallet kampion."

Xheneri tha i emocionuar se në vitin 2008 ai do të shkojë në Pekin posaçërisht për të parë Lojërat Olimpike. Ashtu si Xheneri, do të shkojë në Pekin edhe Karl Ljuis, sportisti i njohur amerikan i vrapimit në distancë të shkurtër. Duke dhënë një intervistë për korrespondentin e radios sonë, ai tha:

"Mendoj se Lojërat Olimpike të Pekinit do të jenë më të mirat. Në janar të këtij viti isha në Pekin dhe pallatet e stadiumet sportive e atjeshme më habitën dhe më emocionuan shumë. Mendoj se delegacioni amerikan do të arrijë përsëri rezultate të mira në Pekin, ndërsa sportistët kinezë janë konkurrues shumë të fortë. Në Pekin sportistët kinezë do të kenë paraqitjen më të mirë."

Ljuisi tha se në shumë disiplina sportistët kinezë janë konkurrues dhe Kina ka mundësi të madhe të radhitet në vendin e parë për medaljet e arta. Duke folur për vrapuesin kinez të 110 metrave me pengesa, Liu Xiang, Ljuisi e vlerësoi atë shumë.

"Ai është një sportist i jashtëzakonshëm. E konsideroj si vrapuesin më të mirë në histori për vrapimin me pengesa. Vrapuesit amerikanë e kanë të vështirë ta mundin, edhe sportistët e tjerë."

Edhe amerikanët e thjeshtë po i presin me padurim. Në kuadrin e njëvjetorit para hapjes së këtyre lojërave, studenti nga shteti Miçigan, Xhejms Kuper tha:

Mendoj se Lojërat Olimpike të vitit 2008 do të organizohen me sukses dhe populli kinez do të zhvillojë një edicion olimpik madhështor. Dëshiroj që sportistët të paraqitin nivelin e tyre më të mirë dhe mendoj se Kina, si organizatore do t'i garantojë sportistët në këtë drejtim. E di se tani për tani ekzistojnë probleme në cilësinë e ajrit. Në fakt vendi ynë kishte një njëjtin problem kur organizuam Lojërat Olimpike."

Kuperi tha se si student ai nuk ka mjaft para të shkojë në Pekin për të parë Lojërat Olimpike, por megjithatë kjo ka qenë ëndrra e tij më e madhe për vite me radhë. (Wang Lei)