Dëgjoni

Më 14 gusht paradite, sipërfaqja detare e qytetit Qingdao dukej e pikëzuar nga velat e bardha. Atje u mblodhën sportistët më të mirë në botë të lundrimit me vela, të cilët morën pjesë në Garën Ndërkombëtare të Lundrimit me Vela të Qingdaos, një garë eksperimentale e Lojërave Olimpike të Pekinit 2008. Sportistët erdhën këtu për t'u përshtatur me rrjedhën dhe shpejtësinë e ujit. Ndër velat e bardha mund të shohësh shpesh të shënuar "CHN", simboli i Kinës. Sportistët kinezë që ngitnin këto varka kanë ambicie të madhe që të fitojnë medalje në Lojërat Olimpike të vitit të ardhshëm.

Sportistja Yin Jian, që u shpall nënkampione në lundrimin e barkës së lehtë me vela në Lojërat Olimpike të Athinës 2004, i tha korrespondentit të radios sonë:

"Për objektivin e vitit të ardhshëm, medaljen e artë, do të përpiqem me të gjitha forcat."

Sporti i lundrimit me vela filloi të përhapet në Kinë që nga vitet `80 të shekullit të kaluar, por pas hyrjes në këtë shekull Kina e ka ngritur shumë nivelin në këtë sport. Me zhvillimin ekonomik, gjithnjë e më shumë kinezë po tregojnë vëmendje për këtë sport shumë interesant, por me shpenzime të larta. Pas fitimit të së drejtës së organizimit të Lojërave Olimpike 2008, qarqet sportive kineze filluan të zbulonin se lundrimi me vela është një sport në përshtatje me karakteristikat e kinezëve, që do të thotë është një sport i bazuar te teknika e inteligjenca dhe ka shpresa t'i sjellë Kinës medalje olimpike. Prandaj Kina ka shtuar investimet për këtë sport.

Vitin e kaluar, në Kampionatin Botëror të Lundrimit me Vela në shkallën "Laser Radia" të zhvilluar në SHBA, sportistja kineze Xu Lijia fitoi medaljen e artë, e para e fituar nga një sportist i krahinave të brendshme të Kinës në veprimtaritë botërore. Sot Xu Lijia e ka përqendruar vështrimin e saj te Lojërat Olimpike të Pekinit. Duke folur për perspektivën e saj në këto lojëra, Xu u shpreh se në radhë të parë duhet të fitojë mbi veten.

"Në fakt, mendoj se arritja në njëfarë shkalle është vetë kundërshtari më i madh i një sportisti dhe objektivi që duhet kapërcyer. Viti 2008 do të jetë një objektiv për mua gjatë veprimtarisë sime sportive."

Për objektivin e sportistëve kinezë në Lojërat Olimpike të Pekinit, z. Li Quanhai, zv/drejtor i Qendrës administrative të sporteve në ujë pranë Drejtorisë së Përgjithshme Kombëtare të Fizkulturës dhe të Sporteve të Kinës shtjelloi në mënyrë më të drejtpërdrejtë:

"Për ne përparimi i dukshëm është shpallja kampion. Në Lojërat që do të zhvillohen në vendin tonë, duhet të arrijmë rezultat të mirë. Rezultatet më të mira të mëparshme janë medaljet e argjendta në dy edicionet e kaluara olimpike. Në vitin 2008, shpresojmë të arrijmë një kthesë për kinezët dhe për sportistët tonë, që do të thotë të kapërcejmë medaljen e argjendtë."

Objektivisht, ekipi kinez ka ende disnivel në shumë drejtime dhe gjatë një viti në të ardhmen duhet ta ngrejë cilësinë më tej.

Sigurisht, zhvillimi i një sporti nuk ka për qëllim vetëm rezultatin në Lojërat Olimpike. Vitet e fundit, sporti i lundrimit me vela është përhapur gjithnjë e më shumë në Kinë dhe ka tërhequr një kontingjent të madh sportdashësish. Guo Chuan është njëri prej tyre.

Kapiteni i barkës së madhe me vela me emrin "Qingdao", Guo Chuan, është i pari kinez që udhëtoi rreth rruzullit duke ngarë vetë barkën me vela. Ai tha:

"Për masat popullore, sporti i lundrimit me vela porsa ka filluar në Kinë. Por unë besoj se duke përfituar nga rasti i Lojërave Olimpike dhe me këto pajisje e terrene shumë të mira, do të ketë gjithnjë e më shumë kinezë që do ta parapëlqejnë këtë sport dhe do të arrijmë më shumë sukses."

Ashtu siç tha Guo Chuan, edhe unë besoj se pikat e bardha të velave në sipërfaqen detare të Qingdaos nuk do të mbeten gjithmonë vetëm në veprimtari të mëdha sportive, por do të bëhen një pjesë përbërëse e jetës së kinezëve. (Wang Lei)